ក្រុមកីឡាករកម្ពុជា ពេលចេញទៅប្រកួតនៅម៉ុងហ្គោលី កាលពីយប់ថ្ងៃទី១២ ខែកញ្ញា ។ រូបថត NOCC
ភ្នំពេញៈ ក្រុមអត្តពលិក និងគ្រូបង្វឹកកីឡាកាយសម្ព័ន្ធកម្ពុជា បានបង្ហាញក្តីសង្ឃឹមខ្ពស់ ក្នុងការដណ្តើមយកមេដាយ មកជូនជាតិពីការប្រកួតកីឡាកាយសម្ព័ន្ធជ្រើសរើសជើងឯកអាអេរ៉ូប៊ិកអាស៊ីលើកទី៨ ឆ្នាំ២០២៣ (8th Aerobic Gymnastics Asian Championship 2023) នៅទីក្រុង Ulaanbaatar ប្រទេសម៉ុងហ្គោលី ដែលនឹងចាប់ផ្តើមប្រកួតផ្លូវការពីថ្ងៃទី១៤ ដល់ថ្ងៃទី១៨ ខែកញ្ញា។
ក្រោមការដឹកនាំរបស់លោក ណយ ផាណា ប្រតិភូកីឡាកាយសម្ព័ន្ធកម្ពុជា ដោយមានគ្រូបង្វឹក គ្រូជំនួយ៣នាក់ និងអត្តពលិក៨នាក់សរុប១១នាក់ បានធ្វើដំណើរចាកចេញពីមាតុប្រទេសឆ្ពោះទៅកាន់ប្រទេសម៉ុងហ្គោលី កាលពីយប់ថ្ងៃទី១២ ខែកញ្ញា បន្ទាប់ពីពួកគេបានទទួលការអនុញ្ញាតពីក្រសួងអប់រំ យុវជន និងកីឡា ហើយអ្នកទាំងនេះនឹងត្រូវប្រកួតប្រជែងលើប្រភេទវិញ្ញាសាឯកត្តជនទាំងបុរស និងនារី ព្រមទាំងការប្រកួត ទ្រីយ៉ូ (Trio) និងប្រកួតជាក្រុម។
លោក ណយ ផាណា ជាគ្រូបង្វឹក និងជាប្រធានប្រតិភូដឹកនាំការប្រកួតនេះបានប្រាប់ឱ្យដឹងនៅព្រលានយន្តហោះអន្តរជាតិភ្នំពេញកាលពីព្រលប់ថ្ងៃទី១២ ខែកញ្ញា ថា នេះជាលើកទី១ ដែលក្រុមកីឡាកាយសម្ព័ន្ធបានចេញទៅប្រកួតនៅក្រៅប្រទេស បន្ទាប់ពីស៊ីហ្គេមលើកទី៣២ ឆ្នាំ២០២៣ នៅលើទឹកដីកម្ពុជា បានបញ្ចប់កាលពីថ្ងៃទី១៧ ខែឧសភាដោយក្នុងនោះក្រុមកីឡាកាយសម្ព័ន្ធកម្ពុជាដណ្តើមបានមេដាយប្រាក់១និងសំរឹទ្ធ៣។
យ៉ាងណាមិញ សម្រាប់ការប្រកួតជើងឯកអាស៊ីនៅម៉ុងហ្គោលីលើកនេះ លោក ណយ ផាណា បានថ្លែងថា៖ «យើងបានផ្តោតលើការហ្វឹកហាត់ទៅតាមផែនការតាំងពីការប្រកួតស៊ីហ្គេម ឆ្នាំ២០២៣ បានបញ្ចប់រយៈពេល១០ថ្ងៃ ហើយក្រោមការយកចិត្តទុកដាក់ពីឯកឧត្តមទេសរដ្ឋមន្ត្រីបណ្ឌិត ថោង ខុន ជាប្រធានសហព័ន្ធធ្វើឱ្យជំនាញរបស់ក្រុមអត្តពលិកយើងមានការកើនឡើងដែលយើងសង្ឃឹមថា នឹងទទួលបានលទ្ធផលល្អ សម្រាប់ជាតិមាតុភូមិ»។
អគ្គលេខាធិការសហព័ន្ធកីឡាកាយសម្ព័ន្ធកម្ពុជា លោក ណយ ផាណា បានបន្ថែមថា សម្រាប់ប្រភេទកីឡាជំនាញកាយសម្ព័ន្ធនេះ បើហ្វឹកហាត់ហើយ តែមិនបានចេញទៅប្រកួត ក៏មិនអាចមានការរីកចម្រើនដែរ អ៊ីចឹងការចេញទៅប្រកួតនៅក្រៅប្រទេស មានគោលដៅ២ផ្សេងគ្នា ទី១ យើងត្រូវកំណត់គោលដៅដណ្តើមយកគុណផល ឬលទ្ធផលល្អជូនជាតិ និងទី២ យើងក៏អាចទទួលយកបទពិសោធន៍ដែរថា តើការហ្វឹកហាត់របស់អត្តពលិកយើងមានការខ្វះខាតអ្វីខ្លះ? ហើយការដឹកនាំរបស់គ្រូបង្វឹកមានចំណុខខ្វះខាតអ្វីខ្លះ?
លោកបានបញ្ជាក់ថា៖ «ការចេញទៅប្រកួតនៅលើឆាកអន្តរជាតិម្តងៗ ក៏ដើម្បីទទួលយកជាបទពិសោធន៍គួបផ្សំដែរ ប៉ុន្តែមិនមែនថា រាល់ការចេញទៅប្រកួតសុទ្ធតែដើម្បីបទពិសោធន៍នោះទេ គឺក្នុងដំណាក់កាលនេះ មិនអាចបែបហ្នឹងឡើយ! មានន័យថា យើងត្រូវស្វែងរកលទ្ធផល ហើយសម្រាប់ការចេញទៅលើកនេះ យើងនឹងខិតខំឱ្យអស់ពីកម្លាំងកាយចិត្ត ដើម្បីស្វែងរកលទ្ធផលល្អជូនជាតិមាតុភូមិ»។
សម្រាប់ក្រុមអត្តពលិកទាំង៨នាក់ ដែលបានចេញទៅប្រកួតជើងឯកអាស៊ីលើកនេះ លោក ណយ ផាណា បានឱ្យដឹងថា មានតែកីឡាការិនី ណែម មិនា ម្នាក់ទេ ដែលជាឈាមជ័រថ្មី ចំណែកកីឡាការិនី ស៊ីវ ចន្ថា, ឌឹម អ៊នធីតា, ណេម សុខហេង, ឈួន ស្រីនាត, ឈួន សុវណ្ណបញ្ញា, សួស ស្រីពៅ និងកីឡាករ ត្រន ប៊ុនធឿន សុទ្ធតែធ្លាប់បានចូលរួមការប្រកួតជើងឯកអាស៊ី និងស៊ីហ្គេម កន្លងមក ហេតុនេះឱកាសដណ្តើមបានមេដាយនៅតែអាចកើតមានសម្រាប់ក្រុមកម្ពុជា។
គ្រូបង្វឹករូបនេះ បានបញ្ជាក់ថា៖ «ការប្រកួតជើងឯកអាស៊ីកន្លងមក យើងធ្លាប់ដណ្តើមបានមេដាយប្រាក់ និងសំរឹទ្ធ តែបើយើងពិនិត្យទៅលើស្ថានភាពជាក់ស្តែងពេលនេះ គឺប្រទេសនៅក្នុងតំបន់ក៏បានហាត់ខ្លាំង ហើយពេលខ្លះក៏បានហាត់ និងប្រកួតច្រើនជាងយើងផង អ៊ីចឹងខ្ញុំគិតថា ឆ្នាំនេះ នឹងមានការប្រកួតប្រជែងគ្នាខ្លាំង។ ប៉ុន្តែការប្រជែងនេះ មិនមាននរណាក្រៅពីវៀតណាម ថៃ ហ្វីលីពីន ជប៉ុន និងកូរ៉េ ដែលជាប្រទេសធំៗនោះទេ អ៊ីចឹងខ្ញុំសង្ឃឹមថា យើងនឹងទទួលបានលទ្ធផលល្អនិងមានមេដាយនៅក្នុងចំណោមមេដាយមាស ប្រាក់ និងសំរឹទ្ធនេះ»។
ចំណែកកីឡាការិនី ឌឹម អ៊នធីតា ដែលធ្លាប់ឈ្នះបានមេដាយប្រាក់សម្រាប់ការប្រកួតកីឡាកាយសម្ព័ន្ធជើងឯកអាស៊ី នៅប្រទេសថៃ កាលពីឆ្នាំមុន និងបានឈ្នះមេដាយសំរឹទ្ធលើវិញ្ញាសាជាក្រុមក្នុងព្រឹត្តិការណ៍ស៊ីហ្គេម ឆ្នាំ២០២៣ នៅកម្ពុជានោះ បានតាំងចិត្តខ្ពស់ក្នុងការបំបែកកំណត់ត្រាថ្មីសម្រាប់ការឈានទៅប្រជែងយកមេដាយមាស ចំពោះការប្រកួតលើកនេះ។
អ៊នធីតា បានថ្លែងថា៖«ខ្ញុំបានហ្វឹកហាត់កីឡាកាយសម្ព័ន្ធចំនួន ១០ ឆ្នាំ ហើយ ហើយក៏ធ្លាប់បានចូលរួមការប្រកួតជើងឯកអាស៊ីបែបនេះចំនួន២ដងដែរ ដោយធ្លាប់ឈ្នះបានមេដាយប្រាក់ ចំណែកការចេញទៅប្រកួតលើកនេះ ខ្លួនខ្ញុំផ្ទាល់ ចង់បានមេដាយលើសពីប្រាក់។ បើទោះបីជា ខ្ញុំមិនទាន់បានដឹងពីសមត្ថភាពគូប្រកួតរបស់ខ្លួនថា គេមានកម្រិតបែបណា តែខ្ញុំមានការជឿជាក់លើខ្លួនឯង និងមិត្តរួមក្រុមរបស់ខ្ញុំថា នឹងធ្វើបានល្អដើម្បីរកមេដាយជូនជាតិ»។
ចំណែកកីឡាការិនី ណែម មិនា ដែលត្រូវប្រកួតវិញ្ញាសាឯកត្តជននារីបានថ្លែងថា៖«នេះជាលើកទី១ ដែលខ្ញុំបានចេញទៅប្រកួត នៅលើឆាកអន្តរជាតិ ហើយខ្ញុំប្តេជ្ញាថា នឹងធ្វើឱ្យអស់ពីសមត្ថភាព។ បើទោះបីជាទទួលបានលទ្ធផលបែបណា ខ្ញុំពេញចិត្តនឹងទទួលយក ព្រោះវាជាបទពិសោធន៍លើកដំបូងរបស់ខ្ញុំ ហើយខ្ញុំនឹងប្រឹងប្រែងហ្វឹកហាត់បន្តនៅលើប្រភេទកីឡាដែលខ្ញុំស្រឡាញ់មួយនេះ ព្រោះគោលដៅរបស់ខ្ញុំគឺខ្ញុំចង់ដណ្តើមបានមេដាយពីការប្រកួតអន្តរជាតិជូនជាតិ»៕
