ក្រុមឪម៉ាល់អេហ្វស៊ី លើកពានបន្ទាប់ពីឈ្នះការប្រកួតបាល់ទាត់ក្នុងសាលថ្នាក់ជាតិ ឆ្នាំ២០២៣ (Tiger Futsal Cup 2023) កាលពីយប់ថ្ងៃទី១០ ខែកញ្ញា។ រូបថត ហ្វេសប៊ុក
ភ្នំពេញៈក្រុមហ្វុតសាល ដែលមានអាយុកាលចាស់វស្សាជាងគេ ប្រចាំនៅប្រទេសកម្ពុជា ឪម៉ាល់អេហ្វស៊ី ទើបតែរកឃើញជ័យជម្នះដ៏សំខាន់របស់ខ្លួន ដើម្បីលើកពានការប្រកួតបាល់ទាត់ក្នុងសាលថ្នាក់ជាតិ ឆ្នាំ២០២៣ (Tiger Futsal Cup 2023) បន្ទាប់ពីពួកគេបានយកឈ្នះក្រុម Down Town Sport ទាំងលំបាកដោយលទ្ធផល ៧-៥ ក្នុងការប្រកួតផ្តាច់ព្រ័ត្រ កាលពីយប់ថ្ងៃទី១០ ខែកញ្ញា។
ដោយត្រូវបានបង្កើតឡើង កាលពីឆ្នាំ២០១២ ក្រុមឪម៉ាល់អេហ្វស៊ី (Ov Mal FC) បានឈ្នះពានរង្វាន់ច្រើនជាង២០ ពីការប្រកួតហ្វុតសាល ដែលរៀបចំដោយក្រុមហ៊ុនឯកជន ប៉ុន្តែសម្រាប់ការប្រកួតបាល់ទាត់ក្នុងសាលថ្នាក់ជាតិ ដែលរៀបចំឡើងដោយសហព័ន្ធកីឡាបាល់ទាត់កម្ពុជា តាំងពីឆ្នាំ២០១៥មកនោះ គឺពួកគេបានត្រឹមជើងឯករងចំនួន៤ដង និងបានចំណាត់ថ្នាក់លេខ៣ចំនួន១ដង។
តែទោះបីជាយ៉ាងណា សម្រាប់ការប្រកួតពាន Tiger Futsal Cup 2023 នេះ ក្រុមឪម៉ាល់ បានឈ្នះគ្រប់ការប្រកួត នៅក្នុងវគ្គជម្រុះតាមពូល និងបានទទួលចំណាត់ថ្នាក់លេខ១ ក្នុងការប្រកួតវិលជុំដំណាក់កាលទី២ រវាងក្រុមខ្លាំងទាំង៦ ដោយឈ្នះ៤ និងចាញ់១ប្រកួត ហើយការជួបក្រុម Down Town Sport ជាថ្មី នៅវគ្គផ្តាច់ព្រ័ត្រ កាលពីថ្ងៃទី១០ ខែកញ្ញានេះ ក្រុមឪម៉ាល់ បានបន្តយកឈ្នះ ដោនថោន ៧-៥ បន្ថែមទៅលើការឈ្នះ ៥-៤ ពេលជួបគ្នា នៅក្នុងការប្រកួតដំណាក់កាលទី២។
ការរកឃើញជ័យជម្នះនេះបានធ្វើឱ្យក្រុមឪម៉ាល់អេហ្វស៊ី នាំគ្នាស្រែកហ៊ោកញ្ជ្រៀវរីករាយខ្លាំងបំផុត ព្រោះវាជាកំណត់ត្រាលើកដំបូង ដែលពួកគេបានលើកពាន ការប្រកួតបាល់ទាត់ក្នុងសាលថ្នាក់ជាតិ បន្ទាប់ពីពួកគេបានប្រឹងប្រែងលើវិស័យមួយនេះ អស់រយៈពេលជាង១០ឆ្នាំ គឺតាំងពីការលេងត្រឹមបាយបាន រហូតក្លាយជាកីឡាករពាក់កណ្តាលអាជីព។
យ៉ាងណាក៏ដោយ លោក នៃ ប៊ុនសុភ័ត្រា គ្រូបង្វឹកក្រុមឪម៉ាល់អេហ្វស៊ី បាននិយាយក្រោយការប្រកួតថា ការយកឈ្នះក្រុមដោនថោន ពិតជាមានការលំបាកខ្លាំង ដោយក្រុមទាំង២នេះ បានរកគ្រាប់បាល់ប្រដេញគ្នា ជាមួយការប្រើបច្ចេកទេសលេងយ៉ាងល្អរៀងៗខ្លួន។ លោកបញ្ជាក់ថា៖ «ដោនថោន ជាក្រុមការពារបានល្អ និងមានការប៉ះទង្គិចខ្លាំង ហើយកីឡាករលេងម្នាក់ៗ របស់គាត់គឺល្អ អ៊ីចឹងហើយបានធ្វើឱ្យក្រុមខ្ញុំ ឈ្នះគាត់តឹងមែនទែន»។
ជាមួយការឈ្នះពានបាល់ទាត់ក្នុងសាលថ្នាក់ជាតិ ជាលើកដំបូងនេះ គឺសមាជិកភាគច្រើនរបស់ក្រុមឪម៉ាល់អេហ្វស៊ី អាចនឹងត្រូវបានសហព័ន្ធកីឡាបាល់ទាត់កម្ពុជា ជ្រើសរើសសម្រាប់ការប្រមូលផ្តុំហ្វឹកហាត់ ជាក្រុមជម្រើសជាតិ ដើម្បីត្រៀមចូលរួមការប្រកួតពាន AFC Futsal Asian Cup 2024 នាដើមខែតុលា ឆ្នាំ២០២៣នេះ ដោយក្រុមកម្ពុជា បានឈរនៅពូលជាមួយក្រុមម្ចាស់ផ្ទះអ៊ូសបេគីស្ថាន អ៊ីរ៉ាក់ និងម៉ាឡេស៊ី។
យ៉ាងណាក៏ដោយ លោក នៃ ប៊ុនសុភ័ត្រា ដែលធ្លាប់ដឹកនាំក្រុមមហាហង្ស ទៅចូលរួមការប្រកួតពានរង្វាន់ AFF Futsal Championship 2022 តំណាងឱ្យកម្ពុជា នៅប្រទេសថៃនោះ បានមើលឃើញថា គុណភាពលេងហ្វុតសាលរបស់កម្ពុជា នៅមានកម្រិតទាប បើធៀបទៅនឹងប្រទេសក្នុងតំបន់ ដូចជា ថៃ វៀតណាម ឥណ្ឌូនេស៊ី និងម៉ាឡេស៊ី ជាដើម ព្រោះការប្រកួត AFF Futsal Championship 2022 នោះ ក្រុមកម្ពុជា បានចាញ់ក្រុមថៃ ១៦-០ ចាញ់ឥណ្ឌូនេស៊ី ១១-២ ចាញ់ម៉ាឡេស៊ី ៧-៦ និងស្មើក្រុមប្រ៊ុយណេ ២-២។
លោកបាននិយាយថា៖ «ពួកយើងនៅខ្សោយណាស់ បើធៀបទៅនឹងកម្រិតអន្តរជាតិ ព្រោះខ្ញុំធ្លាប់ដឹកនាំក្រុមមហាហង្ស ទៅប្រកួតពាន AFF Futsal នៅប្រទេសថៃ ដោយយើងបានប៉ះក្រុមខ្លាំងៗ ដែលគេមានកម្រិតលើយើងឆ្ងាយ ព្រោះគេបានវិនិយោគលើបាល់ទាត់ហ្វុតសាលនេះច្រើន គឺគេមានលីគហ្វុតសាល ប្រចាំឆ្នាំ មានក្លិបអាជីព និងមានជម្រើសជាតិខ្លាំង តែយើងមានត្រឹមក្លិបពាក់កណ្តាលអាជីពទេ»។
ជាមួយហេតុផលនេះ លោក នៃ ប៊ុនសុភ័ត្រា បាននិយាយបង្ការទុកមុនថា បើមានក្រុមណា ចេញទៅលេងតំណាងជាតិ នៅក្រៅប្រទេស ហើយទទួលបានលទ្ធផលមិនសូវល្អ សូមអ្នកគាំទ្រ កុំបន្ទោសពួកគាត់ ដោយលោកបានសង្កត់ធ្ងន់ថា៖ «ពេលចេញទៅក្រៅប្រទេសយើងបានព្យាយាមអស់ពីសមត្ថភាពហើយ ប៉ុន្តែយើងបានដឹងពីគុណភាពរបស់គេ និងគុណភាពរបស់យើង វាខុសគ្នា»។
បន្ថែមលើនេះ លោកបានផ្តល់ជាគំនិតថា៖ «បើសិនចង់ឃើញហ្វុតសាលរបស់ខ្មែររីកចម្រើនទៅមុខ លុះត្រាតែយើងមានការវិនិយោគខ្លាំង ទៅលើវិស័យនេះ ហើយបើយើងធ្វើបែបនេះបានមែន ខ្ញុំប្រាកដណាស់ មិនថា ៥ឆ្នាំ ឬ១០ឆ្នាំទៀត ហ្វុតសាលរបស់យើង នឹងអាចប្រកួតប្រជែងជាមួយម៉ាឡេស៊ី វៀតណាម ថៃ និងឥណ្ឌូនេស៊ី បាន គឺឱ្យតែយើងមានលីគអាជីព និងក្លិបអាជីព ដែលមានការផ្តល់ប្រាក់ខែឱ្យកីឡាករដូចក្លិបលេងនៅតារាងធំ។ ម្យ៉ាងទៀត បើយើងមានកីឡាករថ្នាលចេះលេងហ្វុតសាលតាំងពីតូចទៅ គឺទៅថ្ងៃមុខទៀត ហ្វុតសាលរបស់យើង នឹងខ្លាំង»៕
