សាលាវិជ្ជាជីវៈទេសចរណ៍របស់ក្រសួងទេសចរណ៍ ដែលកំពុងសាងសង់។ រូបថត ក្រសួងទេសចរណ៍
ភ្នំពេញៈ នៅឆ្នាំ ២០២៤ ខាងមុខ សាលាវិជ្ជាជីវៈទេសចរណ៍ចំនួន ២ ដែលជាសាលាដំបូងរបស់ក្រសួងទេសចរណ៍ នឹងបើកដំណើរការ ហើយដែលសាលានេះក៏នឹងក្លាយជាមជ្ឈមណ្ឌលវាយតម្លៃ Center of Excellence ផងដែរ។ នេះបើតាមលោក ថោង ខុន រដ្ឋមន្ត្រីក្រសួងទេសចរណ៍។
លោក ថោង ខុន បានលើកឡើងបែបនេះកាលពីថ្ងៃទី ១៨ ខែឧសភា ក្នុងឱកាសលោកដឹកនាំថ្នាក់ដឹកនាំក្រសួងទេសចរណ៍ សាលាវិជ្ជាជីវៈទេសចរណ៍ និងក្រុមការងារគម្រោងចុះត្រួតពិនិត្យដំណើរការសាងសង់។ បើតាមក្រសួងទេសចរណ៍ លោកថោង ខុន បានថ្លែងនាឱកាសនោះថា អគារសាលានេះ អាចនឹងសម្រេចបានតាមផែនការដែលបានគ្រោងទុក ហើយរំពឹងថា នៅឆមាសទី២ ឆ្នាំ ២០២៤ សាលាអាចជ្រើសរើសសិស្ស-និស្សិតចូលរៀនជំនាញវិជ្ជាជីវៈទេសចរណ៍បានហើយ។
លោកថ្លែងថា ៖ «វិស័យទេសចរណ៍ ជាវិស័យដែលត្រូវការជំនាញវិជ្ជាជីវៈច្បាស់លាស់ ដូចនេះសាលាជាតិទេសចរណ៍មួយនេះដែលជាសាលាដំបូងរបស់ក្រសួងទេសចរណ៍ នឹងចូលរួមបណ្តុះបណ្តាលជំនាញតាមស្តង់ដា សំដៅពង្រឹង និងពង្រីកធនធានមនុស្សក្នុងវិស័យទេសចរណ៍ទាំងគុណភាពនិងបរិមាណ ឆ្លើយតបទៅការអភិវឌ្ឍនៃវិស័យទេសចរណ៍កម្ពុជា»។
បើតាមក្រសួងទេសចរណ៍ សាលាវិជ្ជាជីវៈទេសចរណ៍នេះនឹងមានមុខវិជ្ជាសំខាន់ៗជាច្រើនដូចជាជំនាញសេវាកម្មសណ្ឋាគារ, សេវាកម្មម្ហូបអាហារ និងភេសជ្ជៈ,សេវាកម្មធ្វើដំណើរនិងសេវា-កម្មទេសចរណ៍។ ការបណ្តុះបណ្តាលជំនាញទាំងនេះ គឺស្របទៅតាមក្របខ័ណ្ឌគុណវុឌ្ឍិជាតិ និងអាស៊ាន គឺចាប់ពីវិញ្ញាបនបត្រកម្រិត ១ ទៅកម្រិត ៣ រៀនរយៈពេល ១ ឆ្នាំ និងឌីប្លូមកម្រិតខ្ពស់រៀនរយៈពេល ២ ឆ្នាំ។ សាលាក៏នឹងក្លាយជាមជ្ឈមណ្ឌលវាយតម្លៃ Center of Excellence ផងដែរដើម្បីទទួលស្គាល់អ្នកមានបទពិសោធន៍ក្នុងជំនាញទេសចរណ៍។
ជាមួយគ្នានេះលោក ថោង ខុន ក៏បានកោតសរសើរលើការរៀបចំការដ្ឋានសាងសង់មានស្តង់ដា សណ្តាប់ធ្នាប់ល្អ មានអនាម័យ មានដាក់ធុងសម្រាប់ញែក មានបន្ទប់ទឹកសម្រាប់បុគ្គលិក និងកម្មករ ប្រព័ន្ធសុវត្ថិភាព និងគិតគូរសុខភាព និងបានទទួលលទ្ធផលសំណង់ល្អលើសពីការគ្រោងទុក។
សូមរំឭកដែរថា គម្រោងសាងសង់សាលាវិជ្ជាជីវៈទេសចរណ៍ចំនួន ២ នេះ មានមួយនៅរាជធានីភ្នំពេញ និង ១ ទៀតនៅខេត្តព្រះសីហនុ ដែលជាជំនួយឥណទានហិរញ្ញប្បទានរវាងកម្ពុជា និងទីភ្នាក់ងារបារាំងសម្រាប់អភិវឌ្ឍន៍ (AFD)។ សាលានេះត្រូវបានប្រារព្ធពិធីបើកការដ្ឋានសាងសង់កាលពីថ្ងៃទី ២៤ ខែវិច្ឆិកា ឆ្នាំ ២០២២។
លោក ធួន ស៊ីណាន ប្រធានក្រុមប្រឹក្សាភិបាល ក្រុមហ៊ុន IMCT ខូអិលធីឌី និងជាប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATACC) ថ្លែងថា នៅកម្ពុជា សាលាជំនាញវិជ្ជាជីវៈខាងផ្នែកទេសចរណ៍នៅមានតិចតួចហើយនៅតាមសាកលវិទ្យាល័យគឺមានតែទ្រឹស្តីប៉ុណ្ណោះ។
«ការបង្កើតឱ្យមានសាលាវិជ្ជាជីវៈនេះ គឺពិតជាជួយរួមចំណែកក្នុងការកសាងមូលដ្ឋានជំនាញក្នុងវិស័យទេសចរណ៍ពីព្រោះយើងឃើញថា ទេសចរណ៍វាស្រួល មករៀនតែមួយឬ ២ ខែចេះ ឬមកធ្វើតាមគេមួយឬ ២ អាទិត្យនឹងចេះ ប៉ុន្តែវាមិនដូចការគិតរបស់យើងនោះទេ គឺវិស័យទេសចរណ៍នេះត្រូវការនូវការយល់ដឹងស៊ីជម្រៅច្រើនមែនទែន»។
ការមានសាលាវិជ្ជាជីវៈនេះគឺជារឿងចាំបាច់សម្រាប់កម្ពុជា ហើយលោកសង្ឃឹមថា ទៅពេលខាងមុខទៀតនឹងមានសាលានេះនៅតាមគ្រប់ខេត្តធំៗជាច្រើនទៀត៕
