សិក្ខាកាមចូលរួម វគ្គបណ្តុះបណ្តាលច្បាប់ស្តីពីការប្រឆាំងអំពើពុករលួយ និងលិខិតបទដ្ឋានគតិយុត្ត កាលពីថ្ងៃទី ១៧ ខែកញ្ញា។ រូបថត ACU
ភ្នំពេញៈ អង្គភាពប្រឆាំងអំពើពុករលួយកាលពីថ្ងៃទី ១៧ ខែកញ្ញា ឆ្នាំ ២០២៣ បានបើកវគ្គបណ្តុះបណ្តាលច្បាប់ស្តីពីការប្រឆាំងអំពើពុករលួយ និងលិខិតបទដ្ឋានគតិយុត្តពាក់ព័ន្ធការប្រឆាំងអំពើពុករលួយដល់សិក្ខាកាមចំនួន ៤០០ នាក់ជាលើកទី៤។ វគ្គបណ្តុះបណ្តាលនេះសម្រាប់បេក្ខជនដាក់ពាក្យ ត្រៀមប្រឡងចូលក្របខ័ណ្ឌមន្ត្រីរាជការស៊ីវិលក្នុងអង្គភាពប្រឆាំងអំពើពុលរលួយ (អ.ប.ព.)។
លោក សយ ច័ន្ទវិចិត្ត អ្នកនាំពាក្យអង្គភាពប្រឆាំងអំពើពុករលួយបានប្រាប់ ភ្នំពេញ ប៉ុស្តិ៍ នៅថ្ងៃទី ១៨ ខែកញ្ញាថា អង្គភាពបាននិងកំពុងធ្វើការបណ្តុះបណ្តាល ដល់បេក្ខជនពីព្រោះថា អង្គភាពនឹងមានការប្រឡងជ្រើសរើសក្របខ័ណ្ខថ្មី អ៊ីចឹងការផ្តល់នូវចំណេះដឹងជាមូលដ្ឋានមួយចំនួនបូកបន្ថែមជាមួយនឹងចំណេះដឹងដែលសិក្ខាកាមមានរួចហើយសម្រាប់ត្រៀមក្នុងការប្រឡង។ ទន្ទឹមនឹងនេះគឺអង្គភាពប្រឆាំងអំពើពុករលួយយកពេលវេលាបណ្តុះបណ្តាលដើម្បីផ្តល់ជូនដល់សាធារណជនមួយចំនួនដែលគាត់ចង់ចេះចង់ដឹងចង់យល់អំពីច្បាប់ពីអង្គភាពជាដើម។
លោកថ្លែងថា៖«អ៊ីចឹងគោលដៅមានទី១ សម្រាប់បេក្ខជនដែលត្រៀមប្រឡង និងទី២ ជាការផ្តល់នូវចំណេះដឹងដល់សាធារណជន។ ចំពោះសិក្ខាកាមមានចម្រុះដែលភាគច្រើនជានិស្សិត មានជាព្រះសង្ឃ ជាអ្នកបុគ្គលសាធារណៈ អ៊ីចឹងមានច្រើន»។
លោកបញ្ជាក់ថា អង្គភាពប្រឆាំងអំពើពុករលួយបានអនុវត្តវគ្គបណ្តុះបណ្តាលតាំងពីច្បាប់ស្តីពីការប្រឆាំងអំពើពុករលួយត្រូវបានរដ្ឋសភាអនុម័តមក។សម្រាប់វគ្គបណ្តុះបណ្តាលកាលពីថ្ងៃទី ១៦ ខែកញ្ញា មានសិក្ខាកាមចូលរួមចំនួន ៣០០ នាក់ និងថ្ងៃទី ១៧ ខែកញ្ញា មាន ៤០០ នាក់ហើយ (អ.ប.ព.) នឹងធ្វើការបណ្តុះបណ្តាលជាដំណាក់កាលៗរហូត។ ចំពោះសិក្ខាកាមដែលបានសិក្សាវគ្គបណ្តុះបណ្តាលរហូតមកដល់ពេលនេះចំនួនជាង ៣ ៦០០នាក់ហើយដូច្នេះការផ្តល់ជូននូវចំណេះដឹងផ្នែកច្បាប់នេះគឺជារឿងមួយដែលអង្គភាពតែងធ្វើជាប្រចាំមក។
បើតាម លោក ច័ន្ទវិចិត្ត មូលហេតុនៃការបណ្តុះបណ្តាលជាដំណាក់កាលៗនេះដោយសារតែគ្រូឧទ្ទេសនាមរបស់ (អ.ប.ព.) ក៏ដូចជាទំហំនៃទីតាំងមានកំណត់ដូច្នេះមានតែបែងចែកចំនួនសិក្ខាកាមជាក្រុមៗ។ សម្រាប់ការវាយតម្លៃរបស់អង្គភាព (អ.ប.ព.) របស់ គ្រូឧទ្ទេសនាមតាមរយៈសកម្មភាពចូលរួមរបស់សិក្ខាកាមទាំងអស់នៅក្នុងវគ្គនីមួយៗដែលអង្គភាពបានផ្តល់ជូនគាត់ គឺអង្គភាពមានសេចក្តីរីករាយនិងបានធ្វើការវាយតម្លៃខ្ពស់ ដោយសារការចូលរួមរបស់សិក្ខាកាម គឺមានប្រយោជន៍ហើយគាត់អាចទទួលបាននូវចំណេះដឹងច្រើនពិតប្រាកដ និងជាក់ស្តែងពីអង្គភាព (អ.ប.ព.)។ អង្គភាពអាចធ្វើការសម្គាល់មួយ គឺចំនួនអ្នកដែលបានមកចូលរួមក្នុងវគ្គបណ្តុះបណ្តាល គឺទី១ មិនមានការថយទេ ទី២ គឺក្នុងវគ្គនីមួយៗសិក្ខាកាមបានសួរសំណួរច្រើនដែលបានន័យថា គាត់យកចិត្តទុកដាក់ណាស់។
លោក ច័ន្ទវិចិត្ត សង្កត់ធ្ងន់ថា ក្រៅពីសិក្ខាកាមមកទទួលវគ្គបណ្តុះបណ្តាលហើយនោះបើនិយាយពីផេចហ្វេសប៊ុករបស់អង្គភាព (អ.ប.ព.) មានប្រជាពលរដ្ឋខមមុិនសាទរច្រើនមែនទែន។ការខមមុិននោះគាត់ថា ពេញចិត្តគាត់នឹងចំណាយពេលមកចូលរួមវគ្គគឺមិនខាតពេលវេលារបស់គាត់ទេ។ទន្ទឹមនឹងនេះពួកគាត់សរសើរថា មកទទួលការបណ្តុះបណ្តាលមួយដែលមានគុណភាពហើយមានការរាក់ទាក់និងមិនបង់ប្រាក់ពិសេសមានការផ្តល់ជូនអាហារ ១ ពេលទៀត និងមានប្រកាសនីយបត្រ។
លោកប្រាប់ថា៖ «អ៊ីចឹងគាត់ចំណេញទាំងចំណេះដឹងហើយគាត់បានជាប្រកាសនីយបត្រទៀត។ចំពោះព្រះសង្ឃមានច្រើនដែរតែមិនលើសលប់ទេគ្រាន់តែថា គ្រប់វគ្គបណ្តុះបណ្តាលទាំងអស់មានជាច្រើនអង្គដែរ»៕
