សំរាមដបប្លាស្ទិកដែលប្រមូលចេញពីតំបន់បឹងទន្លេសាប។ រូបថត iDE
ភ្នំពេញៈ អង្គការ iDE កម្ពុជា បានដឹកនាំការសាកល្បងលើសកម្មភាពប្រមូលដបប្លាស្ទិកនៅតាមសាលារៀនក្នុងតំបន់បឹងទន្លេសាប ដើម្បីការពារមិនឱ្យមានការបោះចោលដបប្លាស្ទិកទៅក្នុងបរិស្ថាន ហើយក៏បានអំពាវនាវឱ្យមានការចូលរួមពីសាធារណជន ជាពិសេសអ្នករស់នៅលើទឹកក្នុងតំបន់បឹងទន្លេសាប។
ការសាកល្បងនេះ ត្រូវបានធ្វើឡើងបន្ទាប់ពីទទួលបានការគាំទ្រពីអង្គការ Save the Children Cambodia និងទទួលបានមូលនិធិពីសហភាពអឺរ៉ុបតាមរយៈការងារគ្រប់គ្រងសំណល់រឹង និងការរួមចំណែកលុបបំបាត់ការបំពុលបរិស្ថានដោយប្លាស្ទិក ដែលជាផ្នែកមួយនៃគម្រោង បង្កើតបរិស្ថានដែលមានភាពស៊ាំ និងលើកកម្ពស់ការអភិវឌ្ឍសេដកិច្ចសង្គមនៅតំបន់ភាគខាងកើតបឹងទន្លេសាប (GREEN)។
អង្គការ iDE កម្ពុជា បានឱ្យដឹងថា ការប្រមូលដបប្លាស្ទិកនៅតាមសាលារៀន គឺជាសកម្មភាពសហគមន៍ ក្នុងគោលបំណងដើម្បីការពារមិនឱ្យមានការបោះចោលដបប្លាស្ទិកទៅក្នុងបរិស្ថាន និងការពារដបប្លាស្ទិកមិនឱ្យហូរចូលទៅបឹងទន្លេសាបដ៏មានសារៈសំខាន់បំផុតសម្រាប់មនុស្សទាំងអស់គ្នា។ អង្គការនេះ បានឱ្យដឹងបន្តថា ការសាកល្បងនេះ ក៏បានផ្តល់ឱ្យសាលារៀននូវមធ្យោបាយរកចំណូលខ្លះតាមរយៈការលក់ដបប្លាស្ទិកដែលអាចកែច្នៃឡើងវិញបានផងដែរ។
អង្គការ iDE កម្ពុជា បានបញ្ជាក់ថា៖ «បន្ទាប់ពីការសាកល្បងរយៈពេល៦សប្តាហ៍មក ក្រុមការងាររបស់យើងបានជួបជាមួយអ្នកពាក់ព័ន្ធទាំងអស់ រួមទាំងនាយកសាលា លោកគ្រូ អ្នកគ្រូ មេភូមិ ឪពុកម្តាយសិស្ស និងសិស្ស ដើម្បីស្វែងយល់ពីទស្សនៈរបស់ពួកគេទៅលើគំនិតផ្តួចផ្តើមនេះ ការរំពឹងទុករបស់ពួកគេ អ្វីដែលបានកើតឡើងជាក់ស្តែង អ្វីដែលបានប្រព្រឹត្តទៅដោយរលូន និងផ្នែកដែលគួរមានការកែលម្អបន្ថែម ខណៈយើងកំពុងធ្វើការដើម្បីពង្រីកសកម្មភាពនេះទៅកាន់ ភូមិបណ្តែតទឹកផ្សេងៗទៀតជុំវិញបឹងទន្លេសាប»។
អង្គការ iDE កម្ពុជា ក៏ប្រកាសអំពាវនាវសុំការចូលរួមពីសាធារណជន ដើម្បីគាំទ្រដល់សកម្មភាពសហគមន៍បែបនេះ និងធ្វើឱ្យមានការប្រសើរឡើងទាំងអស់គ្នា ដែលអាចរួមគ្នាបង្កើតអនាគតកាន់តែស្អាត និងបៃតងសម្រាប់ភូមិបណ្តែតទឹក និងនៅតំបន់ផ្សេងៗទៀត។
លោក សាត សុខា នាយកសាលាបឋមសិក្សាជលសា ដែលជាសាលាមួយស្ថិតក្នុងតំបន់បឹងទន្លេសាបបាននិយាយថា សាលារៀនលោក កំពុងប្រកាន់ជំហរប្រឆាំង នឹងការបំពុលដោយសំណល់ប្លាស្ទិកនៅក្នុងភូមិបណ្តែតទឹកនៃបឹងទន្លេសាប។ លោក បន្តថា សម្រាប់សកម្មភាពប្រមូលដបប្លាស្ទិករបស់សាលា គឺសិស្សត្រូវបានលើកទឹកចិត្តឱ្យប្រមូលដបទឹកប្លាស្ទិកទាំងនោះពីផ្ទះរបស់ពួកគេ ហើយយកវាទៅសាលារៀនជារៀងរាល់ថ្ងៃ។
លោកបានបញ្ជាក់ថា៖«ឥឡូវនេះសាលារៀន គឺជាកន្លែងប្រមូល និងទុកដាក់ដបទឹកប្លាស្ទិកទាំងនោះ ហើយ អ្នកទិញអេតចាយ និងមកប្រមូលដបប្លាស្ទិកនេះពីសាលា។ កិច្ចសហការរវាងសាលា និងអ្នកទិញអេតចាយ ក៏ត្រូវបានរៀបចំរួចរាល់ផងដែរ។ យើងបានរួមគ្នាកាត់បន្ថយដបប្លាស្ទិកយ៉ាងច្រើនមិនឱ្យហូរចូលបឹងទន្លេសាប ការពារទឹក និងសុខភាពទាំងមនុស្ស និងសត្វក្នុងទឹក»។
ដើម្បីទប់ស្កាត់សំរាមប្លាស្ទិក និងកាកសំណល់មួយចំនួន មិនឱ្យហូរចូលទៅក្នុងបឹងទន្លេសាប និងបង្កើតបរិយាកាសអំណោយផលសម្រាប់ការប្រមូលប្លាស្ទិកប្រកបដោយនិរន្តរភាព អង្គការ iDE និងដៃគូសហការ បាននិងកំពុងអនុវត្តសកម្មភាពជាច្រើន ដូចជាច្នៃឧបករណ៍ប្រមូលសំរាមអណ្តែតទឹក ដែលមានតម្លៃទាប ហៅថា "Biobars" សម្រាប់ស្ទាក់រារាំងសំរាមអណ្តែតទឹកផ្សេងៗ។
អង្គការនេះ ក៏កំពុងបណ្តុះបណ្តាលអ្នកប្រមូលសំរាម លើកកម្ពស់ចំណេះដឹងផ្នែកអាជីវកម្ម និងលើកទឹកចិត្តឱ្យពួកគាត់ប្រមូលសំរាមដែលអាចកែច្នៃឡើងវិញបាន ពីសំណាក់គ្រួសារនានាឱ្យបានកាន់តែប្រសើរ ខណៈការអនុវត្តយុទ្ធនាការផ្លាស់ប្តូរឥរិយាបថ តោះយើងសម្អាតបឹងទន្លេសាប ក៏កំពុងដំណើរការផងដែរ៕
