ភ្នំពេញៈ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និង ទូរគមនាគមន៍ បានពិភាក្សាជាមួយក្រុមហ៊ុនឯកជនបច្ចេកវិទ្យា ដើម្បីអភិវឌ្ឍន៍ធនធានមនុស្សក្នុងវិស័យឌីជីថល នៅប្រទេសកម្ពុជា ឱ្យកាន់តែមានភាពប្រសើរឡើងបន្ថែមទៀត។
ការពិភាក្សានេះ ធ្វើឡើងក្នុងសិក្ខាសាលាផ្សព្វផ្សាយស្តីពី «សមិទ្ធផល និងការងារអភិវឌ្ឍន៍ធនធានមនុស្សក្នុងវិស័យ ឌីជីថល នៅកម្ពុជា» កាលពីថ្ងៃទី១៤ ខែកក្កដា នៅទីស្តីការក្រសួងដោយមានការចូលរួមពីថ្នាក់ដឹកនាំក្រសួង ក្រុមហ៊ុនឯកជនដែលជាប្រតិបតិ្តករ និងភាគីពាក់ព័ន្ធក្នុងវិស័យបច្ចេកវិទ្យាគមនាគមន៍ និងព័ត៌មាន សរុបប្រមាណជាង ៧០ នាក់។
ក្នុងសិក្ខាសាលានោះ ជា វ៉ាន់ដេត បានប្រាប់អ្នកចូលរួមអំពីសមិទ្ធផលរបស់ក្រសួង ដែលសម្រេចបានកន្លងមក ដូចជា ការអភិវឌ្ឍធនធានមនុស្សដើម្បីលើកកម្ពស់ចំណេះដឹងឌីជីថល ការជំរុញការចាប់យកឌីជីថល និងការបង្កើតកម្មវិធីប្រកួតប្រជែង។
លោកក៏បានលើកឡើងពីការកសាងហេដ្ឋារចនាសម្ព័ន្ធតភ្ជាប់ឌីជីថល ការពង្រឹងគុណភាពសេវាទូរស័ព្ទចល័ត ការធ្វើឱ្យសេវាទូរគមនាគមន៍កាន់តែប្រសើរឡើង ដើម្បីឆ្លើយតបទៅនឹងកំណើននៃតម្រូវការប្រើប្រាស់។
ក្រសួងប្រៃសណីយ៍ បញ្ជាក់ក្នុងបណ្តាញសង្គមនាថ្ងៃទី១៥ ខែកក្កដា ថា៖ «ជាមួយគ្នានោះដែរ ឯកឧត្តមរដ្ឋមន្ត្រី បានពិភាក្សាជាមួយក្រុមហ៊ុនឯកជនលើការងារអភិវឌ្ឍន៍ធនធានមនុស្សក្នុងវិស័យឌីជីថល នៅកម្ពុជានាពេលអនាគតឱ្យកាន់តែមានភាពប្រសើរឡើងបន្ថែមទៀត»។
លោករដ្ឋមន្ត្រីបានប្រាប់ក្រុមហ៊ុនបច្ចេកវិទ្យាដែលមានគំនិតអាជីវកម្ម ឬគម្រោងល្អៗសម្រាប់បម្រើដល់វិស័យសាធារណ: និងវិស័យឯកជន អាចដាក់ពាក្យទទួលជំនួយបច្ចេកទេស និងហិរញ្ញវត្ថុពីក្រសួងផងដែរ៕
