លោក ចាន់ តារា ចង្អុលបង្គោលអ៊ីនធឺណិតនៅកសិដ្ឋានកសិទេសចរណ៍របស់លោកនៅវាលរេញ។ រូបថត សហការី
ភ្នំពេញ: នៅតំបន់ជនបទ ការតភ្ជាប់អ៊ីនធឺណិតមានសារៈសំខាន់សម្រាប់ការអភិវឌ្ឍវិស័យកសិកម្មដែលប្រជាកសិករអាចប្រើប្រាស់បច្ចេកវិទ្យាទំនើបដូចជាឧបករណ៍ IoT ការបញ្ជាដ្រូន និងឧបករណ៍កសិកម្មជាច្រើនទៀត ដើម្បីបង្កើនផលិតភាព។
នៅក្នុងសកម្មភាពត្រួសត្រាយផ្លូវដែលអាចផ្លាស់ប្តូរវិស័យកសិកម្ម និងបច្ចេកវិទ្យានៅជនបទនៃប្រទេសកម្ពុជា សហគ្រិន ចាន់ តារា បានក្លាយជាអ្នកដំបូងគេដែលនាំយកប្រព័ន្ធអ៊ីនធឺណិតល្បឿនលឿនរបស់ Starlink ទៅកាន់តំបន់។
លោក តារា បានឱ្យដឹងថា៖ «អ៊ីនធឺណិតល្បឿនលឿននឹងផ្តល់អត្ថប្រយោជន៍ដល់កសិករតាមរយៈការបើកការចូលប្រើឧបករណ៍ IOT ទាំងមូលប្រព័ន្ធបញ្ជាដ្រូន និងកិច្ចការកសិកម្មជួយសម្រួលដំណើរការជាច្រើនក៏ដូចជាកាត់បន្ថយនីតិវិធីធ្លាប់ត្រូវការពីមុន»។
លោកប្រាប់ ភ្នំពេញ ប៉ុស្តិ៍ថា៖ «គោលបំណងរបស់ខ្ញុំ គឺបង្កើតប្រព័ន្ធអេកូឡូស៊ីសម្រាប់បច្ចេកវិទ្យា និងការច្នៃប្រឌិតកសិកម្មដែលសហគ្រិន និងនិស្សិតអាចទទួលបានបច្ចេកវិទ្យាចុងក្រោយបំផុត និងការគាំទ្រដើម្បីបើកដំណើរការអាជីវកម្មផ្ទាល់ខ្លួនរបស់ពួកគេ»។
លោក តារា ជាអតីតអ្នកជំនាញខាងឧស្សាហកម្មរថយន្តបើកបរដោយខ្លួនឯងពី Silicon Valley ថ្មីៗនេះបានផ្លាស់ទីលំនៅទៅខេត្តព្រះសីហនុដែលលោកមានកសិដ្ឋានកសិទេសចរណ៍នៅវាលរេញមានទំហំ ៦០ ហិកតា និងផ្តោតសំខាន់លើការដាំដុះទុរេន និងសាវម៉ាវហើយថ្មីៗនេះលោកបានពង្រីកដំណាំមួយចំនួនទៀតរួមមានវ៉ានីឡា កាកាវ ចេក ស្រកានាគ និងដូង។
លោកថា គោលបំណងចុងក្រោយ គឺបង្កើតកសិដ្ឋានឆ្លាតវៃ ដែលដំណើរការដោយស្វ័យប្រវត្តិដែលលែងពឹងផ្អែកលើកម្លាំងពលកម្ម ដូចជាប្រព័ន្ធធារាសាស្ត្រតាមរយៈការប្រើប្រាស់ឧបករណ៍ចាប់សញ្ញាសំណើម និងការព្យាករទឹកភ្លៀង។ ឧទាហរណ៍ ប្រសិនបើដង្កូវត្រូវបានរកឃើញស៊ីស្លឹកវ៉ានីឡា កាមេរ៉ាចាប់សញ្ញាចលនានឹងជូនដំណឹងភ្លាមៗដល់កម្មករឱ្យចាត់ការសត្វចង្រៃទាំងនោះភ្លាម។ លើសពីនេះ រុក្ខជាតិនីមួយៗនឹងត្រូវបានបំពាក់ដោយលេខកូដ QR ដែលផ្តល់ព័ត៌មានអំពីប្រភេទបច្ចេកទេសសាកវប្បកម្ម និងការតាមដានទិន្នន័យរួមទាំងកាលបរិច្ឆេទនៃការបង្កកំណើតចុងក្រោយផងដែរ។
លោក តារា ដែលធ្លាប់ធ្វើការក្នុងឧស្សាហកម្មរថយន្តស្វ័យប្រវត្ដិអស់រយៈពេល ៥ ឆ្នាំបាននិយាយថា៖ «ពេលគំនិតទាំងនេះមិនទាន់ត្រូវបានអនុវត្តកសិករពឹងផ្អែកលើអ៊ីនធឺណិតល្បឿនលឿនទូរស័ព្ទ ឬ Wi-Fi ដើម្បីបើកដំណើរការបច្ចេកវិទ្យា (IoT)»។
កាលពីឆ្នាំមុន ខណៈធ្វើការនៅ Silicon Valley លោក តារា ជួបបញ្ហាទំនាក់ទំនងតាមប្រព័ន្ធទូរស័ព្ទជាមួយក្រុមគ្រួសារនៅកសិដ្ឋានវាលរេញ ខេត្តព្រះសីហនុ។
លោក តារា ត្រឡប់មកលេងប្រទេសកំណើតកាលពីខែធ្នូ ឆ្នាំមុន ពេលទុរេនកំពុងចេញផ្កាហើយលោកបានសង្កេតឃើញដំណើរការកសិកម្មជាច្រើនដូចជាការលម្អង ការស្រោចស្រព និងការបង្កកំណើតនៅតែធ្វើឡើងដោយដៃ។ ដូច្នេះហើយតម្រូវការក្នុងការប្រែក្លាយកសិកម្មបែបប្រពៃណីឱ្យទៅជាទំនើប និងបញ្ហាប្រឈមដែលបណ្តាលមកពីកង្វះអ៊ីនធឺណិតក្នុងតំបន់មានជំរុញទឹកចិត្ដលោក តារា ចាត់វិធានការភ្លាមៗដើម្បីនាំយកអ៊ីនធឺណិតល្បឿនលឿន Starlink មកកាន់តំបន់ជនបទនៃប្រទេសកម្ពុជា។
លោកនិយាយថា៖ «វាជួយដល់មុខងារមួយចំនួនដូចជាការត្រួតពិនិត្យកសិដ្ឋានតាមពេលវេលាជាក់ស្តែងការបង្ហ្រោះដូន ឬឧបករណ៍ដាំដុះដោយស្វ័យប្រវត្តិ និងការប្រមូលផលដោយរ៉ូបូត ក៏ដូចជាការផ្សព្វផ្សាយលក់ផលិតផលតាមអនឡាញ។ យើងនៅមានបញ្ហាជាច្រើនទៀតត្រូវដោះស្រាយ»។
Starlink ជាផ្កាយរណបុអ៊ីនធឺណិតក្រុមហ៊ុន SpaceX របស់មហាសេដ្ឋី Elon Musk ដែលមានវិសាលភាពគ្របដណ្តប់លើសកលលោកតាមរយៈការប្រើបណ្តាញផ្កាយរណបតូចៗ (LEO)។ លោក តារា មានបទពិសោធន៍ការងារនៅ Aurora Innovation នៅក្រោមការដឹកនាំរបស់លោក Chris Urmson បានជំរុញឱ្យលោកមានចំណង់ចំណូលចិត្តចំពោះបច្ចេកវិទ្យា និងការច្នៃប្រឌិត។
បន្ទាប់ពីរយៈពេល ៤ ឆ្នាំលោក តារា បានលាលែងពីការងារនៅចុងខែមេសា ឆ្នាំ ២០២៣ ដោយបានទទួលប្រាក់រង្វាន់ចុងក្រោយ និងទទួលបានកម្មសិទ្ធិពេញលេញនៃជម្រើសភាគហ៊ុន។
ជាមួយនឹងគោលដៅយូរអង្វែងក្នុងការធ្វើការក្នុងវិស័យកសិកម្មកម្ពុជា និងប្រើប្រាស់បទពិសោធន៍អន្តរជាតិ និងបច្ចេកវិទ្យារបស់លោកបំណងប្រាថ្នាបង្កើតអាជីវកម្មកសិកម្មទំនើបត្រូវបានគិតគូរ។ ការផ្លាស់ប្តូរលំនៅពី Silicon Valley មកប្រទេសកម្ពុជា បាននាំរូបលោកឱ្យខិតទៅជិតកសិដ្ឋានកសិទេសចរណ៍របស់គ្រួសារនៅវាលរេញ ជាកន្លែងដែលលោកត្រូវអភិវឌ្ឍអាជីវកម្មកសិកម្ម។
លោកនិយាយថា Starlink ត្រូវដំឡើងនៅទីកន្លែងស្រឡះទូលាយដែលងាយស្រួលចាប់សេវាអ៊ីនធឺណិតកាន់តែខ្លាំង។
និស្សិតក្នុងស្រុក ១ ក្រុម ដែលបានបង្កើត CAM-Smart Irrigation ជាប្រព័ន្ធបដិវត្តន៍វិធីសាស្ត្រធ្វើកសិកម្មបែបប្រពៃណីទៅជាទំនើបដោយសន្សំសំចៃពេលវេលា ទឹក និងកាត់បន្ថយកម្លាំងពលកម្មសម្រាប់កសិករដែលវាមានសមត្ថភាពរកឃើញកម្រិតសំណើមដី និងផ្ញើព័ត៌មានថ្មីភ្លាមៗទៅកាន់ទូរស័ព្ទរបស់ពួកគេដោយធានាថា ដំណាំទទួលបានទឹកតាមតម្រូវការ។
ដើម្បីធ្វើឱ្យរឿងទាំងនេះកើតឡើងកញ្ញា នាក់ សុខឃីម អាយុ ២០ ឆ្នាំ ជានិស្សិតផ្នែកវិស្វកម្មព័ត៌មានវិទ្យានៃសាកលវិទ្យាល័យភូមិន្ទភ្នំពេញថ្លែងថា វាទាមទារការតភ្ជាប់ុអ៊ីនធឺណិតជាមួយទូរស័ព្ទ ដើម្បីគ្រប់គ្រងឧបករណ៍ឆ្លាតវៃ។ កញ្ញាប្រាប់ ភ្នំពេញ ប៉ុស្ដិ៍ថា៖ «បើសិនតំបន់គ្មានប្រព័ន្ធអ៊ីនធឺណិតទេ ការប្រើប្រាស់ប្រាកដជាជួបការលំបាក ដោយវាមិនអាចភ្ជាប់ជាមួយប្រព័ន្ធបញ្ជាលើទូរស័ព្ទដៃបានឡើយ»។
ឧបករណ៍ទទួលផ្កាយរណប និងរ៉ោតទ័រ Wi-Fi មានតម្លៃ ៦០០ ដុល្លារ រួមជាមួយនឹងថ្លៃសេវាប្រចាំខែ ២០០ ដុល្លារ សម្រាប់សេវាអ៊ីនធឺណិតជាសកល។
ប៉ុន្ដែវាមានចំណុចខ្សោយដោយចាញ់អាកាសធាតុភ្លៀងធ្លាក់ និងមានពពកច្រើន។ លោក តារា បានបន្ដថា៖ «អត្ថប្រយោជន៍ដ៏អស្ចារ្យមួយរបស់ Starlink គឺអ្នកអាចយកវាទៅគ្រប់ទីកន្លែងមិនថា អ្នកទៅបោះតង់នៅលើភ្នំ ឬជិះទូកទៅកាន់កោះដាច់ស្រយាលនោះទេ»។ គំនិតផ្តួចផ្តើមនេះបានបង្ហាញពីចំណុចស្នូលនៃបច្ចេកវិទ្យា និងកសិកម្មដែលត្រួសត្រាយផ្លូវសម្រាប់ប្រព័ន្ធអេកូឡូស៊ីនៃការច្នៃប្រឌិតដែលគាំទ្រទាំងសហគ្រិន និងនិស្សិតនៅកម្ពុជា៕
