កសិករស្រូវត្រយងចូកជីកំប៉ុសដែលពួកគាត់ផលិតដាក់ការុង។ រូប អង្គការម្លប់ព្រៃ
ព្រះវិហារៈ កសិករស្រូវត្រយងមកពីភូមិចំនួន ៣ ក្នុងខេត្ដព្រះវិហារ រួមគ្នាផលិតជីកំប៉ុសធម្មជាតិបានជាង ២១ តោន ដែលជាលទ្ធផលសម្រេចបានក្នុងទ្រង់ទ្រាយធំជាលើកដំបូងប្រចាំឆ្នាំ ខណៈជីកំប៉ុសដែលផលិតបានត្រូវបានចែកជូនទៅដល់កសិករជាសមាជិកចំនួន ១៧ គ្រួសារ សម្រាប់ប្រើប្រាស់ ដើម្បីកាត់បន្ថយថ្លៃចំណាយ និងចៀសឱ្យឆ្ងាយការប្រើប្រាស់ជីគីមី។
អង្គការសន្សំម្លប់ព្រៃបានប្រកាសពីភាពជោគជ័យនេះ បន្ទាប់ពីអ្នកភូមិទទួលបានការបង្ហាត់បង្ហាញពីបច្ចេកទេសក្នុងការផលិតជីកំប៉ុស ហើយនេះជាឆ្នាំដំបូងគេបង្អស់ ដែលកសិករបានផលិតជីនេះឡើង តាមរយៈការផ្ដល់ជំនួយដល់អង្គការសន្សំម្លប់ព្រៃពីគម្រោង CEPF សម្រាប់កសិករសមាជិកស្រូវត្រយងក្នុងខេត្ដព្រះវិហារ។
អង្គការសន្សំម្លប់ព្រៃបញ្ជាក់ថា៖ «ការអនុវត្ដគម្រោងនេះ មានគោលបំណងចង់ឱ្យកសិករជាសមាជិកក្នុងតំបន់នោះ ទទួលបានការបង្ហាត់បង្ហាញពីបច្ចេកទេសក្នុងការផលិតជីកំប៉ុស និងបច្ចេកទេសក្នុងការដាំដុះដំណាំបន្ទាប់បន្សំបន្ថែមទៀត ដូចជារមៀតជាដើម នៅចន្លោះដំណាំស្វាយចន្ទី ដើម្បីបង្កើនប្រសិទ្ធភាពនៃការប្រើប្រាស់ដីឱ្យអស់លទ្ធភាព និងបង្កើនប្រាក់ចំណូល»។
អង្គការសន្សំម្លប់ព្រៃ លើកឡើងថា ១ វិញទៀត គម្រោងនេះ ក៏ចង់ឱ្យកសិករជាសមាជិកមានជីធម្មជាតិ ប្រើប្រាស់គ្រប់គ្រាន់ ដើម្បីកាត់បន្ថយការចំណាយទៅលើការទិញជី និងជួយឱ្យទិន្នផលស្រូវ មានការកើនឡើងជាបន្ដបន្ទាប់ ជាពិសេសចៀសឱ្យឆ្ងាយពីការប្រើប្រាស់ជីគីមី ដែលខុសពីគោលការណ៍នៃការអភិរក្ស។
បើតាមអង្គការសន្សំម្លប់ព្រៃ ជីកំប៉ុស ដែលផលិតបានជាង ២១ តោននេះ ត្រូវបានចែកជូនទៅដល់កសិករជាសមាជិកចំនួន ១៧ គ្រួសារ ដែលមកពីភូមិដងផ្លិត ភូមិត្មាតប៉ើយ និងភូមិព្រៃវែង ស្ថិតក្នុងខេត្តព្រះវិហារ សម្រាប់ប្រើប្រាស់ក្នុងដំណាំស្រូវ និងដំណាំបន្ទាប់បន្សំផ្សេងទៀតរបស់ពួកគាត់។
លោក សួស វុឌ្ឍី អ្នកសម្របសម្រួលក្សេត្រសាស្ដ្រថ្នាក់ជាតិនៃអង្គការសន្សំម្លប់ព្រៃ បានប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែកញ្ញាបន្ថែមថា ជីកំប៉ុសទាំងនេះ ត្រូវបានបង្កើតឡើងដោយកសិករ ១ ក្រុមតូចៗ តាមភូមិនីមួយៗ ហើយក្នុងពេលនេះ កសិករ ក៏កំពុងបន្តប្រមូលគ្រឿងផ្សំជុំវិញសហគមន៍ពួកគាត់ ដែលមានដូចជាលាមកគោ និងដើមទន្រ្ទានខែត្រ ដើម្បីផលិតជីកំប៉ុសនេះបន្តទៀត នៅឆ្នាំទី ២។
លោក បញ្ជាក់ថា៖«ការប្រើបច្ចេកទេសផលិតជីកំប៉ុសនេះជួយឱ្យគុណភាពដំណាំស្រូវរបស់កសិករមានសុខភាពល្អ ទទួលបានសារធាតុចិញ្ចឹមគ្រប់គ្រាន់ ដែលនាំឱ្យទិន្នផលមានការកើនឡើង។ ទិន្នផលកើនឡើងនឹងលើកទឹកចិត្តកសិករឱ្យចូលរួមកម្មវិធីស្រូវត្រយង»។
ជាមួយនឹងលទ្ធផលសម្រេចបាននេះ លោក សួស វុឌ្ឍី បាននិយាយថា គម្រោងនេះ ក៏នឹងបន្តបង្កើនចំនួនអ្នកផលិតជីកំប៉ុសនៅក្នុងភូមិទាំងនេះបន្ថែមទៀត ដើម្បីឱ្យប្រជាកសិករប្រើប្រាស់ជីកំប៉ុស អនុវត្តលើដំណាំទាំងអស់ ដែលពួកគាត់កំពុងមាន ដូចជា ស្រូវ ស្វាយចន្ទី ដំឡូងមី បន្លែ ឬដំណាំផ្សេងៗទៀត។ ដើម្បីបង្កើនសកម្មភាពទាំងនេះ លោកសង្កត់ធ្ងន់ថា គម្រោង ក៏នៅតែផ្តល់ការគាំទ្រផ្នែកបច្ចេកទេសកាន់តែច្រើន និងស៊ីជម្រៅដល់ពួកគាត់លើការផលិតជីកំប៉ុស និងបច្ចេកទេសផ្សេងទៀត ដើម្បីភាពធន់ និងឆ្លើយតបនឹងការប្រែប្រួលអាកាសធាតុដោយផ្អែកលើសរីរាង្គ និងការអភិរក្ស។
លោកពន្យល់ថា៖ «កសិកររបស់យើងគឺជាកសិករស្រូវ IBIS ដែលជាកសិករសរីរាង្គ។ ដូច្នេះ ពួកគាត់ ប្រើប្រាស់លាមកគោយកទៅដាក់ក្នុងដំណាំស្រូវផ្ទាល់តែម្តង។ ប៉ុន្តែបន្ទាប់ពីមានការគាំទ្រពីបុគ្គលិកកសិកម្មរបស់ SMP ពួកគាត់ អាចផលិតជីកំប៉ុស ដែលពួកគាត់មាននៅជុំវិញផ្ទះ និងសហគមន៍របស់ពួកគាត់ ដើម្បីចៀសវាងពីការបញ្ចូលសារធាតុគីមី ដែលនាំឱ្យប៉ះពាល់ដល់បរិស្ថាន សុខភាព និងបង្កើនការទូទាត់លើថ្លៃដើមផលិតកម្មជាដើម»។
គម្រោងស្រូវត្រយង គឺជាគម្រោងធំ ១ ក្នុងចំណោមគម្រោងរេដបូក ដែលជាកម្មវិធីជាតិ ដើម្បីកាត់បន្ថយការបំភាយឧស្ម័នផ្ទះកញ្ចក់ពីការបាត់បង់ និងរេចរឹលព្រៃឈើខណៈគម្រោងស្រូវត្រយង គឺតម្រូវឱ្យកសិករដែលជាសមាជិកស្រូវត្រយងទាំងអស់ អនុវត្តតាមគោលការណ៍សំខាន់ៗមួយចំនួន ដើម្បីផ្សារភ្ជាប់ជាមួយនឹងការគោរពលើបរិស្ថាន ការពារធនធានធម្មជាតិ៕
