ស្ថានីយប្រព្រឹត្តិកម្មទឹកកខ្វក់ក្រុងកំពង់ចាម ដែលអាចផ្ទុកទឹកកខ្វក់ ៥ ០០០ ម៉ែត្រគុបក្នុង ១ ថ្ងៃ និងតភ្ជាប់បណ្តាញទឹកទៅកាន់ជិត ៤ ០០០ កន្លែង ចាប់ផ្តើមសាងសង់
កំពង់ចាមៈ ស្ថានីយប្រព្រឹត្តិកម្មទឹកកខ្វក់នៅក្រុងកំពង់ចាម ដែលមានសមត្ថភាពផ្ទុកទឹកកខ្វក់ចំនួន ៥ ០០០ ម៉ែត្រគុប ក្នុង ១ ថ្ងៃ និងតភ្ជាប់បណ្តាញទឹកកខ្វក់តាមផ្ទះ និងអគារការិយាល័យផ្សេងៗចំនួនជិត ៤ ០០០ កន្លែងបានចាប់ផ្តើមសាងសង់ហើយ កាលពីថ្ងៃទី១៦ ខែមិថុនា។
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានធ្វើជាអធិបតីក្នុងពិធីបើកការដ្ឋានអនុគម្រោងសាងសង់ប្រព័ន្ធលូ និងស្ថានីយប្រព្រឹត្តិកម្មទឹកកខ្វក់ ក្រុងកំពង់ចាមនេះ ក្រោមគម្រោងអភិវឌ្ឍន៍ក្រុងរបៀងមហាអនុតំបន់មេគង្គជំហានទី៤។
ហ្វេសប៊ុកក្រសួងសាធារណការ និងដឹកជញ្ជូនបញ្ជាក់នាថ្ងៃទី១៦ ខែមិថុនា ថា៖ «ហេដ្ឋារចនាសម្ព័ន្ធនៃអនុគម្រោងសាងសង់ប្រព័ន្ធលូ និងស្ថានីយប្រព្រឹត្តិកម្មទឹកកខ្វក់ដែលបើកការដ្ឋាននាឱកាសនេះរួមមាន ការតភ្ជាប់បណ្តាញទឹកកខ្វក់តាមផ្ទះ និងអគារការិយាល័យផ្សេងៗចំនួន ៣ ៩៦៥ កន្លែង ប្រព័ន្ធបណ្តាញទុយោប្រមូលមេ និងរងប្រវែង ៥១ គីឡូម៉ែត ស្ថានីយបូមមេ និងរងចំនួន ៣ កន្លែង ស្ថានីយប្រព្រឹត្តិកម្មទឹកកខ្វក់ចំនួន ១ កន្លែងមានសមត្ថភាពផ្ទុកទឹកកខ្វក់ចំនួន ៥ ០០០ ម៉ែត្រគុបក្នុង ១ ថ្ងៃ »។
ក្រសួងបន្តថា ក្រៅពីនេះ ក៏មានប្រព័ន្ធលូរំដោះទឹកភ្លៀង រួមមាន លូបង្ហូររៀបថ្មរាងអក្សរ V ប្រវែង ២ ៩២៩ ម៉ែត្រ លូបេតុងប្រអប់ប្រវែង ៩០៣ ម៉ែត្រ លូបេតុងបូលប្រវែង ២៤៤ ម៉ែត្រ លូបេតុងរាងអក្សរ U ប្រវែង ៨៩,៩ ម៉ែត្រ កន្លែងបង្ហូរចេញចំនួន ១ កន្លែង និងស្ថានីយបូមចំនួន ១ កន្លែង។
គម្រោងនេះ ទទួលបានកម្ចីឥណទានសម្បទានពីធនាគារអភិវឌ្ឍន៍អាស៊ី (ADB)។ ក្រសួងសាធារណការ និងដឹកជញ្ជូន គឺជាអង្គភាពគ្រប់គ្រងគម្រោង និងបានចាប់ផ្តើមអនុគម្រោងសាងសង់ប្រព័ន្ធលូ និងស្ថានីយប្រព្រឹត្តិកម្មទឹកកខ្វក់នេះឡើង ក្នុងក្រុងកំពង់ចាម។ គម្រោងថវិកាសាងសង់មានប្រមាណ ២២ លានដុល្លារអាមេរិក ដែលចាប់ផ្តើមការងារសាងសង់កាលពីខែធ្នូ ឆ្នាំ២០២២ និងគ្រោងនឹងបញ្ចប់ការងារសាងសង់នៅខែធ្នូ ឆ្នាំ២០២៥៕
