ផ្សោតកំពុងហែលទឹកនៅអន្លង់កាំពី កាលពីថ្ងៃទី១៥ មិថុនា។ រូបថត ក្រសួងកសិកម្ម
ភ្នំពេញៈក្រសួងកសិកម្ម រុក្ខាប្រមាញ់ និងនេសាទ បានប្រកាសនៅល្ងាចថ្ងៃទី១៥ មិថុនា ថា ក្រុមស្រាវជ្រាវ នៃខណ្ឌរដ្ឋបាលជលផល ខេត្តក្រចេះ និងស្ទឹងត្រែង រដ្ឋបាលជលផល និងអង្គការ WWF បានកត់ត្រា កូនផ្សោតថ្មី ១ ក្បាល ទៀត នៅថ្ងៃទី១៥ មិថុនា បន្ទាប់ពីទទួលបានព័ត៌មានពីឆ្មាំទន្លេប្រចាំការនៅ អន្លង់កាំពី។
ក្រសួងកសិកម្ម បានបញ្ជាក់ថា ក្រុមការងារ បានប្រទះឃើញកូនផ្សោតនេះ តាមរយៈរូបថតដែលថតបាន នៅម៉ោង ១៣ និង ៣០ នាទីរសៀល នាថ្ងៃទី១៥ ខែមិថុនា ឆ្នាំ២០២៣ នៅចំណុចអន្ទង់វៀននៃអន្លង់កាំពី ភូមិកាំពី ឃុំសំបុក្រ ស្រុកចិត្របុរី ខេត្តក្រចេះ។
តាមការអង្កេត កូនផ្សោតទើបកើតថ្មីនេះ មានអាយុប្រមាណ ៥ ថ្ងៃ កំពុងហែលជាមួយផ្សោតពេញវ័យចំនួន ៥ ក្បាលទៀត។
ជាការកត់សម្គាល់ នេះជាកូនផ្សោតទី៤ ហើយ ដែលបានកត់ត្រាចាប់តាំងពីខែមករា ដល់ខែមិថុនា ឆ្នាំ២០២៣។
បើតាមក្រសួងកសិកម្ម ក្នុងឆ្នាំ២០២២ ក្រុមការងារបានកត់ត្រាកូនផ្សោតបានចំនួន ៦ ក្បាល និងនៅឆ្នាំ២០២១ ក្រុមការងារបានកត់ត្រាកូនផ្សោតបានចំនួន ៦ ក្បាល៕
