រដ្ឋាករទឹកស្វយ័តក្រុងភ្នំពេញនឹងចុះពិនិត្យវាស់ស្ទង់គុណភាពនាឡិកាទឹកដែលមានអាយុកាលប្រើប្រាស់លើស ១១ ឆ្នាំ ក្នុងខណ្ឌដង្កោ ចាប់ពីថ្ងៃទី២៩ ខែឧសភា នេះ
ភ្នំពេញៈ រដ្ឋាករទឹកស្វយ័តក្រុងភ្នំពេញគ្រោងនឹងចាត់ក្រុមជាងនាឡិកាឱ្យចុះពិនិត្យវាស់ស្ទង់គុណភាពនាឡិកាទឹក ដែលមានអាយុកាលប្រើប្រាស់លើស ១១ ឆ្នាំ តាមកម្មវិធីកំណត់ចាប់ពីថ្ងៃទី២៩ ខែឧសភា ឆ្នាំ២០២៣នេះតទៅនៅក្នុងខណ្ឌដង្កោ រាជធានីភ្នំពេញ។
យោងតាមសេចក្តីជូនដំណឹងស្តីពីការពិនិត្យ និងថែទាំនាឡិកាទឹករបស់រដ្ឋាករទឹកស្វយ័តក្រុងភ្នំពេញជូនចំពោះអតិថិជនប្រើប្រាស់ទឹកស្អាតនៅក្នុងខណ្ឌដង្កោបានឱ្យដឹងថា ក្នុងអំឡុងពេលធ្វើការពិនិត្យ-វាស់ស្ទង់ ឬផ្លាស់ប្តូរនាឡិកាទឹកនោះ ការផ្គត់ផ្គង់ទឹកនៅតាមបណ្តាគេហដ្ឋាននីមួយៗ អាចនឹងមានភាពរអាក់រអួលរយៈពេលខ្លី តែមិនលើសពី ២ ម៉ោងឡើយ។
រដ្ឋាករទឹកស្វយ័តក្រុងភ្នំពេញបានបញ្ជាក់ថា ករណីពិនិត្យបឋមឃើញថា នាឡិកាទឹកមានកម្រិត លំអៀងខ្ពស់ ឬនាឡិកាខូច រដ្ឋាករទឹកស្វយ័តក្រុងភ្នំពេញនឹងតម្រូវឱ្យអតិថិជនកាន់នាឡិកាទឹកនោះដោយផ្ទាល់មករោងជាងនាឡិកានៅស្នាក់ការកណ្តាលអង្គភាពរបស់ខ្លួន ដើម្បីពិនិត្យ និងវាស់ស្ទង់បន្ថែម។
.jpg)
រដ្ឋាករទឹកស្វយ័តក្រុងភ្នំពេញបានអំពាវនាវដល់អតិថិជនទាំងអស់ មេត្តាចូលរួម ឬចាត់តំណាងសហការ និងទទួលយកការដាក់នាឡិកាថ្មីតាមកម្មវិធីកំណត់ខាងលើ។ សម្រាប់ការពិនិត្យ និងផ្លាស់ប្ដូរនាឡិកាទឹកនេះ អតិថិជនពុំចំណាយអ្វីទាំងអស់៕
