ពលករខ្មែរធ្វើការនៅថៃក្នុងជំនួបជាមួយលោកអុិត សំហេង នាពេលកន្លងមក។ រូប ក្រសួងការងារ
កំពង់ឆ្នាំងៈ លោកនាយករដ្ឋមន្ត្រី ហ៊ុន សែន បានថ្លែងថា ភាគីថៃបានឆ្លើយតបទៅនឹងក្តីបារម្ភរបស់កម្ពុជាចំពោះព័ត៌មានដែលថា ថ្នាក់ដឹកនាំនៃគណបក្សឆ្ពោះទៅមុខរបស់ថៃ នឹងបណ្តេញពលករកម្ពុជា និងពលករឡាវចេញពីប្រទេសថៃ ប៉ុន្តែត្រូវបានបញ្ជាក់ជាថ្មីថា មិនមានការបណ្តេញចេញឡើយ។
លោកនាយករដ្ឋមន្ត្រីបានថ្លែងបញ្ជាក់ដូចនេះនៅក្នុងពិធីជួបសំណេះសំណាលជាមួយកម្មករ កម្មការិនីជាង ១៨ ០០០ នាក់ មកពីរោងចក្រសហគ្រាសចំនួន ៥ ដែលកំពុងដំណើរការអាជីវកម្មក្នុងខេត្តកំពង់ឆ្នាំង នៅថ្ងៃទី ៨ មិថុនា។
លោក ហ៊ុន សែន មានប្រសាសន៍ថា៖ «សូមអបអរសាទរជាមួយនឹងព័ត៌មានដែលទទួលបានពីព្រះរាជាណាចក្រថៃដែលមុននេះ ខ្ញុំបានបង្ហាញពីកង្វល់ស្តីពីបក្សឆ្ពោះទៅមុខដែលឮចេញជាពាក្យមកថា នឹងបណ្តេញកម្មករឡាវ និងកម្មករកម្ពុជាចេញពីប្រទេសថៃ។ ប៉ុន្តែនៅថ្ងៃម្សិលមិញនេះមានការបញ្ជាក់មកថា គឺមិនមានការបណ្តេញចេញទេ តែគេនឹងមានការសម្រួលឱ្យថែមទៀតផង»។
លោកបន្តថា៖ «បើដូច្នោះ យើងលែងមានការកង្វល់ជាមួយនឹងការចាកចេញរបស់កម្មករ-កម្មការិនីរបស់យើងដែលកំពុងធ្វើការនៅប្រទេសថៃហើយ។ ខ្ញុំត្រូវតែឈឺឆ្អាលជាមួយរឿងនេះដែលទាក់ទិននឹងការបណ្តេញចេញ ឬបាត់បង់ការងារ ឬបាត់អត្ថប្រយោជន៍របស់កម្មករ-កម្មការិនីរបស់យើងនៅក្រៅប្រទេស»។
លោកនាយករដ្ឋមន្ត្រីទទួលបានការបកស្រាយ និងទទួលបានព័ត៌មាននេះដោយការពេញចិត្ត ហើយលោកសង្ឃឹមជឿជាក់ថា កិច្ចសហប្រតិបត្តិការលើវិស័យទាក់ទិនជាមួយនឹងកម្មករអន្តោប្រវេសន៍ ដែលវាជាកិច្ចព្រមព្រៀងសម្របសម្រួលនៅក្នុងក្របខ័ណ្ឌអាស៊ាន គឺត្រូវទទួលបានការការពារ និងដោះស្រាយ។
លោកបញ្ជាក់ថា ៖ «នៅកម្ពុជា ក៏មានកម្មករបរទេសធ្វើការដែរ ដែលកម្ពុជាក៏ត្រូវយកចិត្តទុកដាក់ការពារ សុខទុក្ខរបស់គេដែរ។ អ៊ីចឹងទេ! ចំណុចទាំងនេះ គឺជាចំណុចដែលខ្ញុំត្រូវបញ្ជាក់ ហើយឆ្លើយតបដោយការអរគុណចំពោះបក្សដែលមានសំឡេងឆ្នោត»។
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានលើកឡើងកាលពីថ្ងៃទី ៨ ខែមិថុនា ថា ការធ្វើចំណាកស្រុកពីប្រទេស ១ ទៅប្រទេស ១ គឺជាក្រឹត្យក្រមសេដ្ឋកិច្ចពិភពលោក ដែលយោងតាម អង្គការអន្តរជាតិទេសន្តរប្រវេសន៍ (IOM) គិតត្រឹមឆ្នាំ ២០២១ មានពលករទេសន្តរប្រវេសន៍នៅទូទាំងពិភពលោក ចំនួនប្រមាណ ២៨១ លាននាក់។ ក្នុងនោះនៅតំបន់អាស៊ីមានចំនួនប្រមាណ ១១៥ លាននាក់, តំបន់អឺរ៉ុបចំនួនប្រមាណ ៦៣ លាននាក់, តំបន់អាស៊ានមានចំនួនប្រមាណជិត ២៤ លាននាក់ដែលភាគច្រើន ការធ្វើចំណាកស្រុក គឺពីប្រទេសកំណើតទៅប្រទេសដែលមានចំណូលខ្ពស់ជាង ឬការទៅធ្វើការនៅក្រៅប្រទេសជាបុគ្គលិកជំនាញ។
គិតត្រឹមខែឧសភា ឆ្នាំ ២០២៣ ពលករកម្ពុជាប្រមាណជាង ១ លាន ៣ សែននាក់ កំពុងធ្វើការនៅក្រៅប្រទេស ក្នុងនោះ ប្រទេសថៃចំនួន ១ លាន ២ សែននាក់, កូរ៉េចំនួន ៤ ម៉ឺន ៩ ពាន់នាក់, ម៉ាឡេស៊ីចំនួន ២ ម៉ឺន ២ ពាន់នាក់ និងជប៉ុនចំនួន ១ ម៉ឺន ៩ ពាន់នាក់។ ពលករកម្ពុជាទាំងអស់នេះ ទទួលបានអត្ថប្រយោជន៍ផ្សេងៗ តាមច្បាប់នៃប្រទេសនីមួយៗ រួមទាំងប្រាក់ឈ្នួល និងរបបសន្តិសុខសង្គម។
លោក អ៊ិត សំហេង បញ្ជាក់ទៀតថា៖ «ប្រាក់ឈ្នួលជាមធ្យមខ្ពស់ ក្នុង ១ ខែ ដែលបងប្អូនពលករទទួលបាន គឺនៅប្រទេសកូរ៉េប្រមាណ ១ ៥០០ ដុល្លារអាមេរិក, ជប៉ុនប្រមាណ ១ ៤០០ ដុល្លារអាមេរិក ក្រៅពីនោះ ប្រទេសថៃប្រមាណ ៤០០ ដុល្លារអាមេរិក និងប្រទេសម៉ាឡេស៊ីប្រមាណ ៣០០ ដុល្លារអាមេរិក»។ គិតពីចំណូលរបស់ពលករបានផ្ញើមកគ្រួសារពីគ្រប់ប្រទេស មានប្រមាណជាង ២,៧ ពាន់លានដុល្លារអាមេរិកក្នុង ១ ឆ្នាំ។ ទន្ទឹមនឹងនេះ ពួកគេក៏ទទួលបានជំនាញ និងបទពិសោធន៍ការងារ ដែលអាចជាធនធានមនុស្ស នៅពេលត្រឡប់មកប្រទេសកម្ពុជាវិញ។ នេះបើតាមលោក អ៊ិត សំហេង។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករថ្លែងថា រាជរដ្ឋាភិបាលកម្ពុជា គួរតែបង្កើតឱកាសការងារក្នុងស្រុកដល់ប្រជាពលរដ្ឋកម្ពុជាឱ្យបានច្រើនជាជាងដែលមើលឃើញប្រជាពលរដ្ឋខ្លួនឯង ត្រូវបង្ខំចិត្តចាកចេញពីស្រុកកំណើតរបស់ខ្លួន ដើម្បីទៅធ្វើការរកចំណូលនៅក្រៅប្រទេស។
លោក ស៊ីណា និយាយថា៖ «ដូច្នេះប្រសិនជាអាជ្ញាធរថៃ បញ្ជូនពលករខ្មែរយើងមកស្រុកកំណើតវិញ វាជារឿងប្រឈមមែនទែន ពីព្រោះយើងមិនអាចឆ្លើយតបទៅនឹងការផ្ដល់ឱកាសការងារភ្លាមៗបានសម្រាប់បងប្អូនខ្មែរដែលវិលមកស្រុកកំណើតវិញ»។
ចំណែកមន្ត្រីកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឌីថេ ហូយ៉ា បានថ្លែងថា ពាក់ព័ន្ធនឹងព័ត៌មានដែលថា ភាគីថៃ នឹងមានគោលនយោបាយបណ្ដេញពលករខ្មែរចេញពីប្រទេសរបស់ខ្លួនដែលបានចេញផ្សាយប៉ុន្មានថ្ងៃនេះជាព័ត៌មានមិនពិតទេ ព្រោះគណបក្សនយោបាយដែលបានឈ្នះឆ្នោតនៅប្រទេសថៃ មិនមានគោលនយោបាយបែបនេះឡើយ៕
