រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា ចុះទស្សនកិច្ច និង ជួបសំណេះសំណាលជាមួយម្ចាស់កសិដ្ឋាន និងប្រជាសហគមន៍ នៅភូមិសំរោងជើង ឃុំសំរោង ស្រុកសូត្រនិគម ខេត្តសៀមរាប នាថ្ងៃទី២៦ ខែឧសភា។ ក្រសួងកសិកម្ម
សៀមរាបៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា ជំរុញកសិករឱ្យប្រើប្រាស់ភ្លើងអគ្គិសនីសម្រាប់កសិកម្មនៅពេលយប់ និងប្រើប្រាស់ថាមពលសូឡា បូមទឹកនៅពេលថ្ងៃ សម្រាប់ស្រោចស្រពដំណាំ ទើបចំណេញថវិកាច្រើន។
លោកជំរុញបែបនេះក្នុងពេលលោកចុះទស្សនកិច្ច និង ជួបសំណេះសំណាលជាមួយម្ចាស់កសិដ្ឋាន និងប្រជាសហគមន៍ នៅភូមិសំរោងជើង ឃុំសំរោង ស្រុកសូត្រនិគម ខេត្តសៀមរាប នាថ្ងៃទី២៦ ខែឧសភា។ នេះបើយោងតាមហ្វេសប៊ុកក្រសួងកសិកម្ម។
ហ្វេសប៊ុកក្រសួងបញ្ជាក់នាថ្ងៃទី២៦ ខែឧសភា ថា លោករដ្ឋមន្ត្រីកសិកម្មក៏បានលើកទឹកចិត្តដល់កសិករដែលដាំបន្លែគ្រប់មុខក្នុងផ្ទះសំណាញ់ត្រូវសហការជាមួយមន្ទីរកសិកម្ម និងដៃគូពាក់ព័ន្ធ ដើម្បីសិក្សាពីបច្ចេកទេស ពូជ និងពិនិត្យព័ត៌មានកសិកម្មឱ្យទាន់ពេលវេលា ដោយភ្ជាប់ជាមួយផែនការច្បាស់លាស់ ដើម្បីផលិតបានគុណភាពល្អ ស្របតាមតម្រូវការទីផ្សារ ទទួលបានតម្លៃខ្ពស់។
ហ្វេសប៊ុកក្រសួងបន្តថា៖ «ចំពោះការប្រើប្រាស់ទឹក ឯកឧត្តមរដ្ឋមន្ត្រី បានណែនាំទៅប្រជាកសិករ គួរកុំធ្វើកសិកម្មពឹងផ្អែកតែលើប្រភពទឹកអណ្តូងតែមួយមុខ គឺត្រូវប្រើធុងស្តុកទឹកឱ្យបានច្រើន ស្របតាមតម្រូវការស្រោចស្រពដំណាំនៅទីតាំងនោះ»។
លោក ឌិត ទីណា ថែមទាំងបានណែនាំដល់ម្ចាស់កសិដ្ឋាន និងប្រជាសហគមន៍នៃបណ្តុំអាជីវកម្មបន្លែ នៅស្រុក សូត្រនិគម ខេត្តសៀមរាប ត្រូវសហការគ្នាខិតខំបន្ថែមទៀត ផលិតបន្លែទៅតាមតម្រូវការទីផ្សារ កុំលើសពីផែនការផលិត នាំឱ្យខាតបង់ពេលវេលា ថវិកា និងធ្លាក់ថ្លៃ៕
