លោក នេត្រ ភក្ដ្រា (ស្ដាំ) ក្នុងជំនួបជាមួយភាគីថៃកាលពីថ្ងៃទី ២ ខែតុលា។ រូបថត ក្រសួងព័ត៌មាន
ភ្នំពេញៈ ក្រសួងព័ត៌មាន និងស្ថានទូតថៃបានពិភាក្សាពីការពង្រឹងកិច្ចសហប្រតិបត្តិការលើវិស័យព័ត៌មានបន្ថែមទៀត ដើម្បីប្រយុទ្ធប្រឆាំងព័ត៌មានក្លែងក្លាយ។ នេះបើយោងតាមគេហទំព័ររបស់ក្រសួងព័ត៌មានចេញផ្សាយកាលពីទី ២ ខែតុលា។
ក្រសួងព័ត៌មានបានឱ្យដឹងថា ការជំរុញនេះធ្វើឡើងក្នុងជំនួបរវាងលោក នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកឈើតកៀត អត្ថាករ ឯកអគ្គរាជទូតថៃប្រចាំនៅកម្ពុជា និងសមាគមអ្នកសារព័ត៌មានថៃ ដែលបានមកទស្សកិច្ចនៅកម្ពុជាកាលពីថ្ងៃទី ២ ខែតុលា ឆ្នាំ ២០២៣ នៅទីស្តីការក្រសួងព័ត៌មាន។
ប្រភពដដែលបានផ្សព្វផ្សាយថា កិច្ចពិភាក្សានេះបានផ្តោតសំខាន់លើការពង្រឹងកិច្ចសហប្រតិបត្តិការលើវិស័យព័ត៌មានក្នុងក្របខ័ណ្ឌក្រសួងព័ត៌មានជាមួយស្ថានទូតថៃប្រចាំនៅកម្ពុជា និងសមាគមសារព័ត៌មានថៃ ដើម្បីផ្លាស់ប្តូរបទពិសោធន៍ ជាពិសេសរួមគ្នាដើម្បីប្រយុទ្ធប្រឆាំងព័ត៌មានក្លែងក្លាយ។
ក្រសួងលើកឡើងថា៖ «បើសិនជាយើងទុកឱ្យព័ត៌មានក្លែងក្លាយទៅមុខកាន់តែយូរ គឺវាកាន់តែបង្កផលប៉ះពាល់ទៅដល់សង្គមជាតិ និងប្រជាជន។ ដូច្នេះចាំបាច់ណាស់ដែលត្រូវចាត់វិធានការឱ្យបានទាន់ពេលវេលាទៅលើព័ត៌មានក្លែងក្លាយនេះ»។
លោក នេត្រ ភក្ត្រា បានលើកឡើងថា កិច្ចសហប្រតិបត្តិការលើកម្មវិធីវិទ្យុមិត្តភាពកម្ពុជាថៃ (Twin Radio Cambodia-Thai) នៅតាមបណ្ដោយព្រំដែនគឺជាផ្នែកមួយយ៉ាងសំខាន់លើការផ្សព្វផ្សាយព័ត៌មានទាក់ទងនឹងប្រទេសទាំង ២ ដើម្បីឱ្យប្រជាជនដែលរស់នៅបណ្ដោយព្រំដែនទទួលបានព័ត៌មានគ្រប់ជ្រុងជ្រោយ ជាពិសេសទាក់ទងការអនុវត្តច្បាប់របស់ប្រទេសទាំង ២ ដើម្បីចៀសផុតពីការចាញ់បោកមេខ្យល់ឬចាញ់បោកអ្វីផ្សេងៗ និងមានសុវត្ថិភាពនៅក្នុងការបំពេញការងារ។
ក្រសួងបានបញ្ជាក់ថា៖ «ឯកឧត្តមអគ្គរាជទូតថៃ ក៏បានឯកភាពទៅលើអ្វីដែលឯកឧត្តមរដ្ឋមន្ត្រីក្រសួងព័ត៌មានបានលើកឡើង ហើយសន្យានឹងបន្តពង្រឹងកិច្ចសហប្រតិបត្តិការបន្ថែមទៀត ដោយក្នុងនោះផ្តោតជាសំខាន់ទៅលើការពង្រឹងសមត្ថភាពរបស់ខ្លួន អ្នកសារព័ត៌មាន តាមរយៈការផ្លាស់ប្តូរដំណើរទស្សនកិច្ចគ្នារវាងអ្នកសារព័ត៌មានកម្ពុជា និងថៃ ក៏ដូចជាការបណ្តុះបណ្តាលធនធានមនុស្ស»។
ក្រសួងបន្តថា តាមរយៈលោក ឈើត កៀត អត្ថាករ ក្រសួងព័ត៌មានស្នើភាគីឱ្យជួយបណ្ដុះបណ្ដាលអ្នកសារព័ត៌មានកម្ពុជាដើម្បីពង្រឹងសមត្ថភាព ដោយក្រសួងបន្ថែមថា៖ «ព្រោះយើងបានផ្ដោតជាសំខាន់ទៅលើសន្តិសុខព័ត៌មានដែលជាផ្នែកសំខាន់សម្រាប់ប្រជាជនកម្ពុជា គឺទី១ ការទទួលបានព័ត៌មានគ្រប់ជ្រុងជ្រោយ ទី២ គឺព័ត៌មានដែលមានគុណភាព និងទី៣ ព័ត៌មានដែលមានសុវត្ថិភាព គឺមិនមានបញ្ហារឿងព័ត៌មានក្លែងក្លាយអ្វីជាដើម ហើយធ្វើម៉េចឱ្យសហការគ្នាដើម្បីទប់ស្កាត់ព័ត៌មានក្លែងក្លាយឱ្យបានកុំឱ្យកើតមានឡើង»។
រីឯស្ថានទូតថៃបានបញ្ជាក់នៅថ្ងៃទី ៣ ខែតុលាថា ជំនួបរវាងភាគីថៃ ជាមួយ លោករដ្ឋមន្ដ្រី នេត្រ ភក្ត្រា គឺដើម្បីផ្សារភ្ជាប់បណ្តាញអ្នកសារព័ត៌មានរវាងប្រទេសទាំង ២ និងពិភាក្សាអំពីកិច្ចសហប្រតិបត្តិការលើផ្នែកផ្សេងៗ។
ស្ថានទូតថៃបន្តថា៖ «ភាគីទាំងសងខាងយល់ឃើញថា អ្នកសារព័ត៌មានគឺជាឧបករណ៍សំខាន់មួយសម្រាប់ទំនាក់ទំនង ផ្សព្វផ្សាយព័ត៌មាន និងសម្រាប់បង្កើតភាពយល់ដឹងទៅកាន់ប្រជាជនទាំងនៅក្នុង និងក្រៅប្រទេស។ ដូច្នេះហើយទើបអ្នកសារព័ត៌មានចាំបាច់ត្រូវតែមានការយល់ដឹងអំពីខ្លឹមសារ និងរបៀបរបបទំនាក់ទំនង ផ្សព្វផ្សាយយ៉ាងច្បាស់លាស់ និងសុក្រឹត...»។
ដោយឡែកនៅក្នុងជំនួបជាមួយលោក នេត្រ ភក្ត្រា កាលពីថ្ងៃទី ២ ខែតុលា លោក Piyawat Jriyase tapong នាយកប្រតិបត្តិពាណិជ្ជកម្មក្រុមហ៊ុន THAICOM ប្រទេសថៃ បានបញ្ជាក់អំពីការបន្តគាំទ្រ និងកិច្ចសហប្រតិបត្តិការរបស់ក្រុមហ៊ុននេះចំពោះក្រសួងព័ត៌មានដោយជួយលើការផ្សព្វផ្សាយតាមប្រព័ន្ធផ្កាយរណបផ្សេងៗទៅកាន់បណ្ដាប្រទេសពាក់ព័ន្ធរបស់ស្ថានីយទូរទស្សន៍ជាតិ និងស្ថានីយទូរទស្សន៍ឯកជនមួយចំនួន។ នេះបើយោងតាមក្រសួងព័ត៌មាន។
ក្រសួងបានបញ្ជាក់ថា នៅក្នុងជំនួបនោះ លោក នេត្រ ភក្ត្រា បានថ្លែងថា ការងារអាទិភាពរបស់ក្រសួងព័ត៌មានគឺការពង្រឹងសមត្ថភាពមន្ត្រីពាក់ព័ន្ធនឹងជំនាញឌីជីថល និងការត្រៀមខ្លួននៅក្នុងការផ្លាស់ប្តូរការផ្សព្វផ្សាយពីប្រព័ន្ធអាណាឡូកទៅឌីជីថល៕
