អ្នកប្រើសេវាសុខាភិបាលតាមរយៈ បសស កើនឡើងខណៈបុគ្គលស្វ័យនិយោជន៍ជិត ៥ ម៉ឺន នាក់បានចុះឈ្មោះថ្មី។ ហេង ជីវ័ន
ភ្នំពេញៈ មន្ត្រីឱ្យដឹងថា ចំនួនអ្នកមកប្រើប្រាស់សេវានៅតាមមូលដ្ឋានសុខាភិបាលតាមរយៈ ប.ស.ស មានការកើនឡើងជាង ៨០ ភាគរយ ក្នុងរយៈពេល ៦ ខែ ក្នុងឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន ខណៈ ៤ ខែ មានបុគ្គលស្វ័យនិយោជន៍ជិត ៥ ម៉ឺន នាក់ បានចុះឈ្មោះចូលជាសមាជិកបន្ទាប់ពីពួកគាត់ទទួលស្គាល់ពីគុណតម្លៃនៃ ប.ស.ស។
ចាប់តាំងពីឆ្នាំ២០១៦ នៃការបង្កើត ប.ស.ស មកដល់ឆមាសទី១ ឆ្នាំ២០២៣នេះ មានអ្នកចូលមកប្រើប្រាស់សេវាថែទាំសុខភាពនៅទូទាំងប្រទេសសរុបជាង ១៤ លាន ករណី ក្នុងនោះស្ត្រីមានជាង ១០ លាន ករណី ដែលចំណាយថវិកាសរុប រហូត ១,៧ ពាន់លានរៀល។ នេះបើតាមការអះអាងរបស់លោកហេង សុផាន់ណារិទ្ធ អគ្គនាយករងបេឡាជាតិសន្តិសុខសង្គម (ប.ស.ស)។
លោកប្រាប់ភ្នំពេញប៉ុស្តិ៍នៅថ្ងៃទី២៤ ខែកញ្ញាថា បើគិតក្នុងរយៈពេល ៦ខែ ដើម ឆ្នាំនេះ មានអ្នកប្រើប្រាស់សេវាតាមរយៈ ប.ស.ស ជាង ២,២ លានករណី ដែលមានកំណើនប្រមាណ ៨៣ ភាគរយ បើធៀបនឹងរយៈពេលដូចគ្នាកាលពីឆ្នាំ២០២២។ កំណើននៃការចូលប្រើប្រាស់សេវានេះ មានកត្តារួមផ្សំ ដោយមានកំណើននៃចំនួនសមាជិក ក្នុងពេលបច្ចុប្បន្ន ដែលបានពង្រីកវិសាលភាព ទៅដល់បុគ្គលស្វ័យនិយោជន៍ រួមផ្សំទាំងប្រសិទ្ធភាពនៃការផ្សព្វផ្សាយឱ្យមានការយល់ដឹងពីសិទ្ធិ និងការទទួលស្គាល់ពីគុណតម្លៃនៃបណ្ណ ប.ស.ស។
លោកបញ្ជាក់ថា៖«ហើយជាពិសេស គឺការទទួលបានគុណភាពសេវា នៅពេលទៅប្រើប្រាស់សេវាបណ្ណសមាជិក ប.ស.ស ដោយគ្មានការរើសអើងនៅតាមមូលដ្ឋានសុខាភិបាលដែលបានចុះកិច្ចព្រមព្រៀងនៅទូទាំងប្រទេស។ សមាជិក ប.ស.ស យើងគឺគាត់យល់ពី ប.ស.ស ច្បាស់ ហើយគាត់ដឹងពីសិទ្ធិផ្ទាល់ខ្លួនរបស់គាត់។ អ៊ីចឹងធ្វើឱ្យគាត់ នៅពេលមានជំងឺផ្សេងៗ គឺគាត់ទៅប្រើប្រាស់សេវាដោយភ្ជាប់មកជាមួយបណ្ណ ប.ស.ស របស់យើងតែម្តង»។
ដើម្បីឆ្លើយតបនឹងកំណើននៃការមកប្រើប្រាស់សេវានេះ លោកហេង សុផាន់ណារិទ្ធ ឱ្យដឹងថា ប.ស.ស នឹងបន្តពង្រីកដៃគូសហការបន្ថែមទៀតដោយគិតលើទីតាំងភូមិសាស្ត្រ និងបច្ចេកទេសឱ្យកាន់តែកៀកទីតាំងនៃការប្រមូលផ្តុំសមាជិករបស់ខ្លួន។
លោកបញ្ជាក់ថា៖«បងប្អូនស្វ័យនិយោជន៍ ដែលធ្វើការរកប្រាក់ចំណូលដោយខ្លួនឯង បានមកចុះបញ្ជីច្រើន ហើយគិតចាប់ពីខែមិថុនា ដល់ខែកញ្ញានេះ គឺចំនួនជិត៥ម៉ឺននាក់ហើយ ដែលធ្វើឱ្យចំនួននៃការប្រើប្រាស់សេវានៅតាមមូលដ្ឋានសុខាភិបាល ក៏មានការកើនឡើងច្រើនដែរ។ ក្នុងពេលអនាគត បេឡារបបសន្តិសុខសង្គមគឺបានត្រៀមខ្លួនជាស្រេចសហការជាមួយមូលដ្ឋានសុខាភិបាល និងដៃគូពាក់ព័ន្ធដើម្បីពង្រឹងគុណភាពសេវានៅគ្រប់មូលដ្ឋានសុខាភិបាលសាធារណៈ និងឯកជនទាំងអស់ដោយមិនឱ្យមានបញ្ហា»។
គិតមកដល់ពេលនេះ ប.ស.ស បានចុះកិច្ចព្រមព្រៀងផ្នែកថែទាំសុខភាព ជាមួយមូលដ្ឋានសុខាភិបាលសរុប១ ៥២០ កន្លែង ក្នុងនោះមន្ទីរពេទ្យថ្នាក់ជាតិមានចំនួន៨កន្លែង មន្ទីរ-ពេទ្យបង្អែកមាន១៣២កន្លែង មណ្ឌលសុខភាពមាន ១ ២៥៣ កន្លែង និងមន្ទីរពេទ្យឯកជនមានចំនួន ១៣៦ កន្លែង។ នេះបើតាមលោក ហេង សុផាន់ណារិទ្ធ។
អ្នកស្រី សុខ ស្រីរ័ត្ន ជាសមាជិកស្វ័យនិយោជន៍ ដែលទើបទៅទទួលសេវានៅមណ្ឌលសុខាភិបាលតាមរយៈ ប.ស.ស បាននិយាយថា អ្នកស្រីពេញចិត្តចំពោះការបម្រើសេវាដោយគ្មានការរើសអើង ហើយថែមទាំងផ្តល់សេវាជូនដោយមិនគិតរយៈពេលទៀតផង។ អ្នកស្រី បង្ហាញការធូរស្រាសនៅពេលទទួលបាន ការធានាបែបនេះ ខណៈអ្នកស្រី ថ្លែងថា កន្លងមក នៅពេលមានជំងឺ គឺទៅស្វែងរកសេវាព្យាបាល គឺចំណាយច្រើនណាស់។
អ្នកស្រីបញ្ជាក់ថា៖«ខ្ញុំចុះឈ្មោះហើយ និងបានទៅពិនិត្យសុខភាពម្តងហើយ។ កន្លែងគេទទួលពិនិត្យយើង២៤ម៉ោង យើងប្រើសេវានេះ គឺល្អម្យ៉ាង។ ខ្ញុំក៏អរគុណដែរ នៅពេល ប.ស.ស បានធ្វើឱ្យពួកខ្ញុំ បានព្យាបាលជំងឹមិនគិតថ្លៃ។ កាលពីពួកខ្ញុំមិនទាន់មានប្រើបណ្ណ ប. ស.ស ទៅពេទ្យម្តងៗអស់ច្រើនណាស់។ ពួកខ្ញុំសុទ្ធតែអ្នកអត់ដែរ ដល់បានអ៊ីចឹង ទៅពេទ្យអត់អស់លុយទេ»។
ចាប់តាំងពីថ្ងៃទី១ ខែមេសាមក ប.ស.ស បានប្រកាសចុះឈ្មោះដល់បុគ្គលស្វ័យនិយោជន៍ ដើម្បីមានសិទ្ធិទទួលបានការធានារ៉ាប់រងផ្នែកថែទាំសុខភាពជាមួយនឹង បេឡាជាតិសន្តិសុខសង្គម ខណៈការចំណាយលើថ្លៃវិភាគទានប្រចាំខែត្រឹមតែ ១៥ ៦០០ រៀលប៉ុណ្ណោះក្នុង ១ ខែ ហើយបន្ទាប់ពីបង់ថ្លៃវិភាគទានចំនួន ២ ខែ ជាប់គ្នា ពួកគាត់នឹងអាចទទួលបានសេវាព្យាបាលជំងឺនៅមណ្ឌលសុខភាព ដែលទទួលស្គាល់ដោយ ប.ស.ស ក៏ដូចជាសេវាសម្ភព និងសេវាសង្គ្រោះបន្ទាន់ដោយឥតគិតថ្លៃ៕
