លោក វង្ស ពិសេន ថ្លែងនាពេលកន្លងទៅ។ រូបថត RCA
ភ្នំពេញៈ អគ្គមេបញ្ជាការ នៃកងយោធពលខេមរភូមិន្ទលោក វង្ស ពិសេន ក្រើនរំឭកដល់កងកម្លាំងពិសេសប្រឆាំងភេរវកម្ម ឱ្យបង្កើនការយកចិត្តទុកដាក់ហ្វឹកហ្វឺនពង្រឹងសមត្ថភាព ដើម្បីការពារសន្តិភាព ស្ថិរភាព សន្តិសុខជាតិ និងឆ្លើយតបយ៉ាងមានប្រសិទ្ធភាពនូវអំពើភេរវកម្មតាមគ្រប់រូបភាព បើទោះបីជាកម្ពុជាពុំមែនជាមុខសញ្ញានៃភេរវកម្មក្តី។
យោងតាមសេចក្តីប្រកាសរបស់អគ្គបញ្ជាការដ្ឋាននៃកងយោធពលខេមរភូមិន្ទ កាលពីថ្ងៃទី ២៦ ខែកញ្ញា បានឱ្យដឹងថា ភេរវកម្ម គឺជាយុទ្ធសាស្ត្របែបថ្មីមួយដែលបាននិងកំពុងគំរាមកំហែងដល់វិស័យសន្តិសុខជាច្រើន នៅក្នុងតំបន់ និងពិភពលោក ដែលតម្រូវឱ្យសហគមន៍អន្តរជាតិទាំងមូលត្រូវសហប្រតិបត្តិការរួមគ្នា ដើម្បីប្រយុទ្ធទប់ស្កាត់អំពើភេរវកម្មនេះ។
លោកថា៖ «សម្រាប់កម្ពុជា បើទោះបីពុំមែនជាមុខសញ្ញានៃអំពើភេរវកម្ម ប៉ុន្តែត្រូវប្រុងប្រយ័ត្នជានិច្ច ដោយធ្វើការគ្រប់គ្រងកម្លាំង បង្កើនកិច្ចសហប្រតិបត្តិការជាមួយស្ថាប័នពាក់ព័ន្ធ បណ្តាប្រទេសក្នុងតំបន់ ក៏ដូចជាដៃគូអន្តរជាតិ ដើម្បីទប់ស្កាត់ និងបង្ក្រាបភេរវកម្មឆ្លងដែន តាមរយៈការចែករំលែកព័ត៌មាន ការស្រាវជ្រាវ និងការផ្លាស់ប្តូរបទពិសោធន៍ពីគ្នាទៅវិញទៅមក»។
លោក វង្ស ពិសេន ក៏បានថ្លែងថា ស្នាដៃរបស់អង្គភាពប្រឆាំងភេរវកម្មថា បានដើរតួយ៉ាងសំខាន់ ក្នុងកិច្ចសហការការពាររាជធានីភ្នំពេញ និងបណ្តាខេត្តជាប់សមុទ្រឱ្យមានសុខសុវត្ថិភាព និងត្រៀមដោះស្រាយគ្រប់យថាហេតុដែលកើតមានអំពើភេរវកម្មតាមគ្រប់រូបភាព ទទួលបានលទ្ធផលគួរជាទីមោទនៈ។ ទន្ទឹមនឹងនេះក៏ត្រូវពង្រឹងការងារអប់រំចិត្តសាស្ត្រ អត្តចរិត វិន័យ សីលធម៌ អនុវត្តយ៉ាងម៉ឺងម៉ាត់តាមការដឹកនាំរបស់ថ្នាក់លើ សំដៅធានាបាននូវភាពស្មោះត្រង់ដាច់ខាតចំពោះរាជរដ្ឋាភិបាល»។
អគ្គលេខាធិការនៃរាជបណ្ឌិត្យសភាកម្ពុជាលោក យង់ ពៅ នៅថ្ងៃទី ២៧ ខែកញ្ញា បានប្រាប់ឱ្យដឹងថា ជាការពិត កងកម្លាំង កងទ័ពជើងគោក ជើងទឹក និងអាកាសក្តី សំខាន់កងទ័ពជើងគោកត្រូវតែពង្រឹងសមត្ថភាព ស្របពេលដែលបច្ចុប្បន្នសណ្តាប់ធ្នាប់ពិភពលោកកំពុងតែផុយស្រួយ ប្រឈមនឹងបញ្ហាសំខាន់ៗ រួមទាំងបញ្ហាភេរវកម្មជាដើមត្រូវតែពង្រឹងសមត្ថភាពទាំងសមត្ថភាពកងទ័ព សមត្ថភាពការងារដឹកនាំគ្រប់គ្រង៕
