មន្ត្រីកាកបាទក្រហមកម្ពុជា និងក្រុមគ្រូពេទ្យនៅមន្ទីរពេទ្យជ័យវរ្ម័នទី៧ កន្លងមក។ រូបថត Jayavarman VII Hospital page
សៀមរាបៈ មូលនិធិគន្ធបុប្ផាកម្ពុជា និងមូលនិធិគន្ធបុប្ផាស្វ៊ីស បានសម្រេចពង្រីកបន្ទប់សម្រាលកូនបន្ថែមទៀតនៅមន្ទីរពេទ្យជ័យវរ្ម័នទី៧ ក្នុងខេត្តសៀមរាប ខណៈបច្ចុប្បន្នស្ត្រីមានផ្ទៃពោះមកពីបណ្តាខេត្តនានា បន្តមកទទួលសេវាសម្រាលកូនដោយឥតគិតថ្លៃចន្លោះពី ៥០ ទៅ ៧០ នាក់ ក្នុង ១ ថ្ងៃ។
ថ្លែងក្នុងកម្មវិធីឥស្សរជនឆ្នើមថ្នាក់ជាតិលើកទី៤២ ប្រចាំខែមិថុនា ឆ្នាំ២០២៣ ស្តីពី «ការផ្តល់សេវាសុខភាពមាតា ទារក និងកុមារ និងស្ត្រីឆ្លងទន្លេ នៅមន្ទីរពេទ្យកុមារគន្ធបុប្ផា និងការជួយគាំទ្រពីកាកបាទក្រហមកម្ពុជា»លោក យ៉ៃ ចន្ទនា ប្រធានមន្ទីរពេទ្យជ័យវរ្ម័នទី៧ បានលើកឡើងកាលពីថ្ងៃទី៣០ មិថុនាថា តាមការសង្កេតឃើញថា បច្ចុប្បន្នប្រជាជនមានការយល់ដឹងច្រើនពីការថែទាំសុខភាពមាតា និងទារក។
លោកបន្តថា ក្នុងនោះឃើញថា ស្ត្រីមុនពេលសម្រាលកូនបានទៅជួបគ្រូពេទ្យឯកទេសផ្នែកសម្ភពបាន៦ទៅ៨ដង ដើម្បីពិនិត្យមើលសុខភាពម្តាយនិងទារក្នុងផ្ទៃ ដើម្បីដឹងថាត្រូវលេបថ្នាំអ្វីខ្លះ និងចាក់ថ្នាំការពារតេតាណូសជាដើម។
ពាក់ព័ន្ធការបើកផ្នែកសម្ភពនៅមន្ទីរពេទ្យជ័យវរ្ម័នទី៧វិញ លោកយ៉ៃ ចន្ទនា បានឱ្យដឹងដែរថា គឺដើម្បីកាត់ផ្តាច់ការឆ្លងមេរោគអេដស៍ពីម្តាយទៅកូនប្រកបដោយបច្ចេកទេសនៃការថែទាំ និងសម្រាលកូនត្រឹមត្រូវ។
លោកថ្លែងថា៖«ក្នុងនោះការឱ្យទឹកដោះគោទៅកូនបៅ ដើម្បីទប់ស្កាត់ការឆ្លង រហូតដល់បច្ចុប្បន្នពុំមានករណីឆ្លងមេរោគអេដស៍ពីម្តាយទៅកូនទេ ដោយសារយើងធ្វើស្របតាមកម្មវិធីជាតិ ក្នុងការព្យាបាលមេរោគអេដស៍ម្តាយមុនពេលសម្រាលកូន»។
ទន្ទឹមនេះ ដោយសង្កេតឃើញកំណើនស្ត្រីមានផ្ទៃពោះមកទទួលសេវាពិនិត្យនិងសម្រាលដោយឥតគិតថ្លៃខាងមូលនិធិគន្ធបុប្ផាកម្ពុជា និងមូលនិធិគន្ធបុប្ផាស្វ៊ីស សម្រចពង្រីកគ្រែបន្ថែមទៀត។
លោកបានបញ្ជាក់ថា៖«ជារៀងរាល់ថ្ងៃផ្នែកសម្ភពមានស្ត្រីមកពិនិត្យផ្ទៃពោះយ៉ាងតិច ៣០០ទៅ៥០០នាក់ ហើយសម្រាលកូនជាមធ្យម៥០ ទៅ៧០នាក់ ថ្ងៃខ្លះសម្រាលកូនដល់១០០នាក់រហូតដល់ ២៤ម៉ោងក៏មាន»។
លោកបន្តថា ស្ត្រីដែលមកសម្រាលកូននៅមន្ទីរពេទ្យនេះ មកពីជុំវិញខេត្តសៀមរាប កំពង់ធំ បន្ទាយមានជ័យ និងខេត្តព្រះវិហារ ជាពិសេសស្ត្រីមានផ្ទៃពោះដែលមានជំងឺទឹកនោមផ្អែម លើសឈាម បេះដូង ពកក និងជំងឺហូរឈាម ដែលមានហានិភ័យខ្ពស់ ហើយក៏មានស្រី្តខ្លះបញ្ជូនមកពីគ្លីនិកឯកជន មណ្ឌលសុខភាព និងមន្ទីរពេទ្យបង្អែកមួយចំនួនដែលជាករណីស្មុគស្មាញផងដែរ។
បើតាមប្រធានមន្ទីរពេទ្យ រាល់ស្ត្រីដែលសម្រាលកូនរួចអាចស្នាក់នៅមន្ទីរពេទ្យបានតែ២៤ម៉ោង ក្រោយពិនិត្យសុខភាពឃើញថា ល្អ ដោយសារទីតាំងចង្អៀត លើកលែងតែករណីសម្រាលកូនដោយការវះកាត់ដែលត្រូវស្នាក់នៅបន្តរយៈពេល១សប្តាហ៍ឬ២សប្តាហ៍។
ពាក់ព័ន្ធនឹងការចូលរួមបង្ការចម្លងមេរោគអេដស៍ពីម្តាយទៅកូនវិញ លោកឱ្យដឹងថា ស្រី្តមានផ្ទៃពោះដែលផ្ទុកមេរោគអេដស៍នៅក្នុងឆ្នាំ២០២០ ចំនួន៧៥នាក់ ក្នុងចំណោមស្ត្រីមកសម្រាលកូន២៣ ៧៧៥នាក់ បានសម្រាលកូនស្មើ០,៣១ ភាគរយ។
ក្នុងឆ្នាំ២០២១ មាន៥៨នាក់ ក្នុងចំណោមស្ត្រីមកសម្រាលកូន ១៧ ៩២៦នាក់ ស្មើ ០,៣២ ភាគរយ និងឆ្នាំ២០២២ មានចំនួន៥៧នាក់ ក្នុងចំណោមស្ត្រីមកសម្រាលកូន ១៨ ០៦៦នាក់ ស្មើ០,៣០ភាគរយ ។ ចំណែករយៈពេល៦ខែ ក្នុងឆ្នាំ២០២៣ មានស្ត្រីសម្រាលកូនបានចំនួន ១០ ០៦២នាក់ ក្នុងនោះស្ត្រីផ្ទុកមេរោគអេដស៍មានចំនួន៣១នាក់។
ដោយឡែកលោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានថ្លែងអំណរគុណ និងកោតសរសើរដល់ថ្នាក់ដឹកនាំ ក្រុមគ្រូពេទ្យ និងបុគ្គលិកគ្រប់ផ្នែកនៃមន្ទីរពេទ្យកុមារអង្គរដែលបានខិតខំបំពេញការងារតាមជំនាញរៀងៗខ្លួន ដើម្បីផ្តល់សេវាសុខាភិបាលដល់កុមាររាប់ម៉ឺននាក់។
លោកស្រីថ្លែងថា៖«នេះជាការរួមចំណែកយ៉ាងធំធេងជាមួយរាជរដ្ឋាភិបាល ក្នុងការលើកកម្ពស់សុខភាពទារក កុមារ និងយុវវ័យ ដែលជាទំពាំងស្នងឫស្សី»។
សូមរំឭកដែរថា ដើម្បីផ្សព្វផ្សាយឱ្យកាន់តែទូលំទូលាយស្តីពីមេរោគអេដស៍និងជំងឺអេដស៍ រួមទាំងការលើកកម្ពស់សុខភាព មាតា ទារក និងកុមារ លោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា បានសម្រេចបង្កើតឱ្យមាន«កម្មវិធីឥស្សរជនឆ្នើមថ្នាក់ជាតិ» ដែលចាក់ផ្សាយនៅតាមកញ្ចក់ទូរទស្សន៍ជាតិកម្ពុជា (ទទក) ចាប់តាំងពី ឆ្នាំ២០១៩ មក៕
