លោក អ៊ុម រម្យណី ក្នុងកម្មវិធីគំនិតផ្តួចផ្តើមភាពជាដៃគូរៀនសូត្រ។ ហេង ជីវ័ន
ភ្នំពេញៈ លោក អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា បានឱ្យដឹងថា ក្រសួងបាននិងកំពុងសិក្សានៅតាមសាលារៀនរដ្ឋចំនួន ៨ ទៀត ដើម្បីឱ្យអនុវត្តកម្មវិធីសិក្សាសាលាជំនាន់ថ្មី (NGS) ខណៈដែលបច្ចុប្បន្នមានសាលាចំនួន ១១ ហើយ ដែលកំពុងអនុវត្តកម្មវិធីសិក្សាសាលាជំនាន់ថ្មីបែបទំនើបនេះ។
នៅក្នុងកម្មវិធីគំនិតផ្តួចផ្តើមភាពជាដៃគូរៀនសូត្ររវាងសាលាជំនាន់ថ្មី និងសាកលវិទ្យាល័យគ្រប់គ្រងអាស៊ីបូព៌ា នៅព្រឹកថ្ងៃទី ២៦ ខែកញ្ញា ឆ្នាំ ២០២៣ លោក អ៊ុម រម្យណី បានថ្លែងថា សាលាជំនាន់ថ្មីទាំង ១១ សាលា ដែលបាននិងកំពុងដាក់ឱ្យអនុវត្តនេះ បានទទួលជោគជ័យស្ទើរតែ ១០០ ភាគរយ ទៅតាមគោលដៅដែលក្រសួងបានកំណត់។
សាលារៀនមួយ មុននឹងអាចវាយតម្លៃបានថា ជាសាលា NGS ពេញលក្ខណៈលុះត្រាគោរពទៅតាមគោលការណ៍មូលដ្ឋាន ដែលជាសូចនាករទាំង ២១ របស់សាលា។ តាមគោលនយោបាយរបស់ក្រសួង ក្រសួងក៏កំពុងតែរៀបចំសាលា ៨ សាលាទៀត នៅរាជធានីនិងខេត្តសំខាន់ៗដូចជា រាជធានីភ្នំពេញ ខេត្តបាត់ដំបង ស្វាយរៀង និងខេត្តមួយចំនួនទៀត ដើម្បីឱ្យសាលាទាំងអស់ នេះក្លាយទៅជាសាលដែលមានលក្ខណៈស្វ័យភាព ក្នុងការរៀបចំគ្រប់គ្រងសាលាដោយខ្លួនឯង ធានាបាននូវគុណភាពមួយខ្ពស់ សម្រាប់ជាគ្រឹះស្ថានក្នុងសិក្សានៅថ្នាក់ឧត្តមសិក្សា ឬក៏ការចាប់យកឱកាសការងារល្អ។
លោកបញ្ជាក់ថា៖ «សាលា ៨ ត្រូវបានជ្រើសរើសរួចហើយ និងកំពុងតែចេញដំណើរដែរ ដែលឯកឧត្តមឧបនាយក រដ្ឋមន្ត្រី រដ្ឋមន្ត្រីក្រសួងអប់រំនឹងប្រកាសដាក់ឱ្យដំណើរការ ក្នុងពេលឆាប់ៗខាងមុខ។ នៅពេលនោះហើយក្រុមការងារជំនាញរបស់ក្រសួងអប់រំនឹងចុះទៅបញ្ជ្រាប និងបណ្តុះបណ្តាលដល់ធនធានមនុស្ស ដែលមានស្រាប់នៅតាមសាលាទាំងនោះ»។
បើតាមលោក រម្យណី ថវិកាដែលខាងគម្រោងធនាគារអភិវឌ្ឍន៍អាស៊ី (ADB) អាចជួយបានគឺក្នុងកម្រិតមួយសម្រាប់ប្រើប្រាស់ក្នុងពេលចាប់អនុវត្តគម្រោង ដូចជាការចំណាយលើសម្ភារបរិក្ខារជាដើម ប៉ុន្តែសម្រាប់និរន្តរភាពនៃដំណើរការសាលាជំនាន់ថ្មីនេះ រាជរដ្ឋាភិបាលបានវិនិយោគស្ទើរតែទាំងស្រុង។
ក្រោមគំនិតផ្តួចផ្តើមភាពជាដៃគូរៀនសូត្រ រវាងសាលាជំនាន់ថ្មីនិងសាកលវិទ្យាល័យគ្រប់គ្រងអាស៊ីបូព៌ា លោកសាស្ត្រាចារ្យ James Chua សាកលវិទ្យាធិការ នៃសាកលវិទ្យាល័យគ្រប់គ្រងអាស៊ីបូព៌ាបានថ្លែងដែរថា នេះជាលើកដំបូងនៅក្នុងវិស័យអប់រំនៅកម្ពុជាដែលសាលារៀនជំនាន់ថ្មីចំនួន ៥ បានរួមសហការជាមួយសាកលវិទ្យាល័យគ្រប់គ្រងអាស៊ីបូព៌ា ដើម្បីផ្តល់ការអប់រំប្រកបដោយគុណភាពតាមរយៈអាហារូបករណ៍ និងការគាំទ្រផ្សេងៗ។
លោកបញ្ជាក់ថា៖ «សាកលវិទ្យាល័យគ្រប់គ្រងអាស៊ីបូព៌ានឹងសហការជាមួយសាលាជំនាន់ថ្មីចំនួន ៥ ក្នុងការអនុវត្តសកម្មភាពស្នូលទាំង ៤ គឺ អាហារូបករណ៍ ការឧបត្ថម្ភ, ការគាំទ្រនិងការចែករំលែកដែលហៅថា 4S ក្នុងកិច្ចសហប្រតិបត្តិការនេះ។ គំនិតផ្តួចផ្តើមនេះនឹងត្រូវអនុវត្តរយៈពេល ៥ ឆ្នាំ ជាមួយនឹងការចំណាយប្រមាណ ៥ លានដុល្លារអាមេរិក»។
ជាមួយគ្នានោះដែរ លោក សៅ ចន្ថា នាយកវិទ្យាល័យសម្តេចអគ្គធម្មពោធិសាលជាស៊ីម ព្រែកអញ្ចាញ បានប្រាប់ឱ្យដឹងដែរថា ការរីកធំធាត់នៃកម្មវិធីសិក្សាសាលាជំនាន់ថ្មីនៅតាមគ្រឹះស្ថានសិក្សារដ្ឋនានា គឺជាផ្នែកមួយដ៏សំខាន់សម្រាប់ការពង្រឹងវិស័យអប់រំកម្ពុជា។
លោកនិយាយថា៖ «ខ្ញុំគិតថា ការរីកធំធាត់លើកម្មវិធីសិក្សាសាលាជំនាន់ថ្មីនេះ ពិតជាផ្តល់នូវអត្ថប្រយោជន៍ និងផ្តល់នូវភាពរឹងមាំក្នុងវិស័យអប់រំរបស់យើងពីពេលនេះទៅអនាគត។ សាលាជំនាន់ថ្មី គឺជាការផ្លាស់ប្តូរបរិបទ និងផ្នត់គំនិតថ្មីសម្រាប់វិស័យអប់រំដែលយើងសង្ឃឹមថា នឹងមានការរីកចម្រើន ហើយសមត្ថភាពចំណេះដឹង ដែលសិស្សទទួលបានសមស្របនឹងពេលវេលា យុគសម័យថ្មីរបស់យើង»។
បើតាមក្រសួងអប់រំ បច្ចុប្បន្នសាលាជំនាន់ថ្មីមាន ១១ សាលា ដែលបាននិងកំពុងដំណើរការ ក្នុងនោះមានសាលាបឋមសិក្សាចំនួន ៤ និងសាលាមធ្យមសិក្សាចំនួន ៧។ សាលាបឋមសិក្សាទាំង ៤ មាន៖ សាលាបឋមសិក្សាហ៊ុន សែន កំពង់ចាម ទីរួមខេត្តកំពង់ចាម, សាលាបឋមសិក្សាព្រះរាជអគ្គមហេសី ក្នុងស្រុកឧដុង្គ ខេត្តកំពង់ស្ពឺ, សាលាបឋមសិក្សាអង្គរបាន ស្រុកកងមាស ខេត្តកំពង់ចាម និងសាលាបឋមសិក្សាស្វាយជ្រំ នៅស្រុកស្វាយជ្រំ ខេត្តស្វាយរៀង។
ចំណែកឯសាលាមធ្យមសិក្សាទាំង ៧ រួមមាន៖ វិទ្យាល័យព្រះស៊ីសុវត្ថិ នៅខណ្ឌដូនពេញ ក្នុងរាជធានីភ្នំពេញ, វិទ្យាល័យ ហ៊ុន សែន កំពង់ចាម ទីរួមខេត្តកំពង់ចាម, វិទ្យាល័យព្រែកលៀប នៅជ្រោយចង្វាររាជធានីភ្នំពេញ, វិទ្យាល័យសម្ដេច ជា ស៊ីម ព្រែកអញ្ចាញ នៅមុខកំពូលខេត្តកណ្ដាល, វិទ្យាល័យ ហ៊ុន សែន ពាមជីកង ខេត្តកំពង់ចាម និងវិទ្យាល័យព្រះយុគន្ធរ រាជធានីភ្នំពេញ។
សូមជម្រាបថា រដ្ឋាភិបាលកម្ពុជាបានបង្កើតកម្មវិធីសាលាជំនាន់ថ្មី ផ្ដោតទៅលើមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ដើម្បីជំរុញឱ្យមានអ្នកជំនាញខាងវិទ្យាសាស្ត្រ កាន់តែច្រើននៅកម្ពុជា។ កម្មវិធីនេះ ត្រូវបានក្រសួងអប់រំ ដាក់ឱ្យអនុវត្តសាកល្បងនាឆ្នាំ ២០១៥ មក៕
