​ភ្នំពេញៈ អាជ្ញាធរ​មីន​ស្នើសុំ​កិច្ចសហការ​ពី​មជ្ឈមណ្ឌល​សកម្មភាព​មីន​មនុស្សធម៌​អន្តរជាតិ​ប្រចាំ​ទីក្រុង​ហ្សឺ​ណែវ ប្រទេស​ស្វ៊ី​ស (GICHD) ក្នុងការ​ផ្តល់​ប្រឹក្សា​បច្ចេកទេស​គ្រប់គ្រង​ហានិភ័យ​សកម្មភាព​មីន​នៅ​កម្ពុជា ដើម្បី​ធានា​សុវត្ថិភាព​ដល់​ការអភិវឌ្ឍ​ហេដ្ឋារចនាសម្ព័ន្ធ​ជាតិ និង​អាយុជីវិត​ប្រជាជន​តាម​ជនបទ​។​

​ការស្នើ​នេះ​ធ្វើឡើង​ក្នុងជំនួប​រវាង​លោក លី បញ្ញា​រិ​ទ្ធិ៍ អគ្គលេខាធិការ​អាជ្ញាធ​រ​មីន និង​លោក Stephen Robinson អ្នកគ្រប់គ្រង​កម្មវិធី​ប្រតិបត្តិការ​សកម្មភាព​មីន​តំបន់​របស់​អង្គការ GICHD ក្នុង​ឱកាសលោក​ដឹកនាំ​គណៈប្រតិភូ ចូលរួម និង​ចែករំលែក​បទពិសោធន៍​អំពី​ការអនុវត្ត​សកម្មភាព​មីន​នៅ​កម្ពុជា ក្នុង​សិក្ខាសាលា​ថ្នាក់​តំបន់​ស្តីពី «​ការគ្រប់គ្រង​ហានិភ័យ​និង​ការទទួលខុសត្រូវ​ក្នុង​ដំណើរការ​បោសសម្អាត និង​ការគ្រប់គ្រង​ហានិភ័យ​ក្រោយ​ការ​បោសសម្អាត សម្រាប់​តំបន់​អាស៊ីអាគ្នេយ៍​ទីក្រុង​ហាណូយ ប្រទេស​វៀតណាម​ពីថ្ងៃ​ទី​២២ ដល់ ២៦ ខែឧសភា​។​

​អាជ្ញា​មីន​បញ្ជាក់​ក្នុង​ហ្វេ​ស​ប៊ុ​កនា​ថ្ងៃទី​២៦ ខែឧសភា ថា​៖ «​ឯកឧត្តម លី បញ្ញា​រិ​ទ្ធិ៍ បាន​ដឹកនាំ​គណៈប្រតិភូ ជួបពិភាក្សា​ជាមួយ​លោក Stephen Robinson ដើម្បី​ស្នើសុំ​កិច្ចសហការ​លើ​បទដ្ឋាន​បច្ចេកទេស​នានា និង​ជាពិសេស​ការផ្តល់​ប្រឹក្សា​បច្ចេកទេស​ក្នុងការ​រៀបចំ​ឯកសារ​ស្តង់ដា និង​ឯកសារ​យុទ្ធសាស្ត្រ ដែល​ពាក់ព័ន្ធ​ក្នុងការ​គ្រប់គ្រង​ហានិភ័យ​សកម្មភាព​មីន​នៅ​កម្ពុជា​»​។​

​អាជ្ញា​មីន​បញ្ជាក់ថា សិក្ខាសាលា​នេះ បានរៀបចំ​ឡើង​ក្រោម​កិច្ចសហការ​រវាង​មជ្ឈមណ្ឌល GICHD និង​មជ្ឈមណ្ឌល​សកម្មភាព​មីន​ជាតិ​វៀតណាម (VNMAC) ដោយមាន​សិក្ខាកាម​ចូលរួម​ប្រមាណ ៦០​នាក់ (​ស្ត្រី​១០​នាក់​) រួមមាន​អាជ្ញាធរ​មីន​ជាតិ និង​មជ្ឈមណ្ឌល​ជាតិ ប្រតិបត្តិ​ករ​ជាតិ​-​អន្តរជាតិ មកពី​ប្រទេស​វៀតណាម ថៃ ឡាវ និង​កម្ពុជា​៕