កម្ពុជា ថៃ ឡាវ វៀតណាមនិង UN ធ្វើទស្សនកិច្ចរួមគ្នាវាយតម្លៃពីការជួញដូរគ្រឿងញៀនតាមព្រំដែន កាលពីថ្ងៃទី ២៦ ខែឧសភា។ រូបថត NACD
ស្ទឹងត្រែងៈ កម្ពុជា ថៃ ឡាវ វៀតណាម និងអង្គការសហប្រជាជាតិ (UN) បានបំពេញទស្សនកិច្ចរួមគ្នារយៈពេល ៥ ថ្ងៃនៅតាមតំបន់ព្រំដែនថៃ ឡាវ កម្ពុជា ដើម្បីសិក្សាស្វែងយល់ និងវាយតម្លៃអំពីស្ថានភាពនៃការចរាចរ និងជួញដូរគ្រឿងញៀន និងសារធាតុគីមីផ្សំពីតំបន់ត្រីកោណមាសឆ្លងកាត់ព្រំដែនចូលទៅកាន់ប្រទេសក្នុងតំបន់។
តំបន់ត្រីកោណមាស ជាតំបន់ដែលមានព្រំប្រទល់ជាប់ប្រទេសថៃ ឡាវ និងមីយ៉ាន់ម៉ា។ ដំណើរទស្សនកិច្ចចាប់ពីថ្ងៃទី ២២-២៦ ខែឧសភាតាមតំបន់ព្រំដែននៃ ៣ ប្រទេសនេះបានចាប់ផ្តើមពីខេត្តអ៊ូប៊ុនរាជធានី ប្រទេសថៃ បន្តទៅខេត្តចំប៉ាសាក់ ប្រទេសឡាវ និងបញ្ចប់នៅខេត្តស្ទឹងត្រែង ប្រទេសកម្ពុជា។ គណៈប្រតិភូដឹកនាំដោយលោក Jeremy Douglas ប្រធានអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម (UNODC) ប្រចាំតំបន់អាស៊ីអាគ្នេយ៍ និងប៉ាស៊ីហ្វិក មានសមាសភាពចូលរួមពីតំណាងស្ថាប័នត្រួតពិនិត្យគ្រឿងញៀននៃប្រទេស ចំនួន ៤ រួមមាន កម្ពុជា ថៃ ឡាវ វៀតណាម និងក្រុមការងាររបស់ UNODC សរុបចំនួន ២៣ នាក់។
លោក នាក់ យុទ្ធា អគ្គលេខាធិការរង នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា (NACD) បានដឹកនាំក្រុមការងារចូលរួមដំណើរទស្សនកិច្ចនេះ។
របាយការណ៍ NACD បញ្ជាក់ថា ក្នុងដំណើរទស្សនកិច្ចនៅតាមតំបន់ព្រំដែននៃប្រទេសថៃ គណៈប្រតិភូបានជួបប្រជុំជាមួយការិយាល័យត្រួតពិនិត្យគ្រឿងញៀនតំបន់ ៣ របស់ប្រទេសថៃ ដែលមានទីស្នាក់ការនៅខេត្តអ៊ូប៊ុនរ៉ាតថានី ដើម្បីស្វែងយល់អំពីស្ថានភាពនៃការចរាចរ ជួញដូរគ្រឿងញៀន និងសារធាតុគីមីផ្សំខុសច្បាប់ឆ្លងកាត់ព្រំដែន។
របាយការណ៍លើកឡើងថា៖ «ក្នុងដំណើរទស្សនកិច្ចនៅតាមតំបន់ព្រំដែននៃប្រទេសថៃ ឡាវ និងកម្ពុជា គណៈប្រតិភូបានបន្តជួបប្រជុំជាមួយអង្គភាពគយច្រកទ្វារព្រំដែន Chong Mak ខេត្តអ៊ូប៊ុនរ៉ាតថានី ប្រទេសថៃ និងអង្គភាពត្រួតពិនិត្យច្រកទ្វារព្រំដែននៃប្រទេសឡាវ និងច្រកទ្វារព្រំដែនអន្តរជាតិ ត្រពាំងក្រៀល ប្រទេសកម្ពុជា ដើម្បីស្វែងយល់អំពីភារកិច្ចរបស់អង្គភាពបម្រើការនៅតាមបន្ទាត់ព្រំដែន ក្នុងការចូលរួមសហការត្រួតពិនិត្យ ទប់ស្កាត់ បង្ក្រាបការចរាចរជួញដូរគ្រឿងញៀន និងសារធាតុគីមីផ្សំខុសច្បាប់ឆ្លងកាត់ព្រំដែន»។
របាយការណ៍បន្តថា៖ «គណៈប្រតិភូក៏បានបន្តដំណើរទស្សនកិច្ចតាមបណ្តាការិយាល័យទំនាក់ទំនងព្រំដែនអន្តរជាតិ (BLO) ថៃ-កម្ពុជា ថៃ-ឡាវ កម្ពុជា-ឡាវ និងតំបន់ព្រំដែនដែលមានបញ្ហាប្រឈមក្នុងការបង្ការទប់ស្កាត់ និងបង្ក្រាបការលួចលាក់ចរាចរណ៍ជួញដូរគ្រឿងញៀនឆ្លងកាត់ព្រំដែនខុសច្បាប់»។
របាយការណ៍បញ្ជាក់ថា គណៈប្រតិភូបានជួបប្រជុំជាមួយលោក ស្វាយ សំអ៊ាង អភិបាលខេត្តស្ទឹងត្រែង និងជាប្រធានគណៈកម្មាធិការត្រួតពិនិត្យគ្រឿងញៀនខេត្តស្ទឹងត្រែង ដើម្បីស្វែងយល់អំពីស្ថានភាពនៃការចរាចរ ជួញដូរគ្រឿងញៀន សារធាតុគីមីផ្សំខុសច្បាប់ឆ្លងកាត់ព្រំដែនកម្ពុជា-ឡាវ និងក្នុងភូមិសាស្ត្រខេត្តស្ទឹងត្រែងទាំងមូល។
បន្ទាប់ពីដំណើរទស្សនកិច្ចនេះ គណៈប្រតិភូបានជួបប្រជុំគ្នាដើម្បីបូកសរុប និងវាយតម្លៃអំពីលទ្ធផលដំណើរទស្សនកិច្ចនេះនៅថ្ងៃទី ២៦ ខែឧសភានៅសណ្ឋាគារ Sunway រាជធានីភ្នំពេញ។
លោក មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន មិនអាចទាក់ទងបានដើម្បីសុំការបញ្ជាក់បន្ថែមបានទេ នាថ្ងៃទី ២៨ ខែឧសភា។
លោក Jeremy Douglas បានសរសេរនៅលើបណ្តាញ Twitter នាថ្ងៃទី ២៥ ខែឧសភា ថា ដំណើរទស្សនកិច្ចនេះចាប់ផ្តើមនៅប្រទេសឡាវ និងបញ្ចប់នៅកម្ពុជា។ ការល្បាតជាប្រចាំដោយបុគ្គលិក BLO កំពុងទប់ស្កាត់អ្នកជួញដូរ និងអ្នករត់ពន្ធគ្រឿងញៀន និងសត្វព្រៃ។
លោកបានសរសេរថា៖ «សូមអរគុណដល់អាជ្ញាធរទាំង ២ សម្រាប់ការផ្តល់ព័ត៌មាន»៕
