រដ្ឋបាលខេត្តបាត់ដំបង ស្នើកិច្ចអន្តរាគមន៍ពីស្ថាប័នជំនាញ ដើម្បីផ្អាករោងចក្របណ្តោះអាសន្នក្រោយបង្ហូរសំណល់រាវចូលស្ទឹងសង្កែ។ រូបថត ហ្វេសប៊ុក
រដ្ឋបាលខេត្តបាត់ដំបង បានស្នើសុំកិច្ចអន្តរាគមន៍ពីស្ថាប័នជំនាញពាក់ព័ន្ធ ដើម្បីមានវិធានការណ៍ផ្អាករោងចក្រ មិនឱ្យដំណើរការជាបណ្តោះអាសន្ន បន្ទាប់រោងចក្រនេះ បានបង្ហូរសំណល់រាវ ចូលក្នុងទឹកស្ទឹងសង្កែ ដែលបានបង្កឱ្យទឹកប្រែទៅជាខ្មៅខុសប្រក្រតី។
សេចក្ដីបំភ្លឺព័ត៌មានរបស់រដ្ឋបាលខេត្តបាត់ដំបងចុះថ្ងៃទី ៤ ខែសីហា បានលើកឡើងថា កាលពីថ្ងៃទី២ ខែសីហាកន្លងទៅ មានការផ្សព្វផ្សាយ និងចែករំលែកព័ត៌មានតាមបណ្តាញសង្គម និងគេហទំព័រសារព័ត៌មានផ្សេងៗ ពាក់ព័ន្ធនឹងករណីទឹកស្ទឹងសង្កែមានពណ៌ខ្មៅខុសប្រក្រតី និងមានការពុលងាប់ត្រីមួយចំនួន។
ពាក់ព័ន្ធបញ្ហានេះ រដ្ឋបាលខេត្តបាត់ដំបងធ្វើការបំភ្លឺថា៖«ក្រោយពីទទួលបានព័ត៌មាននេះភ្លាម គណៈកម្មការចម្រុះខេត្ត បានចុះទៅពិនិត្យ និងស្រាវជ្រាវដល់ទីតាំង ជាក់ស្ដែងរយៈពេលពីរថ្ងៃមកហើយ ដោយបានរកឃើញថា ទឹកដែលមានពណ៌ខ្មៅខុសប្រក្រតីខាងលើ បានបង្កឡើងពីសំណល់រាវរបស់រោងចក្រមួយកន្លែងហូរចូលក្នុងទឹកស្ទឹងសង្កែ ដែលមានទីតាំងស្ថិតនៅភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង»។
ជាមួយគ្នានេះ រដ្ឋបាលខេត្ត បានណែនាំឱ្យមន្ត្រីបច្ចេកទេសរដ្ឋាករទឹកបាត់ដំបង នៃមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្ត ធ្វើការពិនិត្យ និងបានរកឃើញថា ទឹកនៅតែរក្សាបានគុណភាពល្អជាធម្មតាអនុលោមតាមស្តង់ដាគុណភាពទឹកស្អាត និងមិនមានផលប៉ះពាល់ដល់សុខភាពឡើយ ហើយបច្ចុប្បន្នទឹកស្ទឹងសង្កែបានវិលត្រឡប់មកសភាពដើមជាធម្មតា។
ទន្ទឹមនេះ រដ្ឋបាលខេត្តបានចាត់វិធានការចំពោះក្រុមហ៊ុន ដោយបានធ្វើកិច្ចសន្យា និងមិនអនុញ្ញាតឱ្យមានការហូរចេញនូវសំណល់រាវ (ទឹកកខ្វក់) សំណល់រឹង និងសារធាតុពុល ឬសារធាតុគីមីគ្រប់ប្រភេទ ចេញពីទីតាំងរោងចក្រ ចូលទៅក្នុងទឹកស្ទឹងសង្កែ សាជាថ្មីម្តងទៀតទេ។ បើករណីនេះនៅតែបន្តកើតមានឡើង ក្រុមហ៊ុនត្រូវទទួលខុសត្រូវទាំងស្រុងចំពោះមុខច្បាប់។
សេចក្តីប្រកាសបញ្ជាក់ថា៖ «ចំពោះមុខ រដ្ឋបាលខេត្ត បានគោរពស្នើសុំកិច្ចអន្តរាគមន៍បន្ថែមទៀតពី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីមានវិធានការណ៍ផ្អាករោងចក្រ មិនឱ្យដំណើរការជាបណ្តោះអាសន្ន និងស្នើសុំទៅក្រសួងបរិស្ថាន និងក្រសួងពាក់ព័ន្ធ ដើម្បីពិនិត្យ និងវាយតម្លៃផលប៉ះពាល់បរិស្ថានសាឡើងវិញ ចៀសវាងបង្កឱ្យមានផលប៉ះពាល់ដល់សុខភាពបងប្អូនប្រជាពលរដ្ឋនៅពេលក្រោយទៀត»៕
