ជំនួបរវាងលោក វង្ស ពិសេន និងលោក ផូល ផេន នៅថ្ងៃទី ១៨ កញ្ញា។ រូបថត អគ្គបញ្ជាការដ្ឋាន
ភ្នំពេញៈ កាណាដា-កម្ពុជា បង្ហាញការបើកចំហក្នុងការពង្រឹងទំនាក់ទំនងវិស័យយោធា និងការចែករំលែកបទពិសោធន៍ នៃការបន្តសហការគ្នាលើការផ្លាស់ប្ដូរព័ត៌មានចារកម្ម ឧក្រិដ្ឋកម្មឆ្លងដែន ជាពិសេសការជួយបណ្តុះបណ្តាលសមត្ថភាពកងទ័ពកម្ពុជាពីសំណាក់កាណាដា។
ការបង្ហាញជំហរបែបនេះធ្វើឡើងតាមរយៈជំនួបពិភាក្សាការងារនៅថ្ងៃទី ១៨ ខែកញ្ញា ឆ្នាំ ២០២៣ នៅអគ្គបញ្ជាការដ្ឋានកងយោធពលខេមរភូមិន្ទ រវាងលោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទនិងលោក ផូល ផេន (Paul Payne) នាយការិយាល័យសេនាអនុព័ន្ធកាណាដាប្រចាំកម្ពុជាដែលមាននិវេសនដ្ឋាននៅប្រទេសវៀតណាម។
យោងតាមហ្វេសប៊ុកក្រសួងការពារជាតិនៅថ្ងៃទី ១៨ ខែកញ្ញា បានឱ្យដឹងថា នៅក្នុងជំនួបនេះលោក វង្ស ពិសេន បានប្រាប់ភាគីកាណាដា ពាក់ព័ន្ធនឹងទំនាក់ទំនងទ្វេភាគី ដែលបានតភ្ជាប់តាំងពីឆ្នាំ ១៩៥២ មកម្ល៉េះ ដែលក្នុងរយៈពេល ៧០ ឆ្នាំ កម្ពុជា និងកាណាដា មានកម្រិតទំនាក់ទំនងល្អ ជាពិសេសផ្នែកពាណិជ្ជកម្ម ខណៈវិស័យយោធាវិញក៏មានសភាពល្អផងដែរ។
លោកបន្តថា៖ «ក្នុងឆ្នាំ ២០២២ នាវាកងទ័ពកាណាដាបានចូលចតនៅកំពង់ផែខេត្តព្រះសីហនុ ដែលធ្វើឱ្យទំនាក់ទំនងរវាងកងទ័ពប្រទេសទាំង ២ កាន់តែល្អប្រសើរ ហើយទៅថ្ងៃខាងមុខ កងទ័ពប្រទេសទាំង ២ នឹងបន្តសហការគ្នា នៅក្នុងការផ្លាស់ប្ដូរព័ត៌មានចារកម្ម ឧក្រិដ្ឋកម្មឆ្លងដែន ជាដើម»។
លើសពីនេះ លោកបានសំណូមដល់ភាគីកាណាដា ជួយបណ្តុះបណ្តាលធនធានមនុស្សលើវិស័យកងទ័ព ពិសេសគាំទ្រសុំឱ្យភាគីកាណាដា ចូលរួមគាំទ្រលើកិច្ចប្រជុំនានា ជាពិសេសកិច្ចប្រជុំរដ្ឋមន្ត្រីការពារជាតិអាស៊ានក្នុងពេលខាងមុខ ជាមួយជំនួបក្របខ័ណ្ឌ ទ្វេភាគី និងពហុភាគី។ ក្រៅពីនេះ លោកបានជម្រាបជូនភាគីកាណាដា ពីគោលដៅរបស់រដ្ឋាភិបាលកម្ពុជាថ្មី ក្រោមការដឹកនាំរបស់លោកនាយករដ្ឋមន្ត្រីហ៊ុន ម៉ាណែត ដែលនឹងផ្តោតលើនយោបាយការបរទេសឯករាជ្យ គោរពច្បាប់ កសាងកិច្ចសហប្រតិបត្តិការជាមួយបណ្តាប្រទេសនានា និងអង្គការអន្តរជាតិនានាដើម្បីបុព្វហេតុសន្តិភាព ស្ថិរភាព សន្តិសុខនិងវិបុលភាពសម្រាប់តំបន់ និងអន្តរជាតិ។
បើយោងតាមក្រសួងការពារជាតិ ជាមួយគ្នានេះ ភាគីកាណាដា លោកផូល ផេនបានបង្ហាញក្ដីអំណរចំពោះដំណើរទស្សនកិច្ចលើកទី១ របស់លោកនៅកម្ពុជានេះ ដោយលោក ចាត់ទុកថា ជាការចូលរួមពង្រឹងពង្រីកទំនាក់ទំនងផ្នែកយោធានៃប្រទេសទាំង ២។
លោកថា៖ «កម្ពុជានិងកាណាដា ធ្លាប់មានទំនាក់ទំនងជាយូរមកហើយដូច្នេះកាណាដាបានបើកចំហក្នុងការធ្វើការរួមគ្នាជាមួយកម្ពុជា ដើម្បីចែករំលែកនូវបទពិសោធន៍ ដែលធ្វើឱ្យវិស័យយោធានៃប្រទេសទាំង ២ មានទំនាក់ទំនងកាន់តែល្អប្រសើរថែមទៀត»។
បន្ថែមពីនេះ លោកបានកោតសរសើរ ពីការចូលរួមរបស់កម្ពុជាក្នុងការចូលរួមផ្នែកមនុស្សធម៌ និងសន្តិភាពពិភពលោក តាមរយៈកងកម្លាំងមួកខៀវកម្ពុជាក្នុងក្របខ័ណ្ឌអង្គការសហប្រជាជាតិ។ លើសពីនេះលោកបានបញ្ជាក់ពីការចែករំលែកជំនាញបច្ចេកទេសមនុស្សធម៌ និងគ្រោះមហន្តរាយ ក្នុងពេលខាងមុខដល់កងទ័ពកម្ពុជា។
ពាក់ព័ន្ធនឹងបញ្ហានេះដែរ លោក ស៊ឺន សម អ្នកជំនាញផ្នែកទំនាក់ទំនងអន្តរជាតិនៃរាជបណ្ឌិត្យសភាកម្ពុជាយល់ឃើញថា ជាការល្អដែលភាគីកាណាដា និងកម្ពុជាបង្ហាញការប្តេជ្ញាចិត្តរៀងៗខ្លួនក្នុងការពង្រឹងទំនាក់ទំនងវិស័យយោធា ប៉ុន្តែលោកសង្កេតឃើញថា សហប្រតិបត្តិការផ្នែកនេះ រវាងប្រទេសទាំង ២ ហាក់នៅមានកម្រិតនៅឡើយ។
លោកបន្តថា កិច្ចសហប្រតិបត្តិការផ្នែកយោធារវាងប្រទេសទាំង ២ អាចត្រឹមផ្នែកបណ្តុះបណ្តាលប៉ុណ្ណោះ ដោយសារកាណាដាជាសម្ព័ន្ធមិត្តរបស់សហរដ្ឋអាមេរិក ដែលហាក់មិនសូវមានចំណងមិត្តភាពល្អជាមួយកម្ពុជាផ្នែកសន្តិសុខ និងយោធានេះទេ ដែលយុទ្ធសាស្ត្រប្រទេសទាំង ២ ហាក់មិនសូវស្របគ្នា៕
