សិក្ខាសាលាផ្សព្វផ្សាយពីការលុបបំបាត់ការរើសអើងប្រឆាំងស្ដ្រីកាលពីថ្ងៃទី ២៣ ឧសភា។ រូបថត ក្រសួងសាធារណការ
ភ្នំពេញៈ លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូនបានឱ្យដឹងថា រាជរដ្ឋាភិបាល បាននិងកំពុងយកចិត្តទុកដាក់យ៉ាងខ្លាំងលើការលើកកម្ពស់សិទ្ធិរបស់នារី តាមរយៈការជំរុញការចូលរួមរបស់ស្ត្រីក្នុងជីវភាពនយោបាយ សង្គមកិច្ច សេដ្ឋកិច្ច វប្បធម៌ និងបង្កើនសមាសភាពស្ត្រីក្នុងជួរថ្នាក់ដឹកនាំផងដែរ។
លោកស្រីបានលើកឡើងដូចនេះ តាមរយៈសិក្ខាសាលាផ្សព្វផ្សាយអនុសញ្ញាស្ដីពីការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ (CEDAW) និងច្បាប់ពាក់ព័ន្ធនៅទីស្តីការក្រសួងកាលពីថ្ងៃ ២៣ ខែឧសភា ឆ្នាំ ២០២៣ និងបានបង្ហាញការប្តេជ្ញាចិត្តថា នឹងខិតខំជំរុញ និងលើកកម្ពស់សមភាពយេនឌ័រឱ្យកាន់តែសកម្មឡើងថែមទៀតដើម្បីលើកកម្ពស់សិទ្ធិរបស់នារី។
យោងតាមក្រសួងសាធារណការ និងដឹកជញ្ជូន សិក្ខាសាលានេះ មានការចូលរួមពីអង្គភាពពាក់ព័ន្ធក្រោមឱវាទក្រសួង និងមន្ត្រីនៃមន្ទីរសាធារណការនិងដឹកជញ្ជូនខេត្តស្វាយរៀង ព្រៃវែង កណ្តាល តាកែវ និងកំពង់ស្ពឺ ផងដែរ។
ប្រភពដដែលបន្តថា សិក្ខាសាលានេះរៀបចំឡើងដើម្បីផ្សព្វផ្សាយឱ្យបានទូលាយពីអនុសញ្ញា (CEDAW) និងអនុសាសន៍ ១២ ចំណុច របស់លោកនាយករដ្ឋមន្ដ្រីហ៊ុន សែន ក៏ដូចជាបង្កើនការយល់ដឹង គាំទ្រ និងរួមចំណែកពីគ្រប់អង្គភាពក្នុងយុទ្ធនាការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ ព្រមទាំងពង្រឹងការតាមដានការអនុវត្តអនុសញ្ញា និងច្បាប់ពាក់ព័ន្ធឱ្យកាន់តែមានប្រសិទ្ធភាពថែមទៀត។
លោកស្រី មឹន មាណវី បានថ្លែងថា៖ «រាជរដ្ឋាភិបាល បាននិងកំពុងយកចិត្តទុកដាក់យ៉ាងខ្លាំងលើការលើកកម្ពស់សិទ្ធិរបស់នារី តាមរយៈការជំរុញការចូលរួមរបស់ស្ត្រីក្នុងជីវភាពនយោបាយ សង្គមកិច្ច សេដ្ឋកិច្ច វប្បធម៌ និងបង្កើនសមាសភាពស្ត្រីក្នុងជួរថ្នាក់ដឹកនាំតាំងពីថ្នាក់មូលដ្ឋានដល់ថ្នាក់ជាតិ តួយ៉ាងនៅក្រសួងសាធារណការ និងដឹកជញ្ជូន មានស្ត្រីដែលមានឋានៈជារដ្ឋលេខាធិការចំនួន ៤ រូបផងដែរ»។
រាជរដ្ឋាភិបាលកម្ពុជាមានចក្ខុវិស័យវែងឆ្ងាយក្នុងការជំរុញឱ្យមានថ្នាក់ដឹកនាំជាស្ត្រីនៅតាមស្រុក/ខណ្ឌ-ខេត្ត ទូទាំងប្រទេសកម្ពុជាពោលគឺយ៉ាងហោចណាស់ឱ្យមានអភិបាលរងស្រុក/ខណ្ឌ/ក្រុង និងអភិបាលរងខេត្ត ឬរាជធានីផងដែរ។ នេះបើតាមការអះអាងបន្ថែមរបស់លោកស្រី មឹន មាណវី។
សូមរំឭកថា លោកស្រី អ៊ឹង កន្ថាផាវី ប្រធានក្រុមប្រឹក្សាជាតិកម្ពុជាដើម្បីស្ត្រីនិងជារដ្ឋមន្ត្រីក្រសួងកិច្ចការនារីធ្លាប់បានលើកឡើងពីខែកុម្ភៈ ឆ្នាំ ២០២៣ ថា នៅឆ្នាំ ២០២២ មន្ត្រីរាជការស្ត្រីមាន ៦ ៨២២ នាក់ នៃមន្ត្រីរាជការសរុប ២៨ ៥៤២ នាក់បានទទួលការពង្រឹងសមត្ថភាពជំនាញផ្សេងៗទាំងនៅក្នុងនិងក្រៅប្រទេស។
លោកស្រីបន្តថា ក្នុងវិស័យសេដ្ឋកិច្ចនៅកម្ពុជាស្ត្រីបានក្លាយជាចលករក្នុងការរួមចំណែកជំរុញកំណើនសេដ្ឋកិច្ចជាតិ និងការអភិវឌ្ឍសង្គមដែលមានកម្លាំងពលកម្មស្ត្រីមានប្រមាណ ៨៤ ភាគរយ ក្នុងនោះមានស្ត្រីប្រមាណ ៦១ ភាគរយ ជាម្ចាស់អាជីវកម្ម ឬអ្នកធ្វើធុរកិច្ច ដែលជាអត្រាខ្ពស់ក្នុងតំបន់។ លើសពីនេះទៀត កាលឆ្នាំ ២០២២ នៅកម្ពុជា ស្ត្រីជាម្ចាស់ក្រុមហ៊ុនមានការកើនឡើងចន្លោះពី ២០ ភាគរយទៅ ២២ ភាគរយ និងស្ត្រីជាម្ចាស់សហគ្រាសកើនពីចន្លោះពី ៣០ ភាគរយ ទៅ ៣២ ភាគរយថែមទៀត។
ពាក់ព័ន្ធនឹងការលើកឡើងនេះដែរ លោកនាយករដ្ឋមន្ត្រី ហ៊ុន សែន ធ្លាប់បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ក្រុមប្រឹក្សាជាតិកម្ពុជាដើម្បីស្ត្រីដែលបានរួមចំណែកក្នុងការកសាង និងអភិវឌ្ឍសង្គមជាតិ ដោយលោកបានចាត់ទុកថា បច្ចុប្បន្នស្ត្រីបានចូលរួមចំណែកក្នុងកិច្ចការងារជាច្រើនវិស័យ៕
