រថយន្តនៅតាមដងផ្លូវដែលបើកបរបញ្ច្រាសទិសចរាចរណ៍។ រូបថត ក្រសួងសាធារណាការ
ភ្នំពេញៈ ក្រសួងសាធារណការ និងដឹកជញ្ជូន បានក្រើនរំឭកថា ការបើកបរបញ្ច្រាសទិសចរាចរណ៍ ជាការបំពានច្បាប់ចរាចរណ៍យ៉ាងធ្ងន់ធ្ងរ និងថែមទាំងជាការប្រមាថអាយុជីវិតខ្លួនឯង និងអ្នកដទៃទៀតផង ខណៈការស្លាប់និងរងរបួសដោយសារគ្រោះថ្នាក់ចរាចរណ៍នៅតាមដងផ្លូវនៅតែបន្តកើតឡើងជារៀងរាល់ថ្ងៃគួរឱ្យព្រួយបារម្ភ។
ក្រសួងសាធារណការ និងដឹកជញ្ជូន បានជម្រាបប្រាប់ប្រជាពលរដ្ឋថា នៅគ្រប់ស្ថានភាពផ្លូវ យានយន្តគ្រប់ប្រភេទ មិនត្រូវបើកបរបញ្ច្រាសទិសចរាចរណ៍ជាដាច់ខាត ហើយបើយោងតាមមាត្រា ៤៣ ជំពូកទី ៧ នៃច្បាប់ស្ដីពីផ្លូវថ្នល់ ឆ្នាំ ២០១៤ ការបើកបរបញ្ច្រាសទិសចរាចរណ៍ នឹងត្រូវកាត់ ៤ ពិន្ទុ ពីបណ្ណបើកបរ។
ទន្ទឹមនឹងនេះ ក្រសួងបានសំណូមពរយ៉ាងទទូច ដល់ប្រជាពលរដ្ឋ សូមចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន និងចៀសវាងការប្រព្រឹត្តល្មើសនានា ដើម្បីសុវត្ថិភាពពេលធ្វើដំណើរ និងរក្សាបានសណ្តាប់ធ្នាប់ក្នុងទីសាធារណៈដោយ «សូមបើកបរដោយស្មារតីទទួលខុសត្រូវ»។
.jpg)
ជាមួយគ្នានេះ កាលពីថ្ងៃទី ៦ កក្កដា គ្រោះថ្នាក់ចរាចរណ៍ផ្លូវគោកទូទាំងប្រទេសបានបណ្តាលឱ្យមនុស្សស្លាប់ ២ នាក់ រងរបួសធ្ងន់ ៩ នាក់ និងស្រាល ១០ នាក់។
បើតាមនាយកដ្ឋាននគរបាលចរាចរណ៍ និងសណ្តាប់សាធារណៈ នៃអគ្គស្នងការដ្ឋាននគរបាលជាតិ គ្រោះថ្នាក់ចរាចរណ៍ដែលបង្កឱ្យមានមនុស្សស្លាប់ និងរបួសសរុបចំនួន ២១ នាក់ នៅថ្ងៃទី ៦ កក្កដានេះ គឺកើតឡើងដោយសារការប៉ះទង្គិចគ្នាចំនួន ៨ លើក មានកត្តាល្បឿន ៣ លើក មិនគោរពសិទ្ធិ ១ លើក បត់ក្នុងស្ថានភាពគ្រោះថ្នាក់ ១ លើក មិនប្រកាន់ស្តាំ ១ លើក ស្រវឹង ១ លើក និងកត្តាយានយន្ត ១ លើក៕
