លោកស សាឡុងដេត (ស្ដាំ)ដែលទើបសុំចូលរួមជាមួយCPP ៕ រូបថត សហការី
ភ្នំពេញៈ មេធាវីរាជរដ្ឋាភិបាលកម្ពុជាបានសម្រេចដកពាក្យបណ្តឹងដែលបានប្តឹងលោក ស សាឡុងដេត អតីតសមាជិកគណៈកម្មាធិការនាយកគណបក្សភ្លើងទៀន បន្ទាប់ពីលោកបានចេញវីដេអូទទួលស្គាល់កំហុសលើការរិះគន់ការរៀបចំការប្រកួតកីឡាអាស៊ីអាគ្នេយ៍(ស៊ីហ្គេម)លើកទី៣២ ឆ្នាំ ២០២៣ និងសុំទោសលោកនាយករដ្ឋមន្ត្រី ហ៊ុន សែន ជាសាធារណៈព្រមទាំងស្នើសុំចូលរួមជាមួយគណបក្សប្រជាជនកម្ពុជាផងដែរ។
យោងតាមលិខិតសុំដកពាក្យបណ្តឹងរបស់លោកវិចសុវាចាមេធាវីរាជរដ្ឋាភិបាលចុះថ្ងៃទី ១៣ ខែមិថុនា បានឱ្យដឹងថា ឈ្មោះ ស សាឡុងដេត បានចេញវីដេអូសុំទោសទទួលស្គាល់កំហុសចំពោះអំពើរបស់ខ្លួនដែលបាននិយាយជាមួយសមាជិក សមាជិកាគណបក្សភ្លើងទៀនដែលធ្វើឱ្យមតិជាតិ-អន្តរជាតិយល់ច្រឡំលើគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ឆ្នាំ២០២៣ (គ.ជ.ប.អ.)។
លោកវិច សុវាចា បានលើកឡើងតាមរយៈលិខិតនេះថា៖ «ដោយសារមានការសុំទោសនិងទទួលស្គាល់កំហុសពីឈ្មោះ ស សាឡុងដេត ក្នុងនាមមេធាវីការពារនិងតំណាងឱ្យគ.ជ.ប.អ. សូមធ្វើការដកពាក្យបណ្តឹងលើសំណុំរឿងព្រហ្មទណ្ឌលេខ៣១៧៣ ចុះថ្ងៃទី១២ ខែមិថុនា ឆ្នាំ២០២៣ របស់អយ្យការអមសាលាដំបូងរាជធានីភ្នំពេញពីពេលនេះតទៅ»។
តាមរយៈឃ្លីបវីដេអូដែលមានរយៈពេលជាង២នាទីរបស់លោក ស សាឡុងដេត ដែលបានផ្ញើជូនលោកនាយករដ្ឋន្ត្រីហ៊ុន សែនលោកបានសូមទោសរាជរដ្ឋាភិបាលក៏ដូចជាលោកនាយករដ្ឋមន្ត្រីពាក់ព័ន្ធនឹងការនិយាយរិះគន់របស់លោកលើការរៀបចំការប្រកួតកីឡាអាស៊ីអាគ្នេយ៍លើកទី៣២ នៅក្នុងកិច្ចប្រជុំក្រុមប្រឹក្សាសង្កាត់របស់គណបក្សភ្លើងទៀននៅរាជធានីភ្នំពេញបានធ្វើឱ្យមតិជាតិនិងអន្តរជាតិមានការយល់ច្រឡំ។
លោកបានថ្លែងថា៖«ខ្ញុំសូមអភ័យដល់រាជរដ្ឋាភិបាលទាំងមូលដែលបាននិយាយជ្រុលហួសនិងខ្ញុំសូមអភ័យទោសសម្តេចតេជោចំពោះអ្វីដែលខ្ញុំបាននិយាយកន្លងមក»។
លោក ស សាឡុងដេត បានបន្តថា៖ «ក្នុងនាមខ្ញុំជាប្រធានគណៈកម្មការប្រតិបត្តិរាជធានីភ្នំពេញក៏ដូចជាសមាជិកគណៈកម្មការនាយករបស់គណបក្សភ្លើងទៀនចាប់ពីពេលនេះទៅខ្ញុំលាឈប់ពីគណៈកម្មការនាយកក៏ដូចជាលាឈប់ពីប្រធានប្រតិបត្តិគណបក្សភ្លើងទៀនរាជធានីភ្នំពេញក៏ដូចជាការផ្តាច់ខ្លួនពីបុគ្គលសម រង្ស៊ីចាប់ពីពេលនេះតទៅ»។
ជាមួយគ្នានេះលោកក៏បានស្នើសុំលោកនាយករដ្ឋមន្ត្រីហ៊ុនសែនដែលជាប្រធានគណបក្សប្រជាជនកម្ពុជាចូលរួមជីវភាពនយោបាយជាមួយគណបក្សប្រជាជនកម្ពុជាដើម្បីមានឱកាសបម្រើការងារប្រទេសជាតិចាប់ពីពេលនេះតទៅផងដែរ។
ក្រោយពីទទួលបានវីដូអូឃ្លីបនេះភ្លាមលោកនាយករដ្ឋមន្ត្រីហ៊ុនសែនបានសរសេរលើបណ្តាញតេឡេក្រាមរបស់លោកថា៖ «ដោយដឹងនូវកំហុសលោកស សាឡុងដេតបានធ្វើការសុំទោស ដោយសាមីខ្លួនបានដឹងកំហុសនិងបានសុំទោសជាសាធារណៈខ្ញុំស្នើសុំដល់ក្រសួងយុត្តិធម៌ធ្វើការជាមួយដើមបណ្តឹងនិងតុលាការដើម្បីបញ្ចប់រឿងក្តីនេះតាមវិធីដែលអាចធ្វើទៅបានដូចជាការដកពាក្យបណ្តឹងឬលើកលែងការចោទប្រកាន់»។
សូមរំឭកថាមុនឈានដល់ការលើកលែងការចោទប្រកាន់នេះនៅក្នុងពិធីសំណេះសំណាលជាមួយកម្មករនៅខណ្ឌពោធិ៍សែនជ័យ កាលពីថ្ងៃទី១៣ ខែមិថុនា លោក ហ៊ុនសែនបានប្រកាសហៅលោកស សាឡុងដេត ឱ្យមកផ្ទះវិញជាបន្ទាន់ ក្រោយពេលបុគ្គលរូបនេះព្យាយាមរត់ទៅប្រទេសថៃតាមច្រកអន្តរជាតិថ្មដារព្រំប្រទល់ខេត្តពោធិ៍សាត់និងច្រកចាំយាមខេត្តកោះកុង។
ជាមួយគ្នានោះលោកនាយករដ្ឋមន្ត្រីក៏បានដាក់បទបញ្ជាឱ្យអាជ្ញាធរមានសមត្ថកិច្ចកម្ពុជា ត្រូវចាប់ខ្លួនព្រោះបុគ្គលនេះ មានដីកាតុលាការ បើសិនរូបគេមិនព្រមត្រឡប់មកផ្ទះវិញដោយខ្លួនឯង។
សូមរំឭកដែរថា គណៈកម្មាធិការជាតិរៀបចំការប្រកួតកីឡាស៊ីហ្គេមអាគ្នេយ៍លើកទី៣២ ឆ្នាំ២០២៣ បានចោទ លោកស សាឡុងដេត បាននិយាយជាសាធារណៈក្នុងកិច្ចប្រជុំថា៖ «ស៊ីហ្គេម រៀបចំដោយ គ.ជ.ប.អ ទាំងមូលមិនដែលបានបង្ហាញពីវប្បធម៌ ពីប្រពៃណី បង្ហាញពីសក្តានុពលនៃវប្បធម៌សេដ្ឋកិច្ចរបស់ជាតិខ្មែរទេ និងមានមនុស្សតែប៉ុន្មាននាក់ប៉ុណ្ណោះបានទៅមើល និងអ្វីៗជារឿងក្លែងក្លាយទាំងអស់»។
ការលើកឡើងដូចនេះ ត្រូវបានគ.ជ.ប.អ ឆ្លើយតបវិញថា ជាការចោទប្រកាន់បំផ្លើសខុសពីការពិតទាំងស្រុង៕
