![](https://pppkhmer.sgp1.digitaloceanspaces.com/image/main/field/image/topic_29._stalls_for_sale_in_sea_festival_at_sihanouk_ville_on_dec_10_2022_by_supplied_1_0.jpg)
ប្រជាពលរដ្ឋចូលរួមបុណ្យសមុទ្រនៅខេត្តព្រះសីហនុក្នុងឆ្នាំ២០២២។ រូបថត សហការី
ភ្នំពេញៈ ថ្នាក់ដឹកនាំខេត្តកែប បានណែនាំឱ្យប្រជាពលរដ្ឋ និងកងកម្លាំងទាំងអស់ ចាប់ផ្ដើមរក្សាសណ្ដាប់ធ្នាប់សាធារណៈ រក្សាអនាម័យ បរិស្ថាន និងកែលម្អហេដ្ឋារចនាសម្ព័ន្ធមួយចំនួននៅក្នុងខេត្តឱ្យកាន់តែស្អាត និងទាក់ទាញដើម្បីត្រៀមរៀបចំពិធីបុណ្យសមុទ្រដែលនឹងប្រារព្ធនៅដើមខែធ្នូ ឆ្នាំ២០២៣។
លោក សោម ពិសិដ្ឋ អភិបាលខេត្តកែប បានប្រាប់ឱ្យដឹងនៅថ្ងៃទី១ ខែតុលាថា ក្រោយពីមានការប្រជុំជាមួយក្រសួងទេសចរណ៍នៅចុងខែកញ្ញា កន្លងមកនេះ ពិធីបុណ្យសមុទ្រលើកទី១០ ជុំទី៣ នឹងរៀបចំនៅខេត្តកែប ដោយបានកំណត់ធ្វើពីថ្ងៃទី១ ដល់ថ្ងៃទី៣ ខែធ្នូ។ ទីតាំងនៃការរៀបចំពិធីបុណ្យនេះ អាជ្ញាធរខេត្តបានកំណត់ទីតាំងបឋមរួចហើយ ប៉ុន្តែត្រូវតែរង់ចាំពីក្រសួងចុះមកពិនិត្យ និងសម្រេចប៉ុណ្ណោះ។
លោកបានឱ្យដឹងទៀតថា ក្នុងនាមជាម្ចាស់ផ្ទះដើម្បីរៀបចំឱ្យពិធីបុណ្យសមុទ្រនេះអាចប្រព្រឹត្តទៅដោយជោគជ័យ អាជ្ញាធរនឹងរៀបចំកែលម្អហេដ្ឋារចនាសម្ព័ន្ធមួយចំនួននៅក្នុងក្រុងកែបដូចជា ការកែលម្អផ្លូវ កែលម្អសោភណភាពក្រុងណែនាំផ្សព្វផ្សាយអប់រំដល់ប្រជាពលរដ្ឋ មន្ត្រីរាជការ និងកងកម្លាំងប្រដាប់អាវុធទូទាំងខេត្តឱ្យមានស្មារតីក្នុងការចូលរួមសម្អាតអនាម័យ ឱ្យក្លាយទៅជាទីក្រុងស្អាតដើម្បីរៀបចំពិធីបុណ្យសមុទ្រនាពេលខាងមុខនេះ។
លោក សោម ពិសិដ្ឋ បញ្ជាក់ថា៖ «គោលដៅបឋមដែលយើងប្រជុំគ្នាកន្លងមកនេះ គឺយើងបណ្ដុះគំនិត ស្មារតីយុវជន សិស្សានុសិស្ស ប្រជាពលរដ្ឋ លោកគ្រូ-អ្នកគ្រូ ក៏ដូចជាមន្ត្រីរាជការ និងកងកម្លាំងប្រដាប់អាវុធទាំងអស់ ឱ្យយល់ជ្រាបពីព្រឹត្តិការណ៍ធំរបស់ខេត្ត ហើយអ្វីដែលយើងត្រូវធ្វើបន្តទៀត គឺមានកម្មវិធីជាច្រើន ដែលត្រូវការកិច្ចសហប្រតិបត្តិការគ្នាជាមួយស្ថាប័នថ្នាក់ជាតិ»។
ដោយសារឆ្នាំនេះ មានព្រឹត្តិការណ៍រៀបចំការបោះឆ្នោត ដូច្នេះពេលវេលានៃការរៀបចំបុណ្យសមុទ្រនេះ គឺមានរយៈពេលខ្លីជាងឆ្នាំមុនៗ ប៉ុន្តែទោះបីជាពេលវេលានៃការរៀបចំពិធីបុណ្យសមុទ្រនេះ មានរយៈពេលខ្លីក៏ដោយ លោកថា ក្នុងនាមជាអាជ្ញាធរខេត្តបានណែនាំប្រជាពលរដ្ឋ និងខិតខំរៀបចំកងកម្លាំងសម្រាប់ការពារសណ្ដាប់ធ្នាប់សាធារណៈចាប់ពីពេលនេះតទៅហើយ។ នៅឆ្នាំនេះ ពិធីបុណ្យសមុទ្រនៅខេត្តកែប នឹងមានការរៀបចំព្រឹត្តិការណ៍កម្សាន្តសប្បាយៗជាច្រើនដូចជា ព្រឹត្តិការណ៍រត់ប្រណាំង មហោស្រពម្ហូបអាហារ ការតាំងពិព័រណ៍សមិទ្ធផលនានា និងការប្រគំតន្ត្រីជាដើម។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក (PATA) បានឱ្យដឹងដែរថា ព្រឹត្តិការណ៍បុណ្យសមុទ្រនេះ ជាកម្មវិធីប្រចាំឆ្នាំដែលធ្វើឡើងសម្រាប់ជំរុញឱ្យមានភ្ញៀវទេសចរក្នុងស្រុកប៉ុណ្ណោះ ដើម្បីឱ្យមានកំណើនភ្ញៀវទេសចរ គឺទាល់តែមានការផ្សព្វផ្សាយសកម្មភាពនានា ទាំងរដ្ឋ និងឯកជនពីផលិតផលទេសចរណ៍ទៅកាន់ពិភពលោក ទើបវាអាចមានកំណើនទេសចរណ៍បាន ខណៈដែលកន្លងមកនៅក្នុងព្រឹត្តិការណ៍បុណ្យសមុទ្រនៅកម្ពុជា ច្រើនតែឃើញមានតែកម្មវិធីពិព័រណ៍ផលិតផលគ្រឿងស្រវឹង និងភេសជ្ជៈប៉ូវកម្លាំង ដែលពិព័រណ៍ទាំងនេះ វាមិនបានបម្រើដល់សេដ្ឋកិច្ចជាតិពិតប្រាកដនោះទេ។
លោក ធួន ស៊ីណាន បានថ្លែងថា៖ «ពិព័រណ៍បែបហ្នឹង មិនមែនជាសកម្មភាពនៃការទាក់ទាញ និងការចម្រើនសេដ្ឋកិច្ចនោះទេ ប៉ុន្តែបើយើងធ្វើឱ្យវាត្រូវទៅតាមរូបមន្ត ដោយពិព័រណ៍គួរតែពិព័រណ៍ឱ្យផលិតផលដែលបម្រើនៅក្នុងស្រុក មិនថាគ្រឿងសង្ហារិម ចំណីអាហារ ឬវត្ថុអនុស្សាវរីយ៍ទេ ទាំងនោះទើបជាការចម្រើន»។
លោក ថ្លែងថា អាជ្ញាធរខេត្ត និងក្រសួង គួរតែមានការហាមឃាត់កុំឱ្យមានការតាំងពិព័រណ៍នូវផលិតផលស្រាបៀរ និងភេសជ្ជៈប៉ូវកម្លាំង នៅក្នុងព្រឹត្តិការណ៍ពិធីបុណ្យសមុទ្រ ដូចប្រទេសវៀតណាម ថៃ និងបណ្ដាប្រទេសដទៃទៀតផងដែរ។
កាលពីចុងឆ្នាំ២០២២កន្លងទៅ ក្រសួងទេសចរណ៍បានរៀបចំបុណ្យសមុទ្រនៅខេត្តព្រះសីហនុដែលព្រឹត្តិការណ៍នេះរៀបចំឡើងស្របទៅនឹងមហាសន្និបាតក្លិបឆ្នេរសមុទ្រដែលស្អាតបំផុតលើពិភពលោកពីថ្ងៃទី ៩-១៤ ខែធ្នូ ឆ្នាំ២០២២ ផងដែរ៕