លោកនាយករដ្ឋមន្ត្រី ហ៊ុន ម៉ាណែត អញ្ជើញជួបសំណេះសំណាលជាមួយកម្មករ-កម្មការិនី នៅខណ្ឌពោធិ៍សែនជ័យ ម្សិលមិញ។ រូប HMN page
ភ្នំពេញៈ ក្នុងពេលជួបសំណេះសំណាលជាមួយកម្មករ-កម្មការិនី និយោជិត តាមរោងចក្រ សហគ្រាស ជិត ២ ម៉ឺននាក់ ដែលមានមូលដ្ឋាននៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ នៅព្រឹកថ្ងៃទី ២៩ ខែសីហា លោកនាយករដ្ឋមន្ត្រី ហ៊ុន ម៉ាណែត ថ្លែងថា គោលនយោបាយរបស់រាជរដ្ឋាភិបាលថ្មី នៅតែបន្តថែរក្សាឱ្យបាននូវអ្វីដែលរដ្ឋាភិបាលមុនសម្រេចបាន និងដាក់ចេញនូវគោលនយោបាយពង្រីកបន្ថែម ដើម្បីផ្តល់ប្រយោជន៍ជូនប្រជាពលរដ្ឋឱ្យបានកាន់តែប្រសើរ។
លោកនាយករដ្ឋមន្ត្រីបានលើកឡើងថា ការថែរក្សាសមិទ្ធផលដែលរដ្ឋាភិបាលអាណត្តិមុនៗសម្រេចបាន កត្តាសំខាន់បំផុតនោះ គឺថែរក្សាសុខសន្តិភាព ស្ថិរភាពជំរុញការអភិវឌ្ឍជូនប្រជាពលរដ្ឋ និងការឯកភាពជាតិ ទឹកដី។ លោកបញ្ជាក់ថា ការលើកឡើងដដែលៗនេះ ដោយសារតែនេះជារឿងសំខាន់ មិនត្រឹមតែរយៈពេលជាង ៤០ ឆ្នាំកន្លងមកនេះទេ ថ្ងៃនេះសន្តិភាពក៏នៅតែសំខាន់ ហើយរាប់រយឆ្នាំទៅថ្ងៃមុខទៀតក៏សន្តិភាពនៅតែសំខាន់ដែរ។
លោកបញ្ជាក់ថា គោលនយោបាយរបស់រាជរដ្ឋាភិបាល គឺមានភាពច្បាស់លាស់នឹងនរមានស្ថិរភាព ប៉ុន្តែអ្វីដែលប្រែប្រួលគឺផ្តល់ផលប្រយោជន៍ជូនប្រជាពលរដ្ឋកាន់តែកើនពី ១ អាណត្តិទៅ ១ អាណត្តិ។ គោលនយោបាយនេះ មិនមែនធ្វើឡើងដោយឆក់កណ្ដៀត ដូចគណបក្សនយោបាយមួយចំនួនដែលមានភាពមិនច្បាស់លាស់ម្តងយ៉ាងនេះម្តងយ៉ាងនោះ ធ្វើតាមអារម្មណ៍នោះទេ ប៉ុន្ដែជាគោលនយោបាយច្បាស់លាស់ គ្រប់ជ្រុងជ្រោយ មាននិរន្តរភាព និងមានរយៈពេលយូរអង្វែង សម្រាប់អភិវឌ្ឍជាតិ មាតុភូមិ។
លោកថ្លែងថា៖ «ដឹកនាំប្រទេសមិនអាចចេះតែម្តងធ្វើអ៊ីចេះ ម្តងធ្វើអ៊ីចុះទេ រលាយ ត្រូវការពេលវេលាដើម្បីអនុវត្តចេញជាផល អ៊ីចឹងវាត្រូវការស្ថិរភាព និងលំនឹងនយោបាយ។ គណបក្សប្រជាជនកម្ពុជាដាក់ចេញនូវគោលនយោបាយគិតគ្រប់ជ្រុងជ្រោយ ច្បាស់លាស់ហើយចក្ខុវិស័យវែងឆ្ងាយ យើងមានផែនការសកម្មភាពវែងឆ្ងាយ ដើម្បីធានានិរន្តរភាពបងប្អូន»។ មានអ្នកខ្លះចាំតែវិភាគមើលងាយគេ ជាពិសេសពេលណារដ្ឋាភិបាលដាក់ចេញគោលនយោបាយណាមួយចាំតែជេរនិងប្រើភាសាវាយប្រហារថា រាជរដ្ឋាភិបាលមិនចេះធ្វើការប៉ុន្តែខ្លួនបែរជាមិនបានយល់អ្វីដែលជាគោលនយោបាយច្បាស់លាស់របស់រាជរដ្ឋាភិបាលក៏ដូចជាគណបក្សប្រជាជនកម្ពុជាឡើយ។
លោកថ្លែងទៀតថា៖ «ខ្ញុំគិតថា បងប្អូនមានសិទ្ធិក្នុងការវិភាគ ប៉ុន្តែពិបាកដែរ បើសិនជាបងប្អូនមិនធ្លាប់ដឹកនាំ កសាង ផែនការគោលនយោបាយ និងអនុវត្តគោលនយោបាយ បងប្អូនប្រហែលគ្មានលក្ខណសម្បត្តិគ្រប់គ្រាន់ដើម្បីវាយតម្លៃបន្តុះបង្អាប់អ្នកដែលចេញគោលនយោបាយ អនុវត្តគោលនយោបាយរាប់សិបឆ្នាំដោយជោគជ័យនោះទេ»។
គោលនយោបាយដែលរាជរដ្ឋាភិបាលដាក់ចេញ មិនមែនយកគោលនយោបាយដែលមានពីមុនទាំងស្រុងទេ គឺ «យកគោលនយោបាយមុនជាមូលដ្ឋាន ហើយកែសម្រួលសម្រួចមុំនិងផ្តល់អាទិភាពទៅចំណុចណាមួយ»ជាក់ស្តែងយុទ្ធសាស្ត្រចតុកោណ មិនមានដាក់បញ្ចូលបច្ចេកវិទ្យាទេ ប៉ុន្តែឥឡូវចូលក្នុងដំណាក់កាលបច្ចេកវិទ្យាទំនើប រាជរដ្ឋាភិបាលត្រូវអភិវឌ្ឍបន្ថែមនូវគោលនយោបាយទំនើបគឺប្រព័ន្ធបច្ចេកវិទ្យាឌីជីថល។ លោកថ្លែងថា៖ «ពីមុនយើងមាន មនុស្ស ផ្លូវ ទឹក ភ្លើង ឥឡូវយើងមាន ៤ ហ្នឹងបូកជាមួយបច្ចេកវិទ្យា ១ ទៀត ដើម្បីឱ្យប្រជាពលរដ្ឋយើងទំនើបកម្ម»។
គោលនយោបាយដែលកម្ពុជាបានដាក់ចេញរយៈពេលជាច្រើនឆ្នាំកន្លងមកជាគោលនយោបាយដើរដែលបានផ្តល់ជូននូវកំណើនសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាពលរដ្ឋ។ ជាក់ស្តែងកំណើនសេដ្ឋកិច្ចតាំងពីឆ្នាំ ១៩៩៨ មកដល់បច្ចុប្បន្ន គឺមានការរីកលូតលាស់លឿនរហ័ស។
ហាង Gogi ទទួលបានការពេញនិយមចំពោះសាច់អាំងកូរ៉េ តម្រូវរសនិយមខ្មែរ។ រូបថត យូសុះ អាប់ឌុលរ៉ាស់ហ៊ីម
កម្ពុជាបានកាត់បន្ថយអត្រានៃភាពក្រីក្ររបស់ប្រជាជនពីឆ្នាំ ២០០០ មកដល់ឆ្នាំ ២០២០ ធ្លាក់ចុះពី៦០ភាគរយ មកដល់ ១៧,២០ ភាគរយ។ នៅឆ្នាំ ១៩-៩៨ ពលរដ្ឋធ្វើការបានប្រាក់ខែតែ ៤០ ដុល្លារ តែពេលនេះ ប្រាក់ខែ ២០០ ដុល្លារ បូកនឹងអត្ថប្រយោជន៍ផ្សេងទៀត។ លោកថ្លែងទៀតថា៖«អ្វីដែលសំខាន់ខ្ញុំថា បើគោលនយោបាយវាដើរហើយ ធ្វើឱ្យសេដ្ឋកិច្ចជាតិរីកចម្រើនហើយ ធ្វើឱ្យផលលាភចែកដល់ដៃប្រជាពលរដ្ឋហើយ យើងមិនត្រូវដូរវាទេ តែត្រូវពង្រឹងពង្រីកសក្តានុពល ឱ្យប្រជាពលរដ្ឋឱ្យកាន់តែច្រើន»។
លោកលើកឡើងបន្ថែមថា ក្នុងរយៈពេល ២០ ឆ្នាំដែលកម្ពុជា បានដាក់ចេញគោលនយោបាយនេះការពង្រីកបន្ថែមនូវផលប្រយោជន៍ជូនប្រជាពលរដ្ឋកាន់តែកើនឡើងដោយក្នុងឆ្នាំ ១៩៩៧ កម្ពុជាមាន ៦៤ រោងចក្រ សហគ្រាស ប៉ុន្តែនៅឆ្នាំ ២០២៣ នេះ កម្ពុជាមាន ១៧ ០០០ រោងចក្រសហគ្រាសទូទាំងប្រទេស ដែលក្នុងវិស័យកាត់ដេរមាន ១ ៣៣២ រោងចក្រសហគ្រាស។ នៅឆ្នាំ ១៩៩៧ កម្ពុជាមានកម្មករតែ ៨ ម៉ឺននាក់ប៉ុណ្ណោះដែលមានការងារធ្វើប៉ុន្តែឥឡូវមានរហូតដល់ ១ លាន ៥ សែននាក់ ដែលនៅក្នុងវិស័យកាត់ដេរមាន ៨៣ ម៉ឺននាក់។
ក្រៅពីនេះ លោក ហ៊ុន ម៉ាណែត លើកឡើងថា មានមតិខ្លះលើកឡើងថារដ្ឋាភិបាលថ្មីដែលមានរូបលោកកាន់តំណែងជានាយករដ្ឋមន្ត្រី កើតឡើងដោយគ្មានការគាំទ្រពីអន្តរជាតិណាមួយគាំទ្រនោះទេមានតែប្រទេសមួយចំនួនដែលផ្តាច់ការប៉ុណ្ណោះ។ លោកថា ការមិនគាំទ្រលុះត្រាតែប្រទេសអន្តរជាតិគេដកទូតចេញពីប្រទេស តែនេះមិនមែនទេ។ មានថ្នាក់ដឹកនាំអន្តរជាតិជាច្រើនបានផ្ញើសារអបអរសាទរ ក្នុងនោះមាននាយករដ្ឋមន្ត្រីចិន ជប៉ុន កូរ៉េខាងត្បូង រុស្ស៊ី ឥណ្ឌា អ៊ុយក្រែន កូរ៉េខាងជើង ឡាវ តួកគី សិង្ហបុរី ថៃ ជាដើម។
ឆ្លើយតបបន្ថែមចំពោះមតិមួយចំនួនដែលថា រាជរដ្ឋាភិបាលមិនមានការគាំទ្រពីអន្តរជាតិ លោក ហ៊ុន ម៉ាណែត បញ្ជាក់ថា ប្រធានគណៈកម្មការអឺរ៉ុប លោកស្រី Ursula von der Leyen បានផ្ញើសារអបអរសាទរដល់រូបលោកក្នុងឱកាសចូលកាន់តំណែងជា នាយករដ្ឋមន្ត្រីថ្មីរបស់កម្ពុជា ក្រៅពីនេះក៏មានទាំងធនាគារអភិវឌ្ឍន៍អាស៊ី និងអាមេរិកផងដែរ។
លោកបញ្ជាក់ថា យ៉ាងណាក៏នៅមានអ្នកកើតទុកមិនសុខចិត្ត និងនាំគ្នាធ្វើបាតុកម្មប្រឆាំងនៅក្រៅប្រទេស កុំឱ្យអង្គការសហប្រជាជាតិទទួលស្គាល់រដ្ឋាភិបាលថ្មី។ លោកនាយករដ្ឋមន្ត្រីថា លោកគ្មានពេលឈ្លោះជាមួយអ្នកទាំងនោះទេ ពេលវេលាមានតែ ២៤ ម៉ោង លោកទុកសម្រាប់ប្រជុំដឹកនាំរាជរដ្ឋាភិបាល និងគិតគូរដោះស្រាយបញ្ហាសុខទុក្ខរបស់ប្រជាពលរដ្ឋ។ លោកថា រាជរដ្ឋាភិបាលក្រោមការគ្រប់គ្រងរបស់លោក បានបង្កើតក្រុមអ្នកនាំពាក្យនាយករដ្ឋមន្ត្រីគឺដើម្បីឆ្លើយតបទៅនឹងការវាយប្រហារមកលើនាយករដ្ឋមន្ត្រី។ ដូច្នេះ លោកសូមផ្តាំទៅក្រុមប្រឆាំង ១ ក្រុមតូច ដែលចង់ឈ្លោះឬចង់វាយប្រហារមកលើនាយករដ្ឋមន្ត្រី សូមទាក់ទងទៅអ្នកនាំពាក្យ។
លោក ហ៊ុន ម៉ាណែត ថ្លែងថា៖«ឥឡូវនេះ ខ្ញុំបង្កើតអ្នកនាំពាក្យខុទ្ទកាល័យនាយករដ្ឋមន្ត្រី អ្នកណាចង់ឈ្លោះជាមួយខ្ញុំ ចាំឈ្លោះជាមួយអ្នកនាំពាក្យខ្ញុំទៅ»។
លោកនាយករដ្ឋមន្ត្រី ក៏បានប្រកាសទទួលយករាល់មតិរិះគន់ដើម្បីស្ថាបនាបម្រើផលប្រយោជន៍ជាតិ ប៉ុន្តែនឹងមិនគាំទ្រការវាយប្រហារណាមួយដើម្បីជាន់ពន្លិចនោះទេ។ «ខ្ញុំធ្វើ ខ្ញុំទទួលខុសត្រូវ ការរិះគន់ដើម្បីស្ថាបនាគ្រប់ទាំងអស់ខ្ញុំទទួល តែការវាយប្រហារបង្កើតរឿង ប្រឌិតរឿងអត់ប្រយោជន៍ ខ្ញុំនឹងមិនឆ្លើយតបនាំខាតពេលខ្ញុំ»។
លោក រ៉ុង ឈុន អនុប្រធានគណបក្សភ្លើងទៀន បានថ្លែងនៅថ្ងៃទី ២៩ ខែសីហាថា ជាធម្មតា ក្រុមប្រឆាំង មិនមានបំណងណាមួយធ្វើឱ្យប៉ះពាល់ទៅដល់រាជរដ្ឋាភិបាលឬក៏នាយករដ្ឋមន្ត្រីនោះទេ ប៉ុន្តែត្រូវតែមានការជជែកគ្នា និងបើកចំហចំពោះសេរីភាពដល់គណបក្សក្រៅរដ្ឋាភិបាល ដូចជាគណបក្សភ្លើងទៀនជាដើម។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា ថ្លែងថា លោកគាំទ្រចំពោះការលើកឡើងរបស់លោក ហ៊ុន ម៉ាណែត ព្រោះលោកនាយករដ្ឋមន្ត្រីនៅក្នុងអាណត្តិទី ៧ ត្រូវតែមានការផ្លាស់ប្តូរនិងមិនគួរមានពេលវេលាឆ្លើយតបទៅនឹងក្រុមអ្នករិះគន់ប្រឆាំងផ្កាប់មុខច្រើននោះទេដែលបញ្ហានេះគួរតែឱ្យអ្នកបច្ចេកទេស ឆ្លើយតបទៅតាមជំនាញនីមួយៗវិញ។ លោកថ្លែងថា បើសិនជានាយករដ្ឋមន្ត្រីចេះតែឆ្លើយគ្រប់រឿង នោះហាក់ដូចជាមិនបានយកពេលវេលាទៅបំពេញការងារបានច្រើននោះទេ៕
