លោកនាយករដ្ឋមន្ត្រី ហ៊ុន សែន ពេលជួបកម្មករនៅតំបន់ព្រៃស្ពឺ នៅថ្ងៃទី ២៨ មិថុនា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានលើកឡើងថា អ្នកជាប់ពន្ធនាគារណាក៏ដោយដែលមានអន្តរាគមន៍ពីបរទេស ត្រូវជាប់ពន្ធនាគារឱ្យគ្រប់ថ្ងៃ ដោយមិនមានការបន្ធូរបន្ថយទោសទេ ដើម្បីទប់ស្កាត់ការជ្រៀតជ្រែកពីបរទេសចូលកិច្ចការផ្ទៃក្នុងកម្ពុជា។
លោក ហ៊ុន សែន បានបញ្ជាក់ថា៖ «មូលហេតុដែលមនុស្សហ្នឹងជាប់គុកដោយសារអ្នកទាំងឡាយស្រឡាញ់អ្នកពិរុទ្ធជនពេក។ គេកំពុងស្រាវជ្រាវមនុស្សហ្នឹងឃុបឃិតជាមួយបរទេស បរទេសនាំគ្នាទៅសួរសុខទុក្ខ។ ហ្អា! សួរទៅ!រួចហើយនាំមនុស្សហ្នឹងចូលទៅតាមស្ថានទូត។ លោកឯងចាប់ដៃជាន់ជើងខ្ញុំ។ រឿងអីខ្ញុំទៅទុកចិត្តលោកឯង។ ខ្ញុំមិនលើកលែងទោសឱ្យមនុស្សហ្នឹងដោយសារខ្ញុំអត់ទុកចិត្តបរទេសដែលមានបំណងបំផ្លាញខ្ញុំ។ ម៉ោងនេះធ្វើអីខ្ញុំ! ខ្ញុំមិននិយាយឌឺឱ្យអ្នកឯងទេ»។
លោកបានបន្តថា៖ «ក៏ប៉ុន្ដែចាប់ពីម៉ោងនេះទៅ ឱ្យសារទៅអ្នកឯង អ្នកណាក៏ដោយដែលមានអន្តរាគមន៍របស់បរទេសជាប់គុកឱ្យគ្រប់ថ្ងៃ អត់មានការបន្ធូរបន្ថយ ហើយកុំដាក់ចូលទៅក្នុងបញ្ជីការបន្ធូរបន្ថយ និងលើកលែងទោសឱ្យសោះ ឱ្យតែមានបរទេសលូកដៃដើម្បីយើងទប់ស្កាត់អាការជ្រៀតជ្រែកពីបរទេសចូលស្រុកខ្មែរ»។
ក្នុងពិធីជួបសំណេះសំណាលជាមួយកម្មករនៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញនៅថ្ងៃទី ២៨ ខែមិថុនា លោក ហ៊ុន សែន លើកឡើងថា បើអ្នកមានសញ្ជាតិ ២ ហើយនៅពេលមកកម្ពុជាត្រូវអនុវត្តតាមច្បាប់កម្ពុជា មិនមែនតាមច្បាប់បរទេសទេ ហើយថា «ខ្ញុំគិតថា មិត្តបរទេសទាំងឡាយដកពិសោធបានហើយ។ ថ្ងៃក្រោយរាងចាល»។
កញ្ញា សេង ធារី អតីតអ្នកច្បាប់ និងជាអ្នកធ្វើការខាងការពារសិទ្ធិមនុស្សដែលមានសញ្ជាតិខ្មែរ-អាមេរិកាំងត្រូវបានសមត្ថកិច្ចចាប់ខ្លួននៅមុខសាលាដំបូងរាជធានីភ្នំពេញ និងបានយកទៅឃុំខ្លួននៅពន្ធនាគារព្រៃសភ្លាមៗ កាលពីថ្ងៃទី ១៤ ខែមិថុនា ឆ្នាំ ២០២២ បន្ទាប់ពីតុលាការចេញសាលក្រមផ្ដន្ទាទោសឱ្យជាប់ពន្ធនាគារ ៦ ឆ្នាំ ក្នុងសំណុំរឿងរួមគំនិតក្បត់ពាក់ព័ន្ធនឹងគម្រោងធ្វើមាតុភូមិនិវត្តន៍របស់លោក សម រង្ស៊ី នាថ្ងៃទី ៩ វិច្ឆិកា ឆ្នាំ ២០១៩។
កញ្ញា សេង ធារី ត្រូវបានបញ្ជូនពីភ្នំពេញទៅឃុំខ្លួននៅពន្ធនាគារខេត្តព្រះវិហារពីថ្ងៃទី ១៥ ខែមិថុនា ឆ្នាំមុន ក្រោមហេតុផលបារម្ភពីបញ្ហាសន្តិសុខសណ្តាប់ធ្នាប់។
លោក ហ៊ុន សែន បន្ថែមថា៖ «ឥឡូវការជាក់ស្តែង អប្សរាក្បាលត្រងោលយកទៅដាក់គុកនៅព្រះវិហារ ហើយថ្ងៃមុននោះគេទៅសួរសុខទុក្ខ គេបញ្ជូនសារចេញមកចង់ធ្វើកូដកម្មទៀត។ នាងឯងធ្វើកូដកម្មអត់អាហារចង់ងាប់ចង់ស្អីក៏ទៅតាមចិត្តខ្លួនឯងទៅ!បញ្ជូនសារចេញមក យើងយកបានសារហ្នឹងតើ!ខ្ញុំបានមើលសារហ្នឹងដែរតើ!»។
លោកថ្លែងថា៖ «គេចង់ធ្វើកូដកម្មទៀត។ អើ!បើវាចង់អត់បាយឱ្យវាអត់ទៅ! វាមិនមែនពោះរបស់យើងឯណា!មុននោះម៉ែហ្អើយ! វាមិនដែលម៉ែអាណាកោរត្រងោលហើយ លេងពាក់អប្សរាដើរតាមផ្លូវ!អាហ្នឹងបានខ្ញុំហៅអប្សរាក្បាលត្រងោល។ មិនទាន់ដល់ម៉ោងទេនាង!ដល់ម៉ោង វ៉ៃខ្នោះគ្រឹប! គ្មានបរទេសណាមកជួយនាងឯងកើតទេ។ កុំចាត់ទុកថា អីសំណុំរឿងរសើប វាប៉ះពាល់ជាមួយប្រទេសនេះ ប្រទេសនោះ។ អត់ទេ! ជនជាតិខ្មែរតើ! ទោះបីបរទេសមកធ្វើកំហុសនៅស្រុកខ្មែរក៏ខ្មែរមានសិទ្ធិកាត់ទោសដាក់គុកនៅស្រុកខ្មែរដែរ!និយាយគ្នាឱ្យច្បាស់»។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជាបានប្រាប់ភ្នំពេញប៉ុស្តិ៍នៅថ្ងៃទី ២៨ ខែមិថុនាថា កម្ពុជាមានអធិបតេយ្យរបស់ខ្លួន និងមានអំណាច ៣ ដាច់ដោយឡែកគ្នា គឺអំណាចនីតិប្រតិបត្តិ នីតិប្បញ្ញត្តិ និងតុលាការ។ ប្រសិនបើជនណាមួយមានទោសទណ្ឌនៅកម្ពុជា កម្ពុជាមានលទ្ធភាព និងអធិបតេយ្យក្នុងការកំណត់ទោស និងអនុវត្តច្បាប់របស់ខ្លួន។
លោកថ្លែងថា៖ «អ៊ីចឹងប្រសិនបើមានប្រទេសណាមួយមកលូកលាន់ទៅលើការអនុវត្តច្បាប់នេះមានន័យថា កកូរកកាយផ្ទៃក្នុងរបស់កម្ពុជាហើយ ដូចករណីដែលសម្ដេចនាយករដ្ឋមន្ត្រីបានលើកទៅលើអ្នកទោសមួយចំនួននោះ។ អ៊ីចឹងនេះជារឿងត្រឹមត្រូវនៅក្នុងការការពារអធិបតេយ្យរបស់ខ្លួន»៕
