ក្រុមនិស្សិតកម្ពុជាចំនួន ១៩ នាក់ បានទទួលអាហារូបករណ៍បន្ដការសិក្សានៅប្រទេសឥណ្ឌូនេស៊ី។ រូបថត សហការី
ភ្នំពេញ: និស្សិតកម្ពុជាចំនួន ១៩ នាក់ បានទទួលអាហារូបករណ៍បន្ដការសិក្សានៅប្រទេសឥណ្ឌូនេស៊ី ដែលកម្មវិធីនេះ ត្រូវបានរៀបចំឡើងនៅស្ថានទូតឥណ្ឌូនេស៊ី នៅរាជធានីភ្នំពេញកាលពីថ្ងៃពុធ ទី២៦ ខែកក្កដា។
អ្នកដែលបានទទួលអាហារូបករណ៍ពីគម្រោងភាពជាដៃគូប្រទេសកំពុងអភិវឌ្ឍន៍ (KNB) Darmasiswa និង Padang State University (UNP) នឹងបន្តការសិក្សាថ្នាក់បរិញ្ញាបត្រនិងបរិញ្ញាបត្រជាន់ខ្ពស់ ដល់ថ្នាក់បណ្ឌិតនៅក្នុងមុខវិជ្ជាផ្សេងៗ នៅទូទាំងសាកលវិទ្យាល័យល្បីៗ របស់ប្រទេសឥណ្ឌូនេស៊ី។
លោកស្រី Lauti Nia Astri ភារធារីទទួលបន្ទុកបណ្តោះអាសន្ននៃស្ថានទូតឥណ្ឌូនេស៊ី ប្រចាំរាជធានីភ្នំពេញបានថ្លែងថា៖«កិច្ចសហប្រតិបត្តិការលើវិស័យអប់រំគឺជាការផ្តោតសំខាន់មួយនៃកិច្ចសហប្រតិបត្តិការទ្វេភាគីរវាងប្រទេសឥណ្ឌូនេស៊ី និងកម្ពុជា»។
លោកស្រីបានគូសបញ្ជាក់ពីតួនាទីរបស់ខ្លួន ក្នុងការបង្កើតកិច្ចសហប្រតិបត្តិការកាន់តែស៊ីជម្រៅ ទូលំទូលាយនិងយូរអង្វែងក្នុងវិស័យផ្សេងៗ។ ជាងនេះទៅទៀត កិច្ចសហប្រតិបត្តិការលើវិស័យអប់រំបានដើរតួនាទីយ៉ាងសំខាន់ក្នុងការលើកកម្ពស់ចំណេះដឹង និងវប្បធម៌ឥណ្ឌូនេស៊ីក្នុងប្រទេសកម្ពុជាទន្ទឹមនឹងការពង្រឹងសមត្ថភាពបង្រៀន និងរៀន ដែលជាផ្នែកមួយនៃការទូតសាធារណៈ ការទូតអំណាចទន់ និងការពង្រឹងមុខមាត់ប្រទេសឥណ្ឌូនេស៊ីក្នុងព្រះរាជាណាចក្រកម្ពុជា។
លោកស្រី Nia Astri បានឱ្យដឹងថា៖«មានសារៈសំខាន់ដូចគ្នាគឺការអប់រំនិងការអភិវឌ្ឍធនធានមនុស្សរបស់កម្ពុជាដែលត្រូវបានផ្តល់តាមរយៈអាហារូបករណ៍ ហើយដើរតួជាការវិនិយោគត្រឡប់មកវិញសម្រាប់ប្រទេសឥណ្ឌូនេស៊ី»។
លោកស្រីភារធារីបានជូនពរនិស្សិតកម្ពុជាទាំងអស់ឱ្យធ្វើដំណើរប្រកបដោយសុវត្ថិភាព និងបានលើកទឹកចិត្តពួកគេឱ្យដើរកម្សាន្ដនៅប្រទេសឥណ្ឌូនេស៊ី ខណៈចំណាយពេលវេលាសិក្សានៅទីនោះ។
អំឡុងពេលជំនួបនោះ ស្ថានទូតឥណ្ឌូនេស៊ី ប្រចាំរាជធានីភ្នំពេញ បានបង្ហាញពីទិដ្ឋភាពសង្ខេបអំពីប្រទេសឥណ្ឌូនេស៊ី និងកិច្ចសហប្រតិបត្តិការទ្វេភាគីដ៏យូរអង្វែងរបស់ខ្លួនជាមួយប្រទេសកម្ពុជា ដែលមានតាំងពីឆ្នាំ ១៩៥៩។
បើយោងតាមស្ថានទូតឥណ្ឌូនេស៊ី ប្រចាំនៅរាជធានីភ្នំពេញប្រវត្តិនៃទំនាក់ទំនងការទូត រួមមានព្រឹត្តិការណ៍សំខាន់ៗ ដូចជាព្រះបាទនរោត្តម សីហនុ ដឹកនាំគណៈប្រតិភូកម្ពុជា ក្នុងកិច្ចប្រជុំកំពូលអាស៊ី-អាហ្វ្រិក ក្នុងឆ្នាំ ១៩៥៥។
លើសពីនេះស្ថានទូតបានលើកឡើងពីតួនាទីដ៏សំខាន់របស់ឥណ្ឌូនេស៊ី ក្នុងកិច្ចខិតខំប្រឹងប្រែងសន្តិភាពតាមរយៈកិច្ចប្រជុំក្រៅផ្លូវការទីក្រុងហ្សាការតា (JIM) I និង II នៅកម្ពុជារួមជាមួយនឹងការស្ដារទំនាក់ទំនងសេដ្ឋកិច្ចរវាងប្រទេសទាំង២ក្រោយវិបត្ដិកូវីដ១៩។
និស្សិតដែលទទួលអាហារូបករណ៍បានសម្តែងនូវភាពរីករាយនៅពេលដែលពួកគេបានសិក្សាអំពីគោលដៅទេសចរណ៍ល្បីៗរបស់ប្រទេសឥណ្ឌូនេស៊ីដូចជា Borobudur និង Bali។ ក្នុងចំណោមនិស្សិតទាំងនោះកញ្ញា ម៉េង ស្រីម៉ី ជានិស្សិតវិស្វកម្មឆ្នាំទី៥ នៃវិទ្យាស្ថានបច្ចេកវិទ្យាកម្ពុជា បានសម្ដែងការរំភើបចិត្តចំពោះឱកាសទទួលបានអាហារូបករណ៍ដែលមិននឹកស្មានដល់។
កញ្ញាស្រីម៉ីត្រៀមខ្លួនចេញដំណើរទៅប្រទេសឥណ្ឌូនេស៊ីសម្រាប់ថ្នាក់អនុបណ្ឌិតនៅវិទ្យាស្ថាន Teknologi Surabaya តាមរយៈអាហារូបករណ៍ផ្នែកវិស្វកម្មអគ្គិសនី។
កញ្ញាបានប្រាប់ភ្នំពេញប៉ុស្តិ៍ថា៖«ដោយសារខ្ញុំសិក្សាភាសាអង់គ្លេស ខ្ញុំចំណាយពេលតែ ២ ឆ្នាំ ដើម្បីបញ្ចប់ថ្នាក់បរិញ្ញាបត្រជាន់ខ្ពស់ផ្នែកវិស្វកម្មអគ្គិសនី ខណៈនិស្សិតមួយចំនួន ដែលសិក្សាភាសាឥណ្ឌូនេស៊ី នឹងត្រូវចំណាយពេលបីឆ្នាំ»។
កញ្ញាបាននិយាយថា កញ្ញាទន្ទឹងរង់ចាំបទពិសោធន៍នេះយ៉ាងអន្ទះសា ខណៈកញ្ញានឹងស្នាក់នៅក្នុងអន្តេវាសិកដ្ឋានសាកលវិទ្យាល័យអំឡុងពេលស្នាក់នៅ។
សាកលវិទ្យាល័យទាំងនេះរួមមានសាកលវិទ្យាល័យឥណ្ឌូនេស៊ី (១នាក់-KNB), សាកលវិទ្យាល័យGadjahMada (១នាក់-KNB), SepuluhNopember Institute of Technology (៦នាក់-KNB), សាកលវិទ្យាល័យ Padang State (៩នាក់), សាកលវិទ្យាល័យMuhammadiyah Malang (១នាក់-Darmasiswa) និងវិទ្យាល័យទេសចរណ៍Trisakti (១នាក់-Darmasiswa)។
ស្ថានទូតឥណ្ឌូនេស៊ីប្រចាំនៅរាជធានីភ្នំពេញបានបង្ហាញពីក្តីសង្ឃឹមថា និស្សិតទទួលអាហារូបករណ៍ទាំងអស់អាចសិក្សាស្វែងយល់បានកាន់តែច្រើនអំពីប្រទេសឥណ្ឌូនេស៊ីហើយត្រឡប់មកកម្ពុជាវិញជាមួយនឹងចំណេះជំនាញដែលអាចជួយដល់ការអភិវឌ្ឍសង្គមជាតិកម្ពុជានាថ្ងៃអនាគត។
កម្មវិធីអាហារូបករណ៍នេះបម្រើជាឱកាសសម្រាប់និស្សិតកម្ពុជាក្នុងការពង្រីកការយល់ដឹងនិងលើកកម្ពស់មិត្តភាពយូរអង្វែងរវាងឥណ្ឌូនេស៊ីនិងកម្ពុជា៕
