រដ្ឋមន្រ្តីក្រសួងបរិស្ថានលោក អ៊ាង សុផល្លែត បានអនុញ្ញាតឱ្យលោកស្រី Alissar Chaker នាយកកម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជា។ រូបថត ក្រួសងបរិស្ថាន
ក្រសួងបរិស្ថាន និងកម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជា បានបង្ហាញជំហរធ្វើការរួមគ្នាក្រោមគម្រោងសំខាន់ៗជាច្រើន ក៏ដូចជាសេដ្ឋកិច្ចចក្រា និងការអភិវឌ្ឍសហគមន៍ ដើម្បីរួមចំណែកការពារបរិស្ថាន និងកាត់បន្ថយភាពប្រែប្រួលអាកាសធាតុនៅកម្ពុជា។
ការបង្ហាញជំហរនេះ ធ្វើឡើងក្នុងឱកាស រដ្ឋមន្រ្តីក្រសួងបរិស្ថានលោក អ៊ាង សុផល្លែត បានអនុញ្ញាតឱ្យលោកស្រី Alissar Chaker នាយកកម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជា និងសហការីចូលជួបសម្តែងការគួរសម និងពិភាក្សាការងារ នៅទីស្តីការក្រសួងបរិស្ថាន កាលពីថ្ងៃទី១៥ ខែកញ្ញា ឆ្នាំ២០២៣។
យោងតាមហ្វេសប៊ុកផ្លូវការរបស់ក្រសួងបរិស្ថាន ក្នុងជំនួបនោះ លោកស្រី Alissar Chaker បានជម្រាបជូននូវកម្មវិធីសំខាន់ៗ ដែលបាននិងកំពុងសហការជាមួយក្រសួងបរិស្ថាន ក្នុងនោះរួមមានកម្មវិធីសម្ព័ន្ធភាពប្រែប្រួលអាកាសធាតុកម្ពុជា គម្រោងការទប់ស្កាត់សំណល់ប្លាស្ទិកសមុទ្រនៅកម្ពុជា ការគ្រប់គ្រងធនធានធម្មជាតិទៅក្នុងតំបន់ទេសភាពនៃព្រៃធម្មជាតិ និងផលិតភាពធម្មជាតិនៅតំបន់ភាគខាងជើងនៃប្រទេសកម្ពុជា។
ជាមួយគ្នានេះ UNDP ក៏បាននិងកំពុងរៀបចំកម្មវិធីសម្រាប់ប្រទេសកម្ពុជា ឆ្នាំ២០២៤-២០២៩ ដែលផ្តោតជាសំខាន់លើសេដ្ឋកិច្ចចក្រា ការអភិវឌ្ឍសហគមន៍ តាមរយៈគម្រោង REDD និងការប្រែប្រួលអាកាសធាតុ ដែលនឹងបន្ស៊ីគ្នាជាមួយយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល។
ប្រភពដដែលបញ្ជាក់ថា៖«លោកស្រីបានបញ្ជាក់ជាថ្មីថា UNDP នឹងបន្តសហការជាមួយក្រសួងបរិស្ថានបន្ថែមទៀតក្នុងវិស័យបរិស្ថាន ជាពិសេសពិភាក្សាលើការងារ បន្ទាប់ពីបញ្ចប់កម្មវិធីសម្ព័ន្ធភាពប្រែប្រួលអាកាសធាតុកម្ពុជា ដំណាក់កាលទី៣» ។
ក្នុងឱកាសនោះលោក អ៊ាង សុផល្លែត បានស្វាគមន៍ កិច្ចសហប្រតិបត្តិការរវាងក្រសួងបរិស្ថាន និងកម្មវិធីអភិវឌ្ឍន៍សហប្រជាជាតិ ដោយជំរុញឱ្យមានកិច្ចសហប្រតិបត្តិការក្នុងភាពជាដៃគូបន្ថែមទៀតលើយុទ្ធសាស្រ្តចម្បងៗរបស់ក្រសួង ដើម្បីសម្រេចបានការអនុវត្តផែនការយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល។
លោកក៏បានជំរុញឱ្យគ្រប់ភាគីពាក់ព័ន្ធរៀបចំយុទ្ធសាស្រ្តរួម ដើម្បីកិច្ចការពារបរិស្ថាន និងលើកកម្ពស់ជីវភាពប្រជាពលរដ្ឋ។ លោករដ្ឋមន្រ្តីបញ្ជាក់ជូនថា៖«ការងារអាទិភាពរបស់ក្រសួង ជាពិសេស គឺការបង្កើតរបៀងអេកូទេសចរណ៍វប្បធម៌ ផ្សារភ្ជាប់ពីតំបន់អេកូទេសចរណ៍មួយទៅតំបន់អេកូទេសចរណ៍មួយទៀតនៃតំបន់ការពារ ការបង្កើនគម្របព្រៃ តាមរយៈការដាំឈើ ដែលក្រសួងមានមហិច្ឆតាផ្តល់កូនឈើ ១ លានដើម ជូនប្រជាពលរដ្ឋ សម្រាប់ដាំដុះដោយមិនគិតថ្លៃ»។
គួរជម្រាបថា បច្ចុប្បន្ននេះ ក្រសួងកំពុងបើកយុទ្ធនាការកាត់បន្ថយប្លាស្ទិកនៅតាមសាលារៀនទូទាំងប្រទេសកម្ពុជា ដែលមានការអបអរសាទរ និងចូលរួមយ៉ាងច្រើនពីសិស្សានុសិស្ស និងប្រជាពលរដ្ឋ៕
