មន្ដ្រីជំនាញ ពេលកំពុងប្រើឧបករណ៍ស្កេតរកវុត្ថបុរាណក្នុងតំបន់អង្គរ កាលពីថ្ងៃទី ១០ កក្កដា។ រូបថត អាជ្ញាធរជាតិអប្សរា
សៀមរាបៈ អាជ្ញាធរជាតិអប្សរាសហការជាមួយសាកលវិទ្យាល័យហាវ៉ៃ និង Flinders University បានប្រើឧបករណ៍វាស់ស្ទង់រករចនាសម្ព័ន្ធឡដុតកុលាលភាជន៍នៅខ្លោងទ្វារដីឆ្នាំងនៃអង្គរធំ ដោយបានរកឃើញមានឡដុតកុលាលភាជន៍ជាច្រើននៅជ្រុងពាយព្យនាភូមិនគរក្រៅ សង្កាត់គោកចកនៃក្រុងសៀមរាប ខេត្តសៀមរាប។
យោងតាមអាជ្ញាធរជាតិអប្សរានៅថ្ងៃទី ១០ ខែកក្កដា បានឱ្យដឹងថា បណ្តុំក្រុមឡដុតកុលាលភាជន៍ទាំងនោះស្ថិតនៅលើទួលធំវែងមួយកន្លែងដែលលាតសន្ធឹងពីកើតទៅលិចប្រវែង២៣០ម៉ែត្រ និងទទឹងមានប្រវែង៨៤ម៉ែត្រ កម្ពស់ប្រហែល២,៧០ម៉ែត្រ។
ទួលនេះសន្ធឹងស្របគ្នានឹងកំពែងនៃកសិន្ធុទឹកភាគខាងជើងផ្នែកខាងលិចរបស់ខ្លោងទ្វារដីឆ្នាំងនៃអង្គរធំមានចម្ងាយ១២៣ម៉ែត្រពីខ្លោងទ្វារដីឆ្នាំង។
តាមរយៈអាជ្ញាធរជាតិអប្សរា អនុប្រធាននាយកដ្ឋានស្រាវជ្រាវ បណ្តុះបណ្តាល និងផ្សព្វផ្សាយ លោក ទិន ទីណា បានលើកឡើងថា ក្រោយពីបានចុះពិនិត្យផ្ទៀងផ្ទាត់ និងស្រង់ទិន្នន័យបុរាណវិទ្យា ដោយក្រុមអ្នកស្រាវជ្រាវនៃនាយកដ្ឋានស្រាវជ្រាវ បណ្តុះបណ្តាល និងផ្សព្វផ្សាយនៃអាជ្ញាធរជាតិអប្សរា បានរកឃើញថា មានទួលឡដុតកុលាលភាជន៍មានចំនួន២៥ដែលពុំទាន់មានការធ្វើកំណាយស្រាវជ្រាវដើម្បីបញ្ជាក់ថាទីនេះជាអ្វីពិតប្រាកដនៅឡើយទេ។
លោកថា ទួលឡដុតកុលាលភាន៍នេះមិនទាន់មានការធ្វើកំណាយទេ ដោយគ្រាន់តែអ្នកស្រាវជ្រាវមួយចំនួនបានរើសយកអំបែងកុលាលភាជន៍យកទៅសិក្សាតែប៉ុណ្ណោះ។
លោកទិន ទីណា បានបញ្ជាក់ថា ៖ «កាលពីឆ្នាំ២០២០ និងឆ្នាំ២០២២ ក្រុមអ្នកស្រាវជ្រាវនៃអាជ្ញាធរជាតិអប្សរា បានធ្វើកំណាយលើទួលឡនោះចំនួន២ដើម្បីប្រមូលទិន្នន័យដែលអាចឱ្យអ្នកជំនាញបញ្ជាក់ថា ទីតាំងនេះជាអ្វីឱ្យពិតប្រាកដ»។
យោងតាមលទ្ធផលដែលទទួលបានពីការធ្វើកំណាយទាំង២លើកកន្លងមក បានបញ្ជាក់ថា ទីតាំងនេះជាឡដុតកុលាលភាជន៍នៅក្នុងតំបន់អង្គរ ដែលចាប់ដំណើរការតាំងពីពាក់កណ្តាលសតវត្សរ៍ទី១២ និងឈប់ដំណើរការនៅដើមសតវត្សរ៍ទី១៥នៃគ្រិស្តសករាជ។ នេះបើតាមការលោក ទិន ទីណា បន្ថែម។
អ្នកនាំពាក្យអាជ្ញាធរជាតិអប្សរា លោក ឡុង កុសល មិនអាចទាក់ទងសុំព័ត៌មានបន្ថែមបានទេ កាលពីថ្ងៃទី១០ ខែកក្កដា ឆ្នាំ២០២៣។
អាជ្ញាធរជាតិអប្សរាបានបញ្ជាក់ដែរថា ក្រុមអ្នកស្រាវជ្រាវមានគោលបំណងពង្រីកការស្រាវជ្រាវពីបណ្តុំឡដុតកុលាលភាជន៍នេះឱ្យបានវែងឆ្ងាយទៅទៀតដោយថ្មីៗនេះអ្នកស្រាវជ្រាវនៃនាយកដ្ឋានស្រាវជ្រាវ បណ្តុះបណ្តាលនិងផ្សព្វផ្សាយអាជ្ញាធរជាតិអប្សរាបានសហការជាមួយសាកលវិទ្យាល័យហាវ៉ៃ និង Flinders University បានប្រើឧបករណ៍វិទ្យាសាស្ត្រទំនើប។
ការប្រើប្រាស់ឧបករណ៍ទំនើបនេះ ដើម្បីវាស់ស្ទង់រករចនាសម្ព័ន្ធឡដុតកុលាលភាជន៍នៅតំបន់ទ្វារដីឆ្នាំងនៃអង្គរធំនេះ ដោយប្រើឧបករណ៍ Magnetometer ដើម្បីស្វែងរកសញ្ញាណម៉ាញេទិកនៃរចនាសម្ព័ន្ធឡ។
ប្រភពដដែលបានបន្តថា ក្រុមអ្នកស្រាវជ្រាវបានចាត់ទុកថាទិន្នន័យដែលទទួលបានពីការវាស់ស្ទង់នេះ គឺមានសារៈសំខាន់សម្រាប់អ្នកជំនាញយកធ្វើជាមូលដ្ឋានក្នុងការធ្វើកំណាយស្រាវជ្រាវឡដុតកុលាលភាជន៍នៅតំបន់នេះតទៅថ្ងៃមុខទៀត៕
