លោក ឡុង ឌីម៉ង់ (កណ្តាល) ពេលចុះពិនិត្យទីតាំងប្រតិបត្តិការរបស់ក្រុមហ៊ុនថុនធូថុន កាលពីថ្ងៃទី១៣ សីហា។ រូបថត រដ្ឋបាលខេត្តព្រះសីហនុ
ព្រះសីហនុៈ ដើម្បីជាការចូលរួមក្នុងកិច្ចការពារបរិស្ថាន រដ្ឋបាលខេត្តព្រះសីហនុ សហការគាំទ្រ និងលើកទឹកចិត្តឱ្យប្រជាពលរដ្ឋ ដែលរើសបានសំណល់ប្លាស្ទិក នៅក្រៅធុងសំរាម និងក្រៅទីលានចាក់សំរាម យកទៅលក់ឱ្យក្រុមហ៊ុន ថុនធូថុន(Tontoton) ដើម្បីកិនរំលាយសម្រាប់កែច្នៃផលិតទៅជាក្តារបន្ទះ និងគ្រឿងសង្ហារិមប្រើប្រាស់។
ការប្រកាសគាំទ្រ របស់រដ្ឋបាលខេត្តព្រះសីហនុ កាលពីថ្ងៃទី១៣ ខែសីហា គឺធ្វើឡើងបន្ទាប់ពីលោក ឡុង ឌីម៉ង់ អភិបាលរងខេត្តព្រះសីហនុ បានចុះពិនិត្យទីតាំងប្រតិបត្តិការរបស់ក្រុមហ៊ុនថុនធូថុននេះ ដែលផ្តោតទៅលើការប្រមូលសំណល់ប្លាស្ទិកក្នុងសមុទ្រ។
លោក ឡុង ឌីម៉ង់ បានថ្លែងប្រាប់បន្ថែមឱ្យដឹងនៅថ្ងៃទី១៤ សីហា ថា ក្រុមហ៊ុន ថុនធូថុនជាក្រុមហ៊ុនវិនិយោគឯកជនមួយមកពីប្រទេសអ៊ីស្រាអែល ដែលមានបច្ចេកវិទ្យាក្នុងការកិនផលិតផលប្លាស្ទិក ដែលត្រូវបានបោះចោលនៅតាមទីវាលសាធារណៈ និងពាសវាលពាសកាល តែមិនមែនយកពីទីលានចាក់សំរាមនោះទេ។
សំណល់ទាំងនោះ មានដូចជា កញ្ចប់ស្នោ ថង់ប្លាស្ទិក ថង់ទឹកអំពៅ ថង់ទឹកតែ ថង់កាហ្វេ ដបទឹកសុទ្ធ ឬផលិតផលប្លាស្ទិកដែលរប៉ាត់រប៉ាយ រសាត់អណ្តែតតាមសមុទ្រពីប្រទេសជិតខាង និងពីបណ្តាកោះមួយចំនួនជាដើម។
លោក ឡុង ឌីម៉ង់ បានបន្តថា ផលិតផលប្លាស្ទិកទាំងអស់នេះ ក្រុមហ៊ុនមានទុនគ្រប់គ្រាន់ក្នុងការប្រមូលទិញពីប្រជាពលរដ្ឋដើម្បីយកមកកិនកែច្នៃ ព្រោះក្រុមហ៊ុន មានម៉ាស៊ីនកិនកម្ទេចទៅជាបំណែកល្អិតតូចៗ ដើម្បីចម្អិនវាទៅជាក្តារបន្ទះ រួចច្នៃទៅជាគ្រឿងសង្ហារិមជាដើម និងខ្លះទៀតក៏ច្នៃទៅជាវត្ថុបែបសិល្បៈផងដែរ។
លោកបានប្រាប់ថា ៖ «មែនទែនទៅ រដ្ឋបាលខេត្តព្រះសីហនុ បានគាំទ្រ និងលើកទឹកចិត្តណាស់ ហើយក៏ខិតខំផ្សព្វផ្សាយដល់ប្រជាពលរដ្ឋឱ្យប្រមូលរបស់ទាំងអស់នេះដែរ។ អាហ្នឹងហើយ ដែលជាការរួមចំណែកកាត់បន្ថយប្លាស្ទិកនៅក្រៅធុងសំរាម ប្លាស្ទិកនៅក្រៅទីលានចាក់សំរាម»។
លោក ឡុង ឌីម៉ង់ បញ្ជាក់ថា ៖ «បងប្អូនប្រជាពលរដ្ឋ ឃើញហើយប្រមូលទុក ហើយយកមកលក់ឱ្យក្រុមហ៊ុន គាត់ទិញពីបងប្អូនយកទៅកែច្នៃ។ នេះ គឺជាចំណុចសំខាន់របស់យើង បានន័យថា កាន់តែមានការយល់ដឹង និងចូលរួមពីប្រជាពលរដ្ឋកាត់បន្ថយប្លាស្ទិក ដែលចោលតាមសាធារណៈ នៅតាមឆ្នេរ នៅតាមផ្លូវថ្នល់ និងនៅតាមផ្ទះជាដើម»។
ជាមួយគ្នានេះដែរ លោក ជុំ ហ៊ត ប្រធានសមាគមអ្នកស្រឡាញ់បរិស្ថាន និងសង្គម នៅថ្ងៃទី១៤ ខែសីហា ក៏បានថ្លែងដែរថា លោកគាំទ្រចំពោះក្រុមហ៊ុន ថុនធូថុន នេះ ដែលមានការប្រមូលទិញប្លាស្ទិកពីប្រជាពលរដ្ឋ ដើម្បីលើកកម្ពស់បរិស្ថាន និងការរស់របស់ប្រជាពលរដ្ឋនៅក្នុងខេត្តព្រះសីហនុឱ្យកាន់តែល្អប្រសើរបន្ថែមទៀតនៅពេលខាងមុខ។
លោកបន្តថា លោកធ្លាប់ធ្វើដំណើរទៅកាន់ខេត្តព្រះសីហនុ ឃើញប្រជាពលរដ្ឋរស់នៅតាមតំបន់អនាធិបតេយ្យ ជាពិសេសតំបន់ផ្លូវរថភ្លើង មានការចោលសសំរាមប្លាស្ទិកច្រើន ដែលធ្វើឱ្យប៉ះពាល់បរិស្ថានមួយផ្នែកធំ។
លោក ជុំ ហ៊ត បានប្រាប់ថា៖ «ដូច្នេះ នៅពេលដែលមានក្រុមហ៊ុនប្រមូលទិញប្លាស្ទិកទាំងនោះ ពលរដ្ឋរស់នៅតំបន់នោះអាចប្រមូលមកទុកសម្រាប់យកទៅលក់ឱ្យក្រុមហ៊ុន នោះវានឹងជួយដល់សេដ្ឋកិច្ច និងក្លាយទៅជាទម្លាប់របស់ប្រជាពលរដ្ឋក្នុងការទុកដាក់សំរាមប្លាស្ទិកបានល្អ។ មិនត្រឹមតែប៉ុណ្ណោះទីតាំងនោះ ក៏ល្អស្អាត គ្មានសំរាម។ ខ្ញុំយល់ថា វាជារឿងល្អដែលមានក្រុមហ៊ុនប្រមូលទិញប្លាស្ទិកនេះ»។
បើតាមរដ្ឋបាលខេត្តព្រះសីហនុ ក្រុមហ៊ុនថុនធូថុន បានបញ្ជាក់ថា ក្រុមហ៊ុន បានជួយប្រមូលសំណល់ប្លាស្ទិក គ្រប់ប្រភេទសរុបប្រមាណ ២០០តោនរៀងរាល់ខែ ហើយសម្រាប់សំណល់ប្លាស្ទិក ដែលគ្មានតម្លៃក្រុមហ៊ុនបានប្រើប្រាស់បច្ចេកវិទ្យាកិនរំលាយដើម្បីផលិតជាក្តារបន្ទះ ដែលអាចយកទៅធ្វើជាគ្រឿងសង្ហារិមទៀតផង។
អ្នកនាំពាក្យក្រសួងបរិស្ថាន លោក នេត្រ ភក្ត្រា និងមន្រ្តីនៃក្រុមហ៊ុន ថុនធូថុន មិនអាចទាក់ទងសុំព័ត៌មានបន្ថែមបានទេ នៅថ្ងៃទី១៤ ខែសីហា ឆ្នាំ២០២៣៕
