លោក រ៉ុង ឈុន អនុប្រធានគណបក្សភ្លើងទៀន។ រូបថត គណបក្សភ្លើងទៀន
ភ្នំពេញៈ គណបក្សភ្លើងទៀនប្រកាសជំហរមិនគាំទ្រយុទ្ធនាការគូសខ្វែងសន្លឹកឆ្នោត ហើយបដិសេធមិនជាប់ពាក់ព័ន្ធនឹងទង្វើនេះមិនថា កើតចេញពីបុគ្គលណាឡើយ និងបានចាត់ទុកចលនាអំពាវនាវមិនឱ្យពលរដ្ឋទៅបោះឆ្នោត និងគូសសន្លឹកឆ្នោតចោល ជាទង្វើរំលោភបំពានច្បាប់។ ប៉ុន្តែការប្រកាសជំហរនេះ ត្រូវបានមន្ត្រីរដ្ឋាភិបាលយល់ថា គ្រាន់តែជាការលាងខ្លួនមិនឱ្យជាប់ពាក់ព័ន្ធផ្លូវច្បាប់របស់គណបក្សនេះប៉ុណ្ណោះ។
ការប្រកាសជំហររបស់គណបក្សភ្លើងទៀនដូច្នេះ ធ្វើឡើងតាមរយៈសេចក្តីថ្លែងការណ៍ខ្លួននៅរសៀលថ្ងៃទី១៩ ខែកក្កដា ឆ្នាំ២០២៣ ឆ្លើយតបចំពោះការលើកឡើងកន្លងមកថា គណបក្សមួយនេះ មានជាប់ពាក់ព័ន្ធនឹងយុទ្ធនាការបំផុសបំផុលមិនឱ្យពលរដ្ឋទៅចួលរួមបោះឆ្នោត ឬគូសសន្លឹកឆ្នោតចោល ឬគូសខ្វែងលើសន្លឹកឆ្នោត នៅថ្ងៃបោះឆ្នោត ថ្ងៃទី២៣ ខែកក្កដា ខាងមុខ។ បន្ថែមពីនេះ គណបក្សភ្លើងទៀនចាត់ទុកទង្វើនេះ ជាការរំលោភច្បាប់ ជាពិសេសច្បាប់ស្តីពីការបោះឆ្នោត។
គណបក្សបានគូសបញ្ជាក់ដូច្នេះថា៖«សូមប្រកាសបដិសេធ មិនជាប់ពាក់ព័ន្ធ និងមិនទទួលខុសត្រូវចំពោះទង្វើរបស់បុគ្គលទាំងឡាយណា ដែលធ្វើសកម្មភាពប្រាសចាកស្មារតីរដ្ឋធម្មនុញ្ញ និងច្បាប់ជាធរមាននានា នៃព្រះរាជាណាចក្រកម្ពុជាឡើយ»។
គណបក្សនេះ ក៏សូមលើកទឹកចិត្តឱ្យប្រជាពលរដ្ឋខ្មែរធ្វើការសម្រេចចិត្តដោយខ្លួនឯង ក្នុងការចូលរូម ឬមិនចូលរួមការបោះឆ្នោតជ្រើសតាំងតំណាងរាស្ត្រនីតិកាលទី៧ នេះ ស្របតាមឆន្ទៈផ្ទាល់ខ្លួន ដោយមិនត្រូវរងការគាបសង្កត់ បង្ខិតបង្ខំ គំរាមកំហែង បញ្ជា ឬញុះញង់ ពីសំណាក់បុគ្គល ឬគណបក្សណាមួយឡើយ។គណបក្សនេះ ក៏បានប្រកាសរក្សាសកម្មភាពយ៉ាងខ្ជាប់ខ្ជួនក្នុងការអនុវត្តស្មារតីរដ្ឋធម្មនុញ្ញ ច្បាប់ស្តីពីការបោះឆ្នោត ច្បាប់គណបក្សនយោបាយ និងច្បាប់នានាទៀត។
ជាមួយគ្នានេះ លោករ៉ុង ឈុន អនុប្រធានគណបក្សភ្លើងទៀន បានឱ្យដឹងបន្ថែមថា គណបក្សភ្លើងទៀនមិនបានបង្គាប់បញ្ជា ឬចេញយុទ្ធនាការឱ្យសមាជិក អ្នកគាំទ្រ និងពលរដ្ឋឱ្យគូសបំផ្លាញសន្លឹកឆ្នោត ឬមិនទៅចូលរួមបោះឆ្នោតថ្ងៃទី២៣ កក្កដា នោះទេ ហើយគណបក្សផ្តល់សិទ្ធិនេះដល់បុគ្គលរៀងៗខ្លួនជាអ្នកសម្រេចចិត្ត។លោកថ្លែងដូច្នេះថា៖«គណបក្សភ្លើងទៀនមិនជាប់ពាក់ព័ន្ធនឹងសកម្មភាពអ្នកនយោបាយ និងប្រជាពលរដ្ឋក្រៅប្រទេសទេ[ក្រុមលោកសម រង្ស៊ី និងអ្នកគាំទ្រលោក] ព្រោះអ្នកទាំងនោះធ្វើជាសិទ្ធិរបស់ពួកគាត់»។
ជុំវិញការចាប់ខ្លួនសមាជិកជាន់ខ្ពស់របស់គណបក្សភ្លើងទៀនមួយចំនួនវិញពាក់ព័ន្ធនឹងបទចោទញុះញង់ឱ្យវឹកវរនិងចលាចលសង្គមនៅមុនការបោះឆ្នោតនោះ លោករ៉ុង ឈុន សូមច្រានចោលការចោទប្រកាន់ទាំងនោះ ដោយលោកអំពាវនាវឱ្យអាជ្ញាធរពិនិត្យឡើងវិញ និងដោះលែងអ្នកទាំងនោះឱ្យមានសេរីភាព ដោយលោកអះអាងថា អ្នកទាំងនោះមិនបានប្រព្រឹត្តដូចការចោទឡើយ។
ពាក់ព័ន្ធនឹងបញ្ហានេះដែរ លោកជិន ម៉ាលីន អ្នកនាំពាក្យក្រសួងយុត្តិធម៌ យល់ថា សេចក្តីថ្លែងការណ៍របស់គណបក្សភ្លើងទៀនជាការប្រកែកនិងជាការលាងខ្លួន មិនឱ្យពាក់ព័ន្ធនឹងបទល្មើសកន្លងទៅ។
ទោះជាយ៉ាងណាលោកថា៖«ប៉ុន្តែបើគេរកឃើញភ័ស្តុតាងមូលដ្ឋានច្បាស់លាស់ថា គណបក្សភ្លើងទៀននេះមានជាប់ពាក់ព័ន្ធនឹងទណ្ឌិត[លោកសម រង្ស៊ី] ពាក់ព័ន្ធការញុះញង់ប្រជាពលរដ្ឋមិនឱ្យទៅបោះឆ្នោត ឬការបំផ្លា្ញញសន្លឹកឆ្នោតនោះ ក៏ត្រូវទទួលខុសត្រូវតាមច្បាប់ដែលមានចែងជាធរមានដែរ»។
ពាក់ព័ន្ធនឹងបញ្ហានេះ លោកសុខ ឥសាន អ្នកនាំពាក្យគណបក្សប្រជាជនកម្ពុជាដែលជាបក្សកាន់អំណាច លើកឡើងថាការប្រកាសជំហររបស់គណបក្សភ្លើងទៀននាពេលនេះ គឺជារឿងរបស់បក្ស ដោយឡែកអាជ្ញាធរបានចាប់ខ្លួនមនុស្សប្រព្រឹត្តប៉ុន្មានរូបហើយដែលជាសមាជិកគណបក្សនេះ ហើយក៏ត្រូវប្រឈមមុខនឹងផ្លូវច្បាប់ដែរ។លោកថា៖«យើងដឹងហើយថា ការគូសបំផ្លាញសន្លឹកឆ្នោត ជាយុទ្ធនាការរបស់ក្រុមឧទ្ទាមក្រៅច្បាប់ដឹកនាំដោយទណ្ឌិតសម រង្ស៊ី។ អ៊ីចឹងទេ បើគេចាប់បានជនល្មើសច្បាប់ដែលបំផុសចលនានេះនៅក្នុងស្រុក ហើយបើជនល្មើសនោះជាសមាជិកបក្សភ្លើងទៀនទៀតនោះ ទោះខ្លួនខំប្រឹងធ្វើសេចក្តីប្រកាសបដិសេធយ៉ាងណា ក៏គេចមិនរួចដែរ»។
គួរបញ្ជាក់ថា មាត្រា ១៤២ថ្មីនៃច្បាប់ស្តីពីវិសោធនកម្មច្បាប់ស្តីពី ការបោះឆ្នោតជ្រើសតាំងតំណាងរាស្ត្រ ចែងថាត្រូវផាកពិន័យជាប្រាក់ពី ៥លានរៀល ទៅ ២០លានរៀល ដោយ គ.ជ.ប ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះជនណាដែលតាមគ្រប់មធ្យោបាយទុច្ចរិត ណែនាំ ឬញុះញង់ឱ្យអ្នកបោះឆ្នោតបំផ្លាញ ឬធ្វើឱ្យខូចសន្លឹកឆ្នោត និងធ្វើឱ្យបាត់ទំនុកចិត្តលើការសម្ងាត់នៃការបោះឆ្នោត៕
