សិស្សនៅអង្គការមូលនិធិកុមារកម្ពុជា ស្ថិតនៅសង្កាត់ស្ទឹងមានជ័យ រាជធានីភ្នំពេញ។ ហេង ជីវ័ន
ភ្នំពេញ: លោក ស្កុត នីសុន ស្ថាបនិក និងជានាយកប្រតិបត្តិនៃអង្គការមូលនិធិកុមារកម្ពុជា (CCF) បានប្តេជ្ញាផ្លាស់ប្តូរជីវិតរបស់កុមារជួបការលំបាកនៅក្នុងសហគមន៍ស្ទឹងមានជ័យឱ្យបានប្រសើរឡើង។ ដោយផ្តោតលើការអប់រំ CCF ខិតខំផ្តល់ឱកាស ដល់កុមារដើម្បីរួចផុតពីវដ្តនៃភាពក្រីក្រ និងកសាងអនាគតថ្មីដល់ពួកគេ។ ការអប់រំ គឺជាបេះដូងនៃបេសកកម្មរបស់ CCF ដែលមានគោលបំណងផ្តល់អំណាចដល់កុមារតាមរយៈចំណេះដឹង។
លោក នីសុន ដែលជាអតីតនាយកប្រតិបត្តិហូលីវូដ បានឱ្យដឹងថា៖ «បច្ចុប្បន្នកម្មវិធី CCF គាំទ្រសិស្សសរុបចំនួន ១ ៨០៧ នាក់ដែលក្នុងនោះ ៦៨៩ នាក់ជាក្មេងប្រុស។ ទោះយ៉ាងណាក៏ដោយ មានការព្រួយបារម្ភកាន់តែខ្លាំងឡើងអំពីអត្រាបោះបង់ការសិក្សាខ្ពស់ក្នុងចំណោមក្មេងប្រុស បើធៀបនឹងក្មេងស្រីនៅក្នុងសហគមន៍»។
នៅឆ្នាំ ២០២២ ក្មេងប្រុស ៩៩ នាក់ បានបោះបង់ការសិក្សាក្នុងកម្មវិធី CCF ដែលស្មើនឹងអត្រា ១២,១៣ ភាគរយ។ បើប្រៀបធៀបក្មេងស្រីមានអត្រាបោះបង់ការសិក្សា ៨,៥២ ភាគរយ។
ភាពខុសគ្នានេះបង្ហាញពីតម្រូវការវិធានការបន្ទាន់ ដើម្បីដោះស្រាយបញ្ហាមូលដ្ឋានដែលនាំឱ្យអត្រាបោះបង់ការសិក្សាខ្ពស់ក្នុងចំណោមក្មេងប្រុស។
លោក នីសុន ជាអតីតនាយកប្រតិបត្តិហូលីវូដដែលបោះមូលដ្ឋាននៅស្ទឹងមានជ័យ ដើម្បីជួយដល់កុមារនៅកម្ពុជា បានបង្កើតទំនាក់ទំនងយ៉ាងជ្រាលជ្រៅជាមួយកុមារនៅក្នុងសាលាសហគមន៍របស់លោក។ ទោះយ៉ាងណាលោកលើកឡើងថា មានការលំបាកក្នុងការរក្សាក្មេងប្រុសឱ្យចូលរួមក្នុងការអប់រំ ដោយសារតែកង្វះនិមិត្តរូបជាបុរសនៅក្នុងសហគមន៍ ដោយ ៨៥ ភាគរយនៃគ្រួសារ ត្រូវបានដឹកនាំដោយតែភាគីម្តាយ។
លោកបានបន្ដថា៖ «ក្មេងស្រីរក្សាបាននូវអត្រានៃការសិក្សាខ្ពស់។ ប៉ុន្ដែក្មេងប្រុសទំនងជាចង់នៅផ្ទះ ឬមានទំនោរលេងវីដេអូហ្គេមច្រើន»។ លោកជឿថា ក្មេងប្រុស ត្រូវការបុគ្គលគំរូ ដើម្បីណែនាំ និងបំផុសគំនិតពួក-គេ ជួយពួកគេរុករកផ្លូវទៅកាន់ភាពពេញវ័យដោយជោគជ័យ។
បុរសបរទេស ដែលមិនយកគ្រួសារដើម្បីគាំពារដល់កុមារក្រីក្រ នៅស្ទឹងមានជ័យរូបនេះ បានឱ្យដឹងថា៖ «ខ្ញុំមិនដឹងថា ក្មេងប្រុសនៅទីណាទេ។ ពួកគេមិនចាប់អារម្មណ៍ ហើយដើរលេងតាមផ្លូវខ្លួនឯង។ ការដោះស្រាយបញ្ហាឱ្យជោគជ័យពិតប្រាកដវាជាការលំបាក»។
លោក នីសុន បាននិយាយពេលពកុមារីម្នាក់ក្នុងដៃថា លោកមានបំណងប្រាថ្នាចង់ក្លាយជាគំរូម្នាក់សម្រាប់សហគមន៍ស្ទឹងមានជ័យ តែដោយសារលោកជាជនបរទេស ការធ្វើជាគំរូសម្រាប់កុមារហាក់គ្មានប្រសិទ្ធភាពទេ។
លោកបានបន្ថែមថា៖ «ខ្ញុំចង់ជួយ ប៉ុន្តែខ្ញុំជាបុរសបស្ចិមប្រទេស។ ពួកគេត្រូវការគំរូខ្មែរដ៏ល្អជាឪពុកខ្មែរដែលអាចពន្យល់ពីអត្ថន័យនៃការធ្វើជាឪពុកដ៏ល្អ និងជួយគ្រួសារ។ ខ្ញុំមិនអាចធ្វើដូច្នេះបានទេ»។ លោកសង្កេតឃើញថា បច្ចុប្បន្នសិស្សប្រមាណ ៩០ ភាគរយ នៅក្នុងសាលាសហគមន៍មួយសុទ្ធតែជាក្មេងស្រីដែលនេះជាអត្រាដ៏គួរឱ្យព្រួយបារម្ភចំពោះក្មេងប្រុសក្នុងសហគមន៍។
លោកបានរំឭកថា៖ «ការចាប់ផ្តើមថ្ងៃសិក្សាដំបូង មានចំនួនក្មេងប្រុស និងក្មេងស្រីស្មើគ្នា។ ដល់ពេលចូលរៀនវិទ្យាល័យគឺសិស្សស្រីកើនដល់ ៨០ ភាគរយ។ ខ្ញុំបារម្ភពីក្មេងប្រុស តើអនាគតរបស់ពួកគេនឹងទៅជាយ៉ាងណា។ ខ្ញុំមិនដឹងទេ។ ខ្ញុំមានន័យថា ខ្ញុំមិនដឹងថាត្រូវធ្វើអ្វីទៀត»។ តាមទស្សនៈរបស់លោក ម្តាយមានឥទ្ធិពលតិចតួចលើកូនប្រុសរបស់ពួកគេ។ ប្រសិនបើអ្នកម្ដាយប្រាប់កូនស្រីឱ្យទៅសាលារៀន ពួកគេនឹងធ្វើវា។ ប៉ុន្តែបើម្ដាយប្រាប់កូនប្រុសពួកគេអាចទៅឬមិនទៅ។ ម្តាយមិនចង់ប្រឈមមុខនឹងពួកគេឬធ្វើឱ្យពួកគេខឹង។
ឧទាហរណ៍ជាក់ស្ដែងមួយក្មេងស្រីជំទង់ម្នាក់ដែលទទួលស្គាល់តម្លៃនៃការអប់រំក្នុងការកែប្រែជីវិតរបស់ខ្លួន ទោះបីជាត្រូវការប្រាក់ចិញ្ចឹមជីវិតយ៉ាងណាក៏ដោយ ក៏ក្មេងស្រីរូបនេះស៊ូទ្រាំនឹងការសិក្សាដែរ។
យុវតី ស្រីនិច អាយុ ១៩ ឆ្នាំ មកពីខេត្តព្រៃវែង បានសម្រេចចិត្តផ្អាកការសិក្សាបន្ទាប់ពីរៀនចប់ថ្នាក់ទី ៦ ដើម្បីធ្វើការងាររកប្រាក់ជួយផ្គត់ផ្គង់ដល់គ្រួសារ។
បច្ចុប្បន្ននេះ ស្រីនិច រៀនថ្នាក់ទី ១១ នៅ Neeson Cripps Academy (NCA) ជាវិទ្យាល័យកម្រិតស្ដង់ដាអន្ដរជាតិមួយរបស់លោក ស្កុត។ ស្រីនិចបានប្រាប់ ភ្នំពេញ ប៉ុស្ដិ៍ថា៖ «ថ្វីដ្បិតតែខ្ញុំបានផ្អាកការសិក្សា ២ ឆ្នាំ ដើម្បីធ្វើការរកប្រាក់ជួយសង់ផ្ទះសមរម្យសម្រាប់ជ្រកកោនយ៉ាងណាក៏ដោយ ក៏ខ្ញុំមិនដែលនឹកឃើញបោះបង់ការសិក្សាឡើយ ពីព្រោះខ្ញុំយល់ថា មានតែការសិក្សាប៉ុណ្ណោះអាចកែប្រែជីវិតខ្ញុំនិងកូនចៅខ្ញុំជំនាន់ក្រោយបាន»។ ស្រីនិច ស្ថិតក្នុងចំណោមក្មេងស្រី និងកុមារីរាប់ពាន់នាក់ទៀត ដែលកំពុងសិក្សានៅសាលារៀនមួយតាមរយៈគម្រោងអប់រំរបស់អង្គការមូលនិធិកុមារកម្ពុជា។
មិនមែនមានបញ្ហាមិនសមតុល្យរវាងសិស្សប្រុស និងស្រីនៅមូលនិធិកុមារកម្ពុជា (CCF) និន្នាការនេះកំពុងរីករាលដាលទូទាំងប្រទេស និងពិភពលោក។
លោកនាយករដ្ឋមន្ត្រី ហ៊ុន សែន បានសម្តែងការព្រួយបារម្ភចំពោះការធ្លាក់ចុះនៃការសិក្សារបស់សិស្សប្រុស ហើយបានបញ្ជាឱ្យក្រសួងអប់រំធ្វើការស៊ើបអង្កេតលើបញ្ហានេះ។ លោកនាយករដ្ឋមន្ត្រីបានថ្លែងដូចនេះ ក្នុងជំនួបជាមួយនិស្សិតនិទ្ទេស A ក្នុងឆ្នាំសិក្សា ២០២១-២០២២ នៅថ្ងៃទី ២ ខែកុម្ភៈ ឆ្នាំ ២០២៣។
លោកថ្លែងថា ក្នុងការប្រឡងសញ្ញាបត្រមធ្យមសិក្សាទុតិយភូមិនាពេលថ្មីៗនេះបេក្ខជនបានដាក់ពាក្យប្រឡងសរុបចំនួន ១២៥ ៧៣៩ នាក់ ក្នុងនោះសិស្សប្រឡងជាប់ចំនួន ៩០ ៩៥០ នាក់ ស្មើនឹង ៧២,៣៧ ភាគរយ។ ក្នុងនោះសិស្សស្រីប្រឡងជាប់ចំនួន ៥ ៥១២ នាក់ ស្មើ ៧៧,៥២ ភាគរយ។
ខណៈលោកនាយករដ្ឋមន្ត្រីសាទរចំពោះការកើនឡើងនៃបេក្ខជនជាស្ត្រីដែលទទួលបានជោគជ័យនោះ លោកនៅតែព្រួយបារម្ភអំពីការថយចុះសមត្ថភាពសិស្សប្រុស។ លោកហ៊ុន សែន បានថ្លែងថា ចាប់ពីថ្នាក់មធ្យមសិក្សាដល់កម្រិតបរិញ្ញាបត្រ សិស្សស្រីមានចំនួនច្រើនជាងសិស្សប្រុសខណៈនៅម្រិតថ្នាក់បរិញ្ញាបត្រជាន់ខ្ពស់មានចំនួននិស្សិតស្រិតិច ហើយថ្នាក់បណ្ឌិត និស្សិតស្រីកាន់តែតិច។ លោកបានដាក់ការសង្ស័យថា តើវាអាចមកពីសិស្ស ឬនិស្សិតប្រុសចូលចិត្ដដើរលេងស្របពេលសិស្ស និងនិស្សិតស្រីខិតខំប្រឹងប្រែងរៀនសូត្រនៅផ្ទះ។
លោកបានឱ្យដឹងថា៖ «វាក៏អាចផ្ដើមចេញពីបញ្ហាប្រពៃណីដែរ ដែលស្ដ្រីក្រោយបញ្ចប់ការសិក្សាកម្រិតបរិញ្ញាបត្រត្រូវយកប្ដី និងមានកូន។ មានតែមួយចំនួនណានោះទេដែលប្ដូរផ្ដាច់មករៀន។ អ៊ីចឹងយើងពិនិត្យមើលថា ត្រឹមកម្រិតបរិញ្ញាចុះក្រោម ស្ដ្រីមានចំនួនលើស ៥០ ភាគរយ តែនៅបរិញ្ញាបត្រជាន់ខ្ពស់ ស្ដ្រីនៅត្រឹមកម្រិត ៣៣ ភាគរយហើយនៅថ្នាក់បណ្ឌិតពេលខ្លះស្ដ្រីមានតិចតួចណាស់»។
លោកបញ្ជាក់ថា ថ្វីដ្បិតតែវាជានិន្នាការយ៉ាងណាក៏ដោយ ក៏គួរខិតខំជំរុញយុវជនឱ្យទទួលបានការសិក្សាដោយសារតែអត្រានៃគម្លាតនេះខុសគ្នាឆ្ងាយពេក។
សំដៅលើការបញ្ជាក់របស់លោកនាយករដ្ឋមន្ត្រី អ្នកនាំពាក្យក្រសួងអប់រំ យុវជន និងកីឡាបានសម្តែងការគាំទ្រចំពោះការលើកឡើងនេះ។ លោក រស់ សុវាចា បានប្រាប់ ភ្នំពេញ ប៉ុស្ដិ៍ថា៖ «សម្រាប់ពេលនេះ សូមយោងប្រសាសន៍ដើមដ៏ខ្ពង់ខ្ពស់របស់សម្តេចតេជោ។ ក្រសួងអប់រំ យុវជន និងកីឡា បាននិងកំពុងសិក្សាស្រាវជ្រាវករណីនេះ។ ក្រសួងនឹងជម្រាបជូនព័ត៌មានបច្ចុប្បន្នភាពនាពេលខាងមុខ»។
នៅសហគមន៍ស្ទឹងមានជ័យអង្គការមូលនិធិ CCF ធានាបាននូវគុណភាពអប់រំរបស់កុមារដោយផ្តល់ការគាំទ្រទាំងផ្នែករាងកាយ និងអាហារូបត្ថម្ភ។
លោក នីគី វើដ ប្រធានផ្នែកទីផ្សារ និងជំនួយការនៅ CCF បានប្រាប់ ភ្នំពេញ ប៉ុស្តិ៍ថា៖ «យើងបានសាងសង់ផ្ទះជាង ៥០០ ខ្នង នៅក្នុងសហគមន៍ជាពិសេសសម្រាប់ឪពុកម្តាយរបស់កុមារទាំងនេះដើម្បីជួយសម្រួលដល់ការទទួលបានការអប់រំរបស់ពួកគេ»។
លោក វើដ បាននិយាយថា កង្វះលំនៅឋានសុវត្ថិភាពដើរតួជាឧបសគ្គក្នុងការរក្សាកុមារទាំងនេះឱ្យចុះឈ្មោះចូលរៀន។ ដោយគ្មានកន្លែងស្នាក់នៅសមរម្យ ពួកគេក៏ប្រឈមមុខបញ្ហាទទួលបានអាហារ និងការទទួលបានទឹកស្អាតផងដែរ។ យោងតាមលោកវើដ កម្មវិធីរបស់មូលនិធិផ្តោតលើការផ្តល់ការអប់រំដែលមានគុណភាពខ្ពស់ ខណៈបង្កើតសហគមន៍គាំទ្រ និងរចនាសម្ព័ន្ធគ្រួសារដើម្បីធានាដល់ភាពជោគជ័យរបស់កុមារ៕
