ក្រុមគ្រូពេទ្យស្ម័គ្រចិត្តលោកហ៊ុន ម៉ានីពិនិត្យសុខភាពនិងព្យាបាលជំងឺជូនពលរដ្ឋឥតគិតថ្លៃនៅស្រុកបន្ទាយស្រី នាថ្ងៃទី២៧ខែឧសភាឆ្នាំ២០២៣។ រូបភាព៖ មន្ទីរព័ត៌មានខេត្តសៀមរាប
សៀមរាប: ប្រជាពលរដ្ឋប្រមាណជា ៦ ០០០ នាក់នៅខេត្តសៀមរាប បានទទួលការពិនិត្យនិងព្យាបាលជំងឺទូទៅដោយឥតគិតថ្លៃពីក្រុមការងារគ្រូពេទ្យស្ម័គ្រចិត្តរបស់លោក ហ៊ុន ម៉ានី ដើម្បីចូលរួមកាត់បន្ថយអត្រាភាពក្រីក្ររបស់ប្រជាពលរដ្ឋនៅតាមមូលដ្ឋាន។
លោកលេង ផាលីប្រធានប្រតិបត្តិក្រុមការងារគ្រូពេទ្យស្ម័គ្រចិត្តនាថ្ងៃទី២៧ខែឧសភាបានដឹកនាំក្រុមគ្រូពេទ្យស្ម័គ្រចិត្តប្រមាណ៣៩០នាក់ចុះពិនិត្យសុខភាពនិងព្យាបាលព្រមទាំងចែកថ្នាំពេទ្យជូនប្រជាពលរដ្ឋដោយឥតគិតថ្លៃប្រមាណ៦ ០០០នាក់នៅស្រុកបន្ទាយស្រី ដែលជាអំណោយរបស់លោកហ៊ុន ម៉ានីប្រធានកិត្តិយសក្រុមការងារគ្រូពេទ្យស្ម័គ្រចិត្ត។
លោកលេង ផាលីបានមានប្រសាសន៍ថា៖«នេះគឺជាសកម្មភាពមនុស្សធម៌ ដែលក្រុមគ្រូពេទ្យបានពិនិត្យសុខភាពព្យាបាល និងចែកជូនថ្នាំពេទ្យដល់ប្រជាពលរដ្ឋដោយឥតគិតថ្លែ»។ នេះបើយោងតាមមន្ទីរព័ត៌មានខេត្តសៀមរាប។
.jpg)
ជាមួយគ្នានោះដែរ លោកប៉ែន ផល្គុនអនុប្រធានប្រតិបត្តិទទួលបន្ទុកប្រធានប្រតិបត្តិក្រុមការងារគ្រូពេទ្យស្ម័គ្រចិត្តនៅខេត្តសៀមរាប និងជាប្រធានមន្ទីរពេទ្យបង្អែកខេត្ដសៀមរាបបានលើកឡើងដែរថាតាមរយៈការចុះពិនិត្យលើកនេះ ក្រុមការងារបានធ្វើការពិគ្រោះជំងឺទូទៅរបស់ពលរដ្ឋការអប់រំផ្នែកសុខភាព និងជំងឺផ្លូវចិត្តផងដែរ។
លោកបានបន្តថា ការពិគ្រោះជំងឺទាំងនោះរួមមានជំងឺរោគស្ត្រី រោគឫសដូងបាត ជំងឺសួត ក្រពះ ពោះវៀន ជំងឺផ្លូវដង្ហើម ជំងឺប្រដាប់រំលាយអាហារ ជំងឺសើស្បែក ព្រូន ស្លេកស្លាំង សន្លាក់ឆ្អឹង រលាកថ្លើម កាមរោគ ជំងឺគ្រុនចាញ់ គ្រុនឈាម ជំងឺភ្នែក សុខភាពមាត់ធ្មេញ ជំងឺទឹកនោមផ្អែម ជំងឺបេះដូង លើសឈាម ជំងឺត្រចៀក ច្រមុះ បំពង់ក ជំងឺតម្រងនោម ម៉ាស៊ីនផ្លុំរកមេរោគក្រពះតាមរយ:ខ្យល់ដង្ហើម វាស់ចង្វាក់បេះដូងជំងឺទូទៅផ្នែកកុមារ វះកាត់តូចនិងព្យាបាលរបួសជាដើម។
លោកប៉ែន ផល្គុនបានបញ្ជាក់ថា៖«នេះគឺជាស្មារតីមនុស្សធម៌សុទ្ធសាធដែលស្តែងចេញពីសេចក្តីស្រឡាញ់ប្រជាពលរដ្ឋក្នុងនាមជាឈាមជ័រខ្មែរដូចគ្នា ខ្មែរស្រឡាញ់ខ្មែរ ពោលគឺការព្យាបាលមិនប្រកាន់បក្ខពួក សាសនាឬនិន្នាការនយោបាយណាមួយឡើយ»។
លោកបានបន្ថែមថាការពិនិត្យសុខភាពបែបនេះក៏ជាផ្នែកមួយក្នុងការចូលរួមកាត់បន្ថយភាពក្រីក្ររបស់ប្រជាពលរដ្ឋនៅតាមមូលដ្ឋានផងដែរ។
អ្នកស្រីច្រឹក សម្បត្តិអាយុ៦៥ឆ្នាំបានសម្តែងទឹកមុខសប្បាយចិត្ត និងថ្លែងអំណរគុណដល់ក្រុមគ្រូពេទ្យដែលតែងតែគិតគូរសុខទុក្ខរបស់ប្រជាពលរដ្ឋ។
អ្នកស្រីបានប្រាប់ថា៖«ក្នុងចិត្តសប្បាយត្រេកអរណាស់ដែលគ្រូពេទ្យចុះមកបង្រៀនផ្នែកសុខភាព និងផ្តល់ថ្នាំពេទ្យ ឥឡូវនេះគ្រូពេទ្យមកពិនិត្យដល់ឃុំខ្ញុំហើយអត់យកលុយទៀត។ សម្រាប់ខ្ញុំពេលពិនិត្យសុខភាពឃើញថាលើសជាតិស្ករដល់ជាង២០០គ្រូពេទ្យឱ្យថ្នាំលេប១០ថ្ងៃ ហើយពេលអស់ថ្នាំគាត់ឱ្យខ្ញុំទៅមណ្ឌលសុខភាព»។
អ្នកស្រីបានបន្តបង្ហាញចំណាប់អារម្មណ៍ថា៖«រដ្ឋាភិបាលមិនដែលទុកប្រជារាស្រ្តឱ្យស្លាប់ដោយសារវេទនាទេ នេះហើយរដ្ឋាភិបាលយើងខំលូន ខំធ្វើនៅគ្រប់ខេត្ត ក្រុងជួយប្រជាជន»។
ដោយឡែកនៅថ្ងៃទី២៨ ខែឧសភា លោកហ៊ុន ម៉ានី នឹងដឹកនាំក្រុមការងារគ្រូពេទ្យស្ម័គ្រចិត្តដោយផ្ទាល់នាំយកអំណោយថ្នាំពេទ្យ និងព្យាបាលជំងឺជូនប្រជាពលរដ្ឋដោយឥតគិតថ្លៃចន្លោះពី២ ០០០នាក់ទៅ៣០០០នាក់នៅស្រុកកងមាសខេត្តកំពង់ចាមផងដែរ។
តាមរយៈកម្មវិធីនេះ ក្រុមគ្រូពេទ្យនឹងធ្វើការបណ្តុះបណ្តាលវគ្គសង្រ្គោះបឋម ក៏ដូចជាអប់រំផ្សព្វផ្សាយពីសុខភាព និងផ្សព្វផ្សាយពីយុទ្ធនាការចាក់វ៉ាក់សាំងបង្ការកូវីដ១៩ ដូសទី១ ដូសទី២ ដូសទី៣ ដូសទី៤ ដូសទី៥ និងដូសទី៦ ក្នុងក្របខ័ណ្ឌទូទាំងប្រទេសផងដែរ។សម្រាប់ការចុះពិនិត្យសុខភាព និងព្យាបាលជំងឺនៅឯខេត្តកំពង់ចាមនេះគឺជាបេសកកម្មលើកទី១ ០៧០៕
