ភ្នំពេញៈ កម្ពុជា អូស្ត្រាលី និងហុងកុង បញ្ជាក់ពីការបន្តពង្រឹងកិច្ចសហប្រតិបត្តិការគយ និងទំនាក់ទំនងកាន់តែជិតស្និទ្ធបន្ថែមទៀត និងការផ្លាស់ប្តូរការចែករំលែកព័ត៌មាន ដើម្បីប្រយុទ្ធប្រឆាំងនឹងបទល្មើសឧក្រិដ្ឋកម្មឆ្លងដែន។
លោក គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជាបានដឹកនាំគណៈប្រតិភូនៃអគ្គនាយកដ្ឋានគយនិងរដ្ឋាករកម្ពុជាទៅចូលរួមសន្និសីទអគ្គនាយកគយតំបន់អាស៊ី-ប៉ាស៊ីហ្វិករបស់អង្គការគយពិភពលោកលើកទី២៤ នៅទីក្រុងភើត (Perth) ប្រទេសអូស្ត្រាលី ចាប់ពីថ្ងៃទី២៨ ដល់ថ្ងៃទី៣១ ខែឧសភា។
ការបញ្ជាក់ពីការបន្តពង្រឹងកិច្ចសហប្រតិបត្តិការគយនេះគឺធ្វើឡើងក្នុងជំនួបទ្វេភាគីរវាង គណៈប្រតិភូនៃរដ្ឋបាលគយកម្ពុជាដែលដឹកនាំដោយលោក គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ជាមួយគណៈប្រតិភូនៃកងកម្លាំងព្រំដែនអូស្ត្រាលី (ABF) និងគណៈប្រតិភូនៃរដ្ឋបាលគយហុងកុង ក្នុងឱកាសនៃសនិ្នសីទនេះ។
ហ្វេសប៊ុកអគ្គនាយកដ្ឋានគយនិងរដ្ឋាករកម្ពុជាបញ្ជាក់នាថ្ងៃទី២ ខែមិថុនា ថា៖ «ឆ្លៀតក្នុងឱកាសនៃសនិ្នសីទនេះ គណៈប្រតិភូនៃរដ្ឋបាលគយកម្ពុជាបានប្រជុំទ្វេភាគីជាមួយគណៈប្រតិភូនៃកងកម្លាំងព្រំដែនអូស្ត្រាលី (ABF) និងគណៈប្រតិភូនៃរដ្ឋបាលគយហុងកុង»។
ហ្វេសប៊ុកដដែលបន្តថា៖ «ប្រធានបទសំខាន់នៃកិច្ចប្រជុំទ្វេភាគីនេះមានការបន្តពង្រឹងកិច្ចសហប្រតិបត្តិការគយ និងទំនាក់ទំនងកាន់តែជិតស្និទ្ធបន្ថែមទៀត ការផ្លាស់ប្តូរ និងចែករំលែកព័ត៌មានដើម្បីប្រយុទ្ធប្រឆាំងនឹងបទល្មើសឧក្រិដ្ឋកម្មឆ្លងដែន ការលើកកម្ពស់កិច្ចសម្រួលពាណិជ្ជកម្ម និងការផ្តល់ជំនួយបច្ចេកទេសក្នុងការកសាងសមត្ថភាពជាដើម»។
ហ្វេសប៊ុកដដែលបានឱ្យដឹងថា សន្និសីទនេះមានការចូលរួមផ្ទាល់ពីគណៈប្រតិភូនៃរដ្ឋបាលគយចំនួន ២៣ ប្រទេស ការិយាល័យកសាងសមត្ថភាពប្រចាំតំបន់អាស៊ី-ប៉ាស៊ីហ្វិក (ROCB/AP) និងការិយាល័យមន្ត្រីទំនាក់ទំនង ព័ត៌មានសម្ងាត់ប្រចាំតំបន់អាស៊ី-ប៉ាស៊ីហ្វិក (RILO/AP)៕
