លោក ម៉េង ហុង ដឹកនាំកិច្ចប្រជុំ កាលពីថ្ងៃទី ២៨ ខែសីហា។ រូបថត ប.ស.ស.
ភ្នំពេញៈ បេឡាជាតិរបបសន្តិសុខសង្គម (ប.ស.ស.) ត្រៀមដាក់ឱ្យអនុវត្តផែនការយុទ្ធសាស្ត្រអភិវឌ្ឍន៍វិស័យការងារ របបសន្តិសុខសង្គម និងបណ្តុះបណ្តាលវិជ្ជាជីវៈរយៈពេល ៥ ឆ្នាំ ដែលជាផ្នែកមួយសំខាន់សម្រាប់ពង្រីកវិសាលភាពបន្ថែមដល់សមាជិកគ្រួសារ និងអ្នកនៅក្នុងបន្ទុករបស់សមាជិក ប.ស.ស. ឱ្យមានលទ្ធភាពទទួលបានរបបសន្ដិសុខសង្គមផ្នែកថែទាំសុខភាព។
យោងតាមហ្វេសប៊ុកផ្លូវការរបស់ ប.ស.ស. បានឱ្យដឹងពីថ្ងៃទី ២៨ ខែសីហាថា ប.ស.ស. បានបើកកិច្ចប្រជុំស្តីពីការត្រៀមខ្លួនអនុវត្តផែនការយុទ្ធសាស្ដ្ររបស់ខ្លួនដែលស្ថិតនៅផែនការយុទ្ធសាស្ដ្រទី៥ នៃផែនការយុទ្ធសាស្ត្រអភិវឌ្ឍន៍វិស័យការងាររបបសន្តិសុខសង្គម និងបណ្តុះបណ្តាលវិជ្ជាជីវៈរយៈពេល ៥ ឆ្នាំ (២០២៣-២០២៨) ស្តីពីការពង្រឹងរបបសន្ដិសុខសង្គម។
កិច្ចប្រជុំនេះដឹកនាំដោយលោក ម៉េង ហុង អគ្គនាយកស្តីទីនៃ ប.ស.ស. និងមានការចូលរួមពីថ្នាក់ដឹកនាំ និងមន្ត្រីពាក់ព័ន្ធប្រមាណ ១០០ នាក់ផងដែរ។ លោក ម៉េង ហុង បានថ្លែងថា ការចូលរួមអនុវត្តតាមផែនការយុទ្ធសាស្ត្ររយៈពេល ៥ ឆ្នាំនេះគឺជាផ្លូវដើរមួយដ៏មានសារៈសំខាន់សម្រាប់ប្រតិបត្តិការពង្រឹង និងអភិវឌ្ឍន៍របបសន្ដិសុខសង្គមឆ្ពោះទៅរកការគ្របដណ្ដប់ជាសកលពិសេសការពង្រីកវិសាលភាពបន្ថែមទៅដល់សមាជិកគ្រួសារ និងអ្នកនៅក្នុងបន្ទុកមានលទ្ធភាពទទួលបានរបបសន្ដិសុខសង្គមផ្នែកថែទាំសុខភាព។
លោកបានបន្តថា ដើម្បីសម្រេចបានជោគជ័យក្នុងផែនការយុទ្ធសាស្ដ្រនេះ អង្គភាពពាក់ព័ន្ធក្នុង ប.ស.ស.ត្រូវខិតខំប្រឹងប្រែងអនុវត្តការងារ និងពង្រីកការគ្របដណ្ដប់ឱ្យមានប្រសិទ្ធភាពស្របតាមសូចនាករដែលបានដាក់ចេញ ។
លោក ម៉េង ហុង បានបញ្ជាក់ថា៖ «យើងសង្ឃឹមយ៉ាងមុតមាំថា ប្រធានអង្គភាពគ្រប់សាខា ប.ស.ស. ខេត្តខណ្ឌទាំងអស់នឹងបន្ដកិច្ចសហការសាមគ្គីផ្ទៃក្នុងអង្គភាពឱ្យល្អប្រសើរបន្ថែមទៀត ពិសេសបំពេញការងាររបស់ខ្លួនប្រកបដោយការទទួលខុសត្រូវ ទន់ភ្លន់ និងម៉ឺងម៉ាត់ក្នុងការផ្ដល់សេវា និងអត្ថប្រយោជន៍ជូនដល់សមាជិកខ្លួន»។
ដោយឡែកលោក គង់ អាទិត្យ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) បានថ្លែងថា ប្រសិនបើ ប.ស.ស. មានផែនការពង្រីកវិសាលភាពបន្ថែមដល់សមាជិកគ្រួសារ និងអ្នកនៅក្នុងបន្ទុករបស់សមាជិក ប.ស.ស.ឱ្យទទួលបានរបបថែទាំសុខភាពគឺវាជារឿងល្អ និងគួរតែស្វាគមន៍។
លោកបានបន្តថា ប៉ុន្តែស្របពេលដែលប.ស.ស.ត្រៀមអនុវត្តផែនការយុទ្ធសាស្ត្របែបនេះ លោកចង់ឱ្យប.ស.ស.ក៏ត្រូវពង្រឹងសេវាថែទាំសុខភាពរបស់សមាជិកខ្លួនផងដែរ ពីព្រោះកន្លងមកមានមន្ទីរពេទ្យដៃគូ និងមន្ទីរពេទ្យរបស់រដ្ឋខ្លះបានបម្រើសេវាមានភាពយឺតយ៉ាវ ពិសេសមិនបានឆ្លើយតបទាន់ពេលវេលាជូនដល់សមាជិកដែលកាន់បណ្ណ ប.ស.ស.ដែរ។
លោក គង់ អាទិត្យ បានបញ្ជាក់ថា៖ «ដូច្នេះខ្ញុំគិតថា បើយើងបង្កើនបរិមាណយើងត្រូវបង្កើនគុណភាពពីព្រោះបរិមាណត្រូវដើរជាមួយគុណភាពដែលមានន័យថា សេវាថែទាំសុខភាពដែលផ្ដល់ជូនសមាជិកខ្លួនត្រូវឆ្លើយតបទាន់តម្រូវការ ពីព្រោះយើងដឹងហើយថា ពេទ្យនៅតាមឃុំ តាមស្រុក តាមខេត្តអី គឺវានៅមិនទាន់មានគុណភាពល្អនោះទេ»។
លោកបន្ថែមថា បើប្រៀបធៀបសេវាថែទាំសុខភាពជាមួយប្រទេសថៃ គឺវិស័យសុខាភិបាលរបស់គេដើរនៅក្នុងកម្រិតស្ដង់ដាមួយល្អ។លោក គង់ អាទិត្យ បានបន្ថែមថា៖ «ដូច្នេះនៅកម្ពុជា ទាំងក្រសួងសុខាភិបាល និងក្រសួងការងារគឺត្រូវធ្វើការយ៉ាងសកម្ម និងត្រូវមានកញ្ចប់ថវិកាមួយ ដើម្បីពង្រឹងវិស័យសុខាភិបាល ទោះបីជាមានស្រុក ក្រុង ខេត្តខ្លះ បានបម្រើសេវាល្អហើយ ប៉ុន្តែនៅមានស្រុក ក្រុង ខេត្តមួយចំនួនទៀតការបម្រើសេវាជូនសមាជិក ប.ស.ស.នៅមិនទាន់មានភាពល្អប្រសើរនៅឡើយទេ»៕
