![](https://pppkhmer.sgp1.digitaloceanspaces.com/image/main/field/image/topic_28-_defense_minister_tea_siha_inspected_win_win_monument_construction_in_anlong_veng_district_in_oddar_meanchey_province_on_23-09-2023by_national_defence_4.jpg)
លោក ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដើរត្រួតទ័ព។ រូបថត ក្រសួងការពារជាតិ
ភ្នំពេញៈ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិលោក ទៀ សីហា បានព្រមានចាត់វិធានការយ៉ាងម៉ឺងម៉ាត់តាមផ្លូវច្បាប់ជាធរមានចំពោះទាហានណាក៏ដោយ ដែលជាប់ពាក់ព័ន្ធ និងសេពគ្រឿងញៀន ព្រមទាំងប្រឈមការដកចេញពីក្របខ័ណ្ឌដោយគ្មានការអនុគ្រោះនោះឡើយ។
ការព្រមានធ្ងន់ៗនេះ ធ្វើឡើងនៅពេលដែលលោក បានចុះពិនិត្យមើលវឌ្ឍនភាពនៃការសាងសង់ស្តូបឈ្នះឈ្នះ អន្លង់វែង និងសួរសុខទុក្ខដល់មេបញ្ជាការ មេបញ្ជាការរង នាយទាហាន នាយទាហានរង ពលទាហាន ដែលកំពុងឈរជើងការពារបូរណភាពទឹកដី នៅទិសយោធភូមិភាគទី៤ ស្ថិតនៅតំបន់ប្រវត្តិសាស្ត្រយោធាភ្នំ២០០ នាស្រុកអង្លង់វែង ខេត្តឧត្តរមានជ័យ កាលពីទី២៣ ខែកញ្ញា ឆ្នាំ២០២៣។ យោងតាមសារលើបណ្តាញហ្វេសប៊ុករបស់ក្រសួងការពារជាតិ។
លោក ទៀ សីហា បានបញ្ជាក់ថា ស្របតាមគោលនយោបាយបញ្ចកោណនៃរាជរដ្ឋាភិបាលនីតិកាលទី៧ ដែលដឹកនាំដោយលោកនាយករដ្ឋមន្ត្រីកម្ពុជា ហ៊ុន ម៉ាណែត គឺកងទ័ពត្រូវតែមានការកែទម្រង់ ដោយត្រូវធ្វើការហ្វឹកហាត់ ចំណេះជំនាញជាប្រចាំដោយគ្មានការលើកលែងនោះឡើយ ជាពិសេសជំនាញការពារជាតិ មាតុភូមិ ត្រូវមានកម្លាំងពលំមាំមួន។
ជាមួយគ្នានេះលោកក៏បានព្រមានចាត់វិធានការយ៉ាងម៉ឺងម៉ាត់ចំពោះទាហានណាក៏ដោយ ដែលជាប់ពាក់ព័ន្ធ និងសេពគ្រឿងញៀន នឹងត្រូវដកចេញពីក្របខ័ណ្ឌ ព្រមទាំងចាត់វិធានការតាមផ្លូវច្បាប់ជាធរមានដោយគ្មានការអនុគ្រោះនោះទេ។
លោកសង្កត់ធ្ងន់ថា៖«មួយទៀតចាប់ពីពេលនេះតទៅមុនប្រឡងចូលក្របខ័ណ្ឌកងទ័ពត្រូវតែធ្វើតេស្តគ្រឿងញៀន ឱ្យខាងតែបាន ដោយមុននឹងក្លាយជាក្របខ័ណ្ឌកងទ័ពត្រូវតែពិនិត្យ និងធ្វើតេស្តគ្រឿងញៀននេះយ៉ាងតិចចំនួន៤ដងផងដែរ»។
នាយកទទួលបន្ទុកកិច្ចការទូទៅនៃអង្គការលីកាដូលោក អំ សំអាត នៅថ្ងៃទី២៤ ខែកញ្ញា បានថ្លែងថា ការថ្លែងរបស់រដ្ឋមន្ត្រីការពារជាតិថ្មីនេះ គឺជាការតាំងចិត្ត និងការប្តេជ្ញាថ្មីបន្ថែមទៀតទៅលើការទប់ស្កាត់ និងការបង្ក្រាបគ្រឿងញៀន។ ប៉ុន្តែលោកថា បញ្ហាគ្រឿងញៀននេះ ត្រូវផ្តើមចេញពីបុគ្គលនីមួយៗជាពិសេសអ្នកអនុវត្តច្បាប់ត្រូវនៅឱ្យឆ្ងាយពីគ្រឿងញៀន ពោលគឺបើសិនជាកងកម្លាំងទាំងអស់ស្ថិតនៅឆ្ងាយពីគ្រឿងញៀន គឺជាការចាប់ផ្តើមមួយក៏មានប្រសិទ្ធភាពនៅក្នុងការទប់ស្កាត់ និងប្រយុទ្ធប្រឆាំងនឹងគ្រឿងញៀន។
លោកប្រាប់ថា៖«ការដាក់ចេញវិធានការទាំងអស់នេះ វាជារឿងមួយដើម្បីចូលរួមក្នុងការទប់ស្កាត់ ក៏ដូចជាសីលធម៌ និងគុណតម្លៃនៃកងកម្លាំង ប៉ុន្តែបញ្ហានេះជារឿងមួយ ដែលក្រសួងការពារជាតិ មានការតាំងចិត្ត គ្រាន់តែថាបញ្ហាគ្រឿងញៀន ជួនកាលទាំងកងកម្លាំង ប្រជាពលរដ្ឋមួយចំនួន គ្រាន់តែជាជនរងគ្រោះនៅក្នុងបញ្ហានៃគ្រឿងញៀនដែលមានលំហូរតាមការចែកចាយ និងជួញដូរនៅក្នុងប្រទេសកម្ពុជា»។
លោក អំ សំអាត បានបន្ថែមថា ក្រៅពីការតាំងចិត្តនិងប្តេជ្ញាចិត្តរបស់ក្រសួងការពារជាតិ គឺត្រូវរួមគ្នាក្នុងការទប់ស្កាត់ និងការបង្ក្រាបនៃបញ្ហានេះ។
លោកថា៖«បញ្ហាគ្រឿងញៀនជាឫសគល់មួយធំ ហើយមិនមែនមានតែកម្ពុជានោះទេ គឺមានបណ្តាញច្រើននៅក្នុងពិភពលោក ដូច្នេះយើងត្រូវតែមានការទប់ស្កាត់និងបង្ក្រាបឱ្យមានប្រសិទ្ធភាពពីព្រោះគ្រឿងញៀនគឺជារឿងមួយដែលបំផ្លាញនូវសង្គមជាតិ និងធនធានមនុស្សកម្ពុជា»។
ក្នុងរយៈពេល៨ខែ ឆ្នាំ២០២៣ កម្លាំងសមត្ថកិច្ចទាំងនគរបាលជាតិ និងកងរាជអាវុធហត្ថទូទាំងប្រទេស បានបង្ក្រាបករណីជួញដូរ និងប្រើប្រាស់គ្រឿងញៀនបានចំនួន ៥ ០៦០ករណី ដោយបានឃាត់ខ្លួនជនសង្ស័យចំនួន១២ ៣៥៦នាក់។
ក្នុងនោះសមត្ថកិច្ចបានដកហូតសារធាតុញៀន គ្រប់ប្រភេទ២ ៦២៥គីឡូក្រាម និងកញ្ឆាស្ងួតជាង ៤៣គីឡូក្រាម និងសារធាតុគីមីជាង ៨៣៧គីឡូក្រាម។នេះបើយោងតាមរបាយការណ៍ស្តីពី លទ្ធផលបង្ក្រាបគ្រឿងញៀន នៃយុទ្ធនាការប្រយុទ្ធប្រឆាំងគ្រឿងញៀននៅកម្ពុជា៕