អង្គការអភិរក្សអន្តរជាតិកម្ពុជា ធ្វើការសិក្សាស្រាវជ្រាវលើដំណាំក្រវាញក្នុងសហគមន៍។ រូបថត ហ្វេសប៊ុក
ប៉ៃលិនៈ ក្រុមការងារជីវភាពសហគមន៍របស់អង្គការអភិរក្សអន្តរជាតិកម្ពុជា បានធ្វើការសិក្សាស្រាវជ្រាវ ទៅលើលទ្ធភាពសេដ្ឋកិច្ច និងបរិស្ថានពីការដាំដុះ និងលក់ក្រវាញរបស់សហគមន៍ ដែលរស់នៅក្នុងភូមិគោលដៅគម្រោងរ៉េដបូកតំបន់ជួរភ្នំក្រវាញកណ្តាល។
អង្គការអភិរក្សអន្តរជាតិកម្ពុជា ឱ្យដឹងថា ថ្មីៗនេះ ក្រុមការងារ បានចុះជួបសមាជិកសហគមន៍ និងអាជីវករនៅក្នុងខេត្តប៉ៃលិន ពោធិ៍សាត់ និងកោះកុង ដើម្បីស្វែងយល់អំពីបរិបទ និងស្ថានភាពដំណាំក្រវាញនៅប្រទេសកម្ពុជា។ ទន្ទឹមនេះ ក្រុមការងារ ក៏បានធ្វើដំណើរទៅកាន់ខេត្តច័ន្ទប៊ុរី (Chathaburi) ប្រទេសថៃ ដើម្បីពិភាក្សាជាមួយកសិករ មន្ត្រីរដ្ឋាភិបាល និងអ្នកសិក្សាស្រាវជ្រាវ ក្នុងការស្វែងយល់អំពីរបៀប ដែលពួកគេប្រើប្រាស់ដំណាំក្រវាញ។
អង្គការអភិរក្សអន្តរជាតិកម្ពុជា បានបញ្ជាក់ថា៖«ក្រវាញជាដំណាំកេរដំណែល១ ដ៏សំខាន់ សម្រាប់សហគមន៍ជនជាតិដើមភាគតិចជាច្រើន ដែលរស់នៅក្នុង និងជុំវិញតំបន់ជួរភ្នំក្រវាញ។ ដំណាំក្រវាញមិនអាចដាំដុះដោយគ្មានម្លប់បានទេ ហើយផ្នែកជាច្រើននៃក្រវាញនេះអាចលក់បានផងដែរ»។ លើសពីនេះទៅទៀត ស្លឹក និងដើមរបស់ក្រវាញ អាចប្រើប្រាស់ជាអាហារ និងភេសជ្ជៈ ដូចជាស៊ុបមាន់ ជាមួយនឹងដើមក្រវាញ។ គ្រាប់របស់ក្រវាញអាចប្រើ ឬកែច្នៃជាគ្រឿងសម្អាង និងជាឱសថបុរាណ ហើយកូនក្រវាញអាចលក់ទៅឱ្យកសិករសម្រាប់ធ្វើការដាំដុះបន្ត។
ក្រៅពីការសិក្សា អង្គការអភិរក្សអន្តរជាតិកម្ពុជា បានឱ្យដឹងថា ក្រុមការងារកំពុងបន្តវិភាគលទ្ធផលដែលពួកគេបានរកឃើញតាមរយៈការសិក្សាស្រាវជ្រាវនេះ ដើម្បីជាផ្នែកមួយ នៃការបង្កើតផែនការយុទ្ធសាស្ត្រសម្រាប់ការអភិវឌ្ឍជីវភាពសហគមន៍របស់គម្រោងរេ៉ដបូកតំបន់ជួរភ្នំក្រវាញកណ្តាល។
លោក អ៊ុំ សូនី នាយកប្រចាំប្រទេសអង្គការអភិរក្សអន្តរជាតិកម្ពុជា បាននិយាយថា ជាមួយនឹងការសិក្សានេះ នៅអំឡុងខែមករា ដល់មីនា ឆ្នាំ២០២៣ ក្រុមស្រាវជ្រាវឯករាជ្យមកពីសាកលវិទ្យាល័យភូមិន្ទភ្នំពេញ (RUPP) ក៏បានសហការជាមួយអង្គការអភិរក្សអន្តរជាតិកម្ពុជា និងមន្ទីរបរិស្ថានខេត្តកំពង់ស្ពឺ កោះកុង និងពោធិ៍សាត់ ដើម្បីធ្វើការវាយតម្លៃសេដ្ឋកិច្ចសង្គមនៅក្នុងឧទ្យានជាតិជួរភ្នំក្រវាញកណ្តាល។
លោក បានបញ្ជាក់ថា៖«ក្រុមការងារបានប្រើប្រាស់ឧបករណ៍ដូចជាការវាយតម្លៃសង្គមសម្រាប់តំបន់អភិរក្ស និងតំបន់ការពារ (SAPA) និងការវាយតម្លៃកម្រិតតំបន់ទៅលើអភិបាលកិច្ច និងសមធម៌ (SAGE) ដើម្បីប្រមូលទិន្នន័យមូលដ្ឋានស្តីពីសុខុមាលភាពរបស់សហគមន៍មូលដ្ឋាន អភិបាលកិច្ចនិងសមធម៌នៅក្នុងតំបន់ឧទ្យានជាតិជួរភ្នំក្រវាញកណ្តាល»។ ជាលទ្ធផល ក្រុមការងារបានធ្វើការស្ទង់មតិប្រជាពលរដ្ឋចំនួន ៤៧៩ គ្រួសារ និងរៀបចំកិច្ចប្រជុំពិគ្រោះយោបល់ជាមួយសមាជិកសហគមន៍ជាច្រើននៅក្នុងភូមិចំនួន ២៤ នៃខេត្តទាំង៣។
តាមរបាយការណ៍រយៈពេល ៣ ខែនៅដើម ឆ្នាំ២០២៣ នេះ អង្គការអភិរក្សអន្តរជាតិកម្ពុជា បានធ្វើការយ៉ាងជិតស្និទ្ធជាមួយក្រសួងបរិស្ថាន ដើម្បីគាំទ្រលើសកម្មភាពអនុវត្តន៍ច្បាប់ទៅដល់មន្ទីរបរិស្ថានទាំង៣ រួមមាន ខេត្តកោះកុង ខេត្តពោធិ៍សាត់ និងខេត្តកំពង់ស្ពឺ។
របាយការណ៍ បានបន្តថា មន្ត្រីឧទ្យានុរក្សចំនួន ៤២ នាក់(ស្ត្រី ១ នាក់)បានធ្វើការចុះល្បាតបានរយៈចម្ងាយ ១២,៦៥១ គីឡូម៉ែត្រ ដោយប្រើប្រាស់លើមធ្យោបាយ ដើម្បីល្បាតមានដូចជា រថយន្តបានចំនួន ២,២៣០ គីឡូម៉ែត្រ ថ្មើរជើងបាន ១, ០៧៥ គីឡូម៉ែត្រ ទូកម៉ាស៊ីនបាន ១៤០ គីឡូម៉ែត្រ និងម៉ូតូចំនួន ៩,២០៦ គីឡូម៉ែត្រ នៅក្នុងឧទ្យានជាតិជួរភ្នំក្រវាញកណ្តាល និងរបៀងអភិរក្សជីវចម្រុះ។
ជាលទ្ធផលនៅក្នុងពេលល្បាត និងចុះធ្វើការអនុវត្តច្បាប់នេះ មន្ត្រីឧទ្យានុរក្សបានអប់រំជនល្មើសចំនួន ២ នាក់ ដែលបានចូលក្នុងតំបន់ការពារដោយគ្មានការអនុញ្ញាត និងបានធ្វើការពិន័យអន្តរការណ៍ចំនួន ១ ករណី ពីបទដឹកជញ្ជូនអនុផលឈើព្រៃដោយគ្មានការអនុញ្ញាត និងបានឃាត់ខ្លួនជនសង្ស័យចំនួន ២ នាក់ក្នុងករណីកាប់ គាស់ រុករានដីព្រៃ ឆ្ការដុត ដើម្បីយកដីធ្វើជាកម្មសិទ្ធិខុសច្បាប់ (ម្នាក់ត្រូវបានដោះលែងវិញ ដោយការសម្រេចរបស់ព្រះរាជអាជ្ញានៃអយ្យការអមសាលាដំបូងខេត្តពោធិ៍សាត់) និងធ្វើកិច្ចសន្យាចំនួន ១ នាក់។ នេះបើតាមរបាយការណ៍ដដែល៕
