មន្ដ្រីជំនាញពេលកំពុងប្រើប្រាស់ឧបករណ៍ Magnetometer សម្រាប់ស្កេនមើលសំណល់វត្ថុបុរណក្នុងដីនៅតំបន់អង្គរកាលពីថ្ងៃទី២៨ មិថុនា ។ រូបថត អាជ្ញាធរជាតិអប្សរា
សៀមរាបៈ ក្រុមការងារបច្ចេកទេសនៃអាជ្ញាធរជាតិអប្សរាកាលពីថ្ងៃទី ២៨ ខែមិថុនា ឆ្នាំ ២០២៣ បានប្រកាសឱ្យដឹងពីការរកឃើញទីតាំងស្ថានីយស្លដែកបុរាណថ្មីមួយនៅក្នុងតំបន់ឧទ្យានអង្គរ។
ការប្រកាសនេះបានធ្វើឡើងបន្ទាប់ពីក្រុមការងារបច្ចេកទេសនៃអាជ្ញាធរជាតិអប្សរា សហការជាមួយក្រុមបុរាណវិទូនៃសាកលវិទ្យាល័យហាវ៉ៃ (University of Hawaii) និងសាកលវិទ្យាល័យហ្វ្លីនដឺរស៍ (Flinders University) នៃប្រទេសអូស្ត្រាលីតាមរយៈការប្រើប្រាស់ឧបករណ៍ Magnetometer បានស្កេនរកឃើញបំណែកជើងក្រានឡស្លដែក និងសំណល់អាចម៍ដែកជាច្រើននៅក្នុងតំបន់គោកអាចម៍ដែក ឬគោកដើមត្នោតដែលមានទីតាំងស្ថិតនៅក្បែរភ្នំបូក ក្នុងភូមិស្រែចង្ហូត ឃុំរុនតាឯក ស្រុកបន្ទាយស្រី ខេត្តសៀមរាប។
លោក អ៊ឹម សុខរិទ្ធី ប្រធាននាយកដ្ឋានស្រាវជ្រាវ បណ្តុះបណ្តាល និងផ្សព្វផ្សាយនៃអាជ្ញាធរជាតិអប្សរាបានបញ្ជាក់ថា៖«តាមរយៈឧបករណ៍ Magnetometer ក្រុមអ្នកស្រាវជ្រាវបានរកឃើញភ័ស្តុតាងមួយចំនួនដូចជា សំណល់អាចម៍ដែក បំណែកជើងក្រាន ដែលបញ្ជាក់ថា ទីតាំងគោកអាចម៍ដែក គឺជាស្ថានីយឡស្លដែកបុរាណដ៏សំខាន់មួយ ក្នុងរាជធានីអង្គរ នាសម័យបុរាណ» ។
បើតាមលោក សុខរិទ្ធី ក្រៅពីការស្កេនរកឃើញវត្ថុតាងទាំងនេះ ក្រុមអ្នកស្រាវជ្រាវ ក៏ទទួលបានព័ត៌មានផ្សេងៗដែលឆ្លុះបញ្ចាំងពីទំនៀមទម្លាប់ប្រពៃណីរបស់ភូមិក្នុងតំបន់នេះផងដែរថា ជារឿយៗពួកគេបាននាំគ្នាយកសំណល់អាចម៍ដែកពីស្ថានីយនេះទៅកិនធ្វើជាថ្នាំព្យាបាលរបួស ជំងឺតាអក ជំងឺខាន់លឿងនិងជំងឺផ្សេងៗទៀត។
លោកបានបន្តថា កន្លងមកក្រុមបុរាណវិទូបានស្រាវជ្រាវរកឃើញស្ថានីយជើងក្រានស្លដែកបុរាណនៅភាគខាងកើតឆ្ងាយពីរាជធានីអង្គរ ដូចជា ស្ថានីយស្លដែកនៅភ្នំដែក ខេត្តព្រះវិហារ ស្ថានីយស្លដែកនៅតំបន់ខ្វាវក្នុងស្រុកជីក្រែង និងស្ថានីយស្លដែកនៅភូមិគោលក្នុងស្រុកអង្គរជុំខេត្តសៀមរាប។ « ប៉ុន្តែពេលនេះយើងបានសិក្សាស្រាវជ្រាវរកឃើញស្ថានីយស្លដែក នៅក្នុងឧទ្យានអង្គរតែម្តង»។
លោកបានបន្ដថា តាមរយៈការសិក្សាស្រាវជ្រាវកន្លងមក តំបន់ភ្នំបូកគឺជាទីតាំងឡស្លដែកដ៏ធំមួយនាសម័យអង្គរ។ ក្នុងនោះគេបានរកឃើញមានសំណល់បំណែកចង្ក្រានស្លដែកនិងសំណល់អាចម៍ដែកជាច្រើននៅលើទីតាំងចំនួន៣កន្លែងដែលបង្ហាញថា រាជធានីអង្គរពីសម័យបុរាណ មានការរីកចម្រើនខ្លាំងនូវឧស្សាហកម្មស្លដែកក្នុងការផ្គត់ផ្គង់តម្រូវការលោហៈសម្រាប់ផលិតជាសម្ភារប្រើប្រាស់ក្នុងផ្ទះ សម្ភារកសិកម្ម អាវុធយុទ្ធភណ្ឌ និងសម្ភារប្រើប្រាស់ផ្សេងៗទៀតសម្រាប់ប្រជាជនប្រហែល៨០ម៉ឺននាក់ក្នុងរាជធានីអង្គរនាសម័យបុរាណ៕
