លោក ហ៊ុន សែន នាពេលកន្លងមក។ រូបថត ហ្វេសប៊ុក Samdech Hun Sen of Cambodia
ភ្នំពេញៈ លោក ហ៊ុន សែន ប្រធានក្រុមឧត្ដមប្រឹក្សាផ្ទាល់ព្រះមហាក្សត្របានប្រកាសប្រើប្រាស់ហ្វេសប៊ុក (Facebook) ឡើងវិញ ក្រោយពីលោកបានប្រកាសឈប់ប្រើបណ្តាញសង្គមមួយនេះអស់ពេលប្រមាណ ២ ខែ ដោយសារមានការស្នើពីមនុស្សក្នុងក្រុមហ៊ុនឱ្យផ្អាកហ្វេសប៊ុករបស់លោក តែទីបំផុតត្រូវបានទាត់ចោល។
លោក ហ៊ុន សែន អតីតនាយករដ្ឋមន្ត្រី បានបញ្ជាក់នៅលើហ្វេសប៊ុកនៅថ្ងៃទី ៣ ខែកញ្ញាថា៖ «ខ្ញុំសម្រេចមកប្រើប្រាស់ Facebook វិញគួបផ្សំជាមួយ Twitter, YouTube, TikTok, Telegram, Instagram បន្ទាប់ពីក្រុមហ៊ុន Facebook ទាត់ចោលអនុសាសន៍របស់ក្រុមមនុស្សខូចនិងផ្តល់យុត្តិធម៌សម្រាប់រូបខ្ញុំ»។
លោកបញ្ជាក់បន្ថែមថា៖ «ខ្ញុំសង្ឃឹមថា ក្រុមហ៊ុន Facebook នឹងប្រកាន់ខ្ជាប់នូវក្រមសីលធម៌មិនងងឹតងងុលដូចក្រុមមនុស្សខូចដែលជាមនុស្សមិនត្រូវបានស្វាគមន៍នៅកម្ពុជានោះឡើយ»។
ជាមួយនេះ លោក ហ៊ុន សែន បានបង្ហាញក្ដីសង្ឃឹមដែរថា ក្រុមហ៊ុនហ្វេសប៊ុកនឹងទទួលបានប្រាក់ចំណេញលើស ២០០ លានដុល្លារ ក្នុង ១ ឆ្នាំនៅកម្ពុជា ឯរាជរដ្ឋាភិបាលទទួលបាន ១០ ភាគរយដែលមានទឹកប្រាក់លើស ២០ លានដុល្លារក្នុង ១ ឆ្នាំ ដោយយោងទៅលើតួលេខផ្នែកពន្ធដារ។
លោកបានបញ្ជាក់ថា៖ «ក្រសួងប្រៃសណីយ៍ និងទូរគមនាគមន៍បានចេញសេចក្តីប្រកាសទទួលយកតំណាងក្រុមហ៊ុន Facebook ឱ្យចូលមកធ្វើការនៅកម្ពុជាវិញ តែមិនស្វាគមន៍ក្រុមមនុស្សខូចដែលផ្តល់អនុសាសន៍មិនត្រឹមត្រូវនោះឡើយ»។
លោកប្រធានក្រុមឧត្ដមប្រឹក្សាផ្ទាល់ព្រះមហាក្សត្របានបញ្ជាក់បន្ថែមថា៖ «ការសម្រេចប្រើឬមិនប្រើ Facebook គឺជាសិទ្ធិផ្តាច់មុខរបស់ខ្ ញុំ(only one Hun Sen)។ ចាប់ពីពេលនេះទៅបងប្អូនអាចរកខ្ញុំឃើញនៅគ្រប់បណ្តាញសង្គម តែភាគច្រើនខ្ញុំនៅជាមួយ TikTok និងTelegram»។
ជាថ្មីម្តងទៀត លោក ហ៊ុន សែន បានអំពាវនាវចំពោះអ្នកដែលប្រើឈ្មោះលោកបង្កើត Facebook និងTikTokក្ លែងក្លាយឱ្យលុបចោលជាបន្ទាន់ដើម្បីចៀសវាងការភាន់ច្រឡំ។កាលពីយប់ថ្ងៃទី ២៩ ខែមិថុនា ឆ្នាំនេះ លោកហ៊ុន សែន ធ្លាប់បានប្រកាសឈប់ប្រើប្រាស់បណ្តាញសង្គមហ្វេសប៊ុករបស់លោក និងស្នើការយោគយល់ពីអ្នករាប់អានលោកតាមហ្វេសប៊ុកភ្ជាប់ទៅបណ្តាញតេឡេក្រាម (Telegram) និងតិកតុក (TikTok) ជំនួសវិញដើម្បីទទួលបានព័ត៌មាន និងយោបល់ផ្សេងៗ។
លោក ហ៊ុន សែន បានបញ្ជាក់តាមរយៈតេឡេក្រាម (Telegram) របស់លោកនាពេលនោះថា៖ «បងប្អូនជនរួមជាតិជាទីស្រឡាញ់! ដោយសាររយៈពេលកន្លងមកមានការក្លែងបន្លំគណនីហ្វេសប៊ុក (Facebook) ខ្ញុំជាច្រើនដែលមានរហូតជាង ២០ ដែលធ្វើឱ្យមានការភាន់ច្រឡំពីអ្នកប្រើប្រាស់ Facebook ដូចគ្នា។ ម្យ៉ាងទៀតមួយរយៈពេលចុងក្រោយនេះខ្ញុំបានរកឃើញបណ្តាញទំនាក់ទំនងដែលមានប្រសិទ្ធភាពជាងគឺបណ្តាញតេឡេក្រាម (Telegram) ដែលមិនបារម្ភពីការចូលលួចដូច Facebook។អាស្រ័យហេតុនេះខ្ញុំសម្រេចបញ្ឈប់ជាស្ថាពរពីការប្រើប្រាស់ Facebook ដែលមានអ្នកចូលរួមជាង ១៤ លាននាក់»។
លោក ថុង ម៉េងដាវិត អ្នកសិក្សាស្រាវជ្រាវនៅមជ្ឈមណ្ឌលមេគង្គសម្រាប់ការសិក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ី (AVI) បានប្រាប់ ភ្នំពេញ ប៉ុស្តិ៍ នៅថ្ងៃទី ៣ ខែកញ្ញាថា ការប្រើប្រាស់ហ្វេសប៊ុកឡើងវិញរបស់លោក ហ៊ុន សែន គឺជារឿងល្អ និងជាវិធីសាស្ត្រដ៏ល្អក្នុងការផ្សារភ្ជាប់ជាមួយនឹងប្រជាជន និងដើម្បីបន្តតាមដានសុខទុក្ខរបស់ប្រជាពលរដ្ឋ។
លោកបានថ្លែងថា៖ «បើទោះបីជាសម្តេច ហ៊ុន សែន បានទទួលភារកិច្ចថ្មីក៏ដោយ ក៏សម្តេចនៅតែបន្តយកចិត្តទុកដាក់លើសុខុមាលភាពរបស់ប្រជាជន និងនៅតែជាបង្អែកដែលខ្វះមិនបានរបស់ប្រទេសជាតិ។ សម្តេចនៅតែបន្តតួនាទីជាចាស់ទុំ ជាទីប្រឹក្សា និងមគ្គុទ្ទេសក៍ដ៏ឆ្នើមសម្រាប់រាជរដ្ឋាភិបាលថ្មី»។
ចំណែកលោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជាថ្លែងប្រាប់ ភ្នំពេញ ប៉ុស្តិ៍ នៅថ្ងៃទី ៣ ខែកញ្ញាថា លោកសាទរចំពោះការប្រកាសប្រើហ្វេសប៊ុកឡើងវិញរបស់លោក ហ៊ុន សែន។
កន្លងទៅលោក ហ៊ុន សែន ក៏មិនបានបិទហ្វេសប៊ុកនេះដែរ ដោយជំនួយការរបស់លោកជាអ្នកប្រើប្រាស់។ លោកថ្លែងថា៖ «ឥឡូវសម្ដេចប្រកាសថា សម្តេចប្រើដោយផ្ទាល់របស់សម្ដេចវិញ។ អ៊ីចឹង ខ្ញុំអបអរសាទរពីព្រោះមហាជនប្រជាពលរដ្ឋខ្មែរទាំងមូលរួមទាំងអន្តរជាតិផងដែរ គឺតាមដានហ្វេសប៊ុករបស់សម្ដេចបើទោះជាសម្ដេចចូលនិវត្តន៍ពីនាយករដ្ឋមន្ត្រី ក៏ប៉ុន្តែនៅតែមានទស្សនៈគំនិតល្អៗនៅក្នុងទស្សនៈដឹកនាំនៅក្នុងទស្សនៈផ្សេងៗទៀតចំពោះសង្គមជាតិក៏ដូចជាប្រជាពលរដ្ឋដែរក៏ដូចជានៅមានការអន្តរាគមន៍ខ្លះដែលត្រូវការបញ្ចេញសារនយោបាយតាមរយៈហ្វេសប៊ុករបស់សម្តេចផ្ទាល់ដែរ»។
លោក យង់ ពៅ បានបន្ថែមថា ការប្រើហ្វេសប៊ុកឡើងវិញនេះ គឺជាយន្តការមួយបន្ថែមទៀតដ្បិតតែឥឡូវ កម្ពុជាមាននាយករដ្ឋមន្ត្រីថ្មី ក៏ប៉ុន្តែប្រជាជននៅតែតាមដានហ្វេសប៊ុករបស់លោក ហ៊ុន សែន ច្រើន និងក៏ជាការល្អផងដែរដើម្បីប្រជាពលរដ្ឋអាចនៅតាមដានបាននិងបញ្ចេញប្រតិកម្មទស្សនៈ និងសំណូមពរបានតាមរយៈហ្វេសប៊ុកនេះ៕
