ក្រសួងសុខាភិបាល អំពាវនាវឱ្យប្រជាពលរដ្ឋទាំងអស់ ចូលរួមអនុវត្តតាមការណែនាំ និងប្រកាន់ខ្ជាប់នូវវិធានការចំនួន ៣ មុនពេល អំឡុងពេល និងក្រោយពេលទឹកជំនន់ ដើម្បីកាត់បន្ថយឱ្យបានជាអតិបរមានូវផលប៉ះពាល់សុខភាព និងអាយុជីវិតជនរងគ្រោះ។
តាមរយៈសេចក្តីប្រកាសព័ត៌មានស្តីពីការការពារសុខភាព ត្រៀមបង្ការ និងឆ្លើយតប ចំពោះការប្រែប្រួលអាកាសធាតុ និងគ្រោះទឹកជំនន់ ក្រសួងសុខាភិបាល បានបញ្ជាក់ថា ស្ថានភាពធាតុអាកាសនៅកម្ពុជា ជាបន្តបន្ទាប់ និងដោយសារការប្រែប្រួលអាកាសធាតុ អាចបង្កឱ្យមានការផ្លាស់ប្ដូរនូវ របបទឹកភ្លៀងនឹងបង្កឱ្យកើតមាននូវគ្រោះធម្មជាតិដូចជា ទឹកជំនន់ ផ្គររន្ទះ ខ្យល់កន្ត្រាក់ រលកកម្ដៅ គ្រោះរាំងស្ងួត ដែលអាចបណ្ដាលឱ្យមានផលប៉ះពាល់ដល់ហេដ្ឋារចនាសម្ព័ន្ធ ទ្រព្យសម្បត្តិ សុខភាព អាចបង្កឱ្យមានជំងឺឆ្លង ជំងឺមិនឆ្លង របួស និងអាចបាត់បង់អាយុជីវិតប្រជាជន។ ការត្រៀមបង្ការនេះ ដោយក្រសួងសុខាភិបាល ផ្អែកទៅលើការព្យាករណ៍ពីក្រសួងធនធានទឹក និងឧតុនិយម។
ក្រសួងសុខាភិបាល បានណែនាំថា មុនពេលទឹកជំនន់ ពលរដ្ឋត្រូវតាមដានស្ថានភាពទឹកជំនន់ ត្រៀមទីទួលសុវត្ថិភាព និងស្បៀងអាហារ ត្រូវធ្វើរបងព័ទ្ធជុំវិញស្រះ ឬកន្លែងដែលមានទឹកជ្រៅ ត្រូវថែរក្សាបរិស្ថានឱ្យបានស្អាត និងសាងសង់បង្គន់ ឱ្យខ្ពស់ដើម្បីការពារទឹកជំនន់។
ចំណែកអំឡុងពេលមានទឹកជំនន់ ក្រសួងបានណែនាំថា មិនត្រូវចូលទៅក្នុងផ្ទះចាស់ ឬអគារទ្រុឌទ្រោមព្រោះអាចស្រុតបាក់បែកបង្កឱ្យគ្រោះថ្នាក់, មិនត្រូវប៉ះពាល់គ្រឿងប្រើប្រាស់អគ្គិសនីដោយដៃសើម ឬ កំពុងឈរនៅក្នុងទឹក។ នៅពេលធ្វើដំណើរដោយ ជិះទូក ឬ កាណូត នៅពេលយប់ត្រូវមានភ្លើងបំភ្លឺ ត្រូវសម្រាន្តក្នុងមុងគ្រប់ពេលដើម្បីការពារជំងឺគ្រុនឈាម គ្រុនចាញ់ និងជំងឺផ្សេងៗ ចំពោះស្ត្រីមានផ្ទៃពោះត្រូវតាមដាន និងពិនិត្យផ្ទៃពោះតាមការកំណត់របស់មណ្ឌលសុខភាព ឬមន្ទីរពេទ្យ និងត្រូវប្រុងប្រយ័ត្នចំពោះគ្រោះថ្នាក់ដោយសារពស់ចឹក ឬសត្វអាសិរពិសផ្សេងៗ។
ដោយឡែក ក្រោយពេលទឹកជំនន់ ក្រសួងបានជំរុញឱ្យពលរដ្ឋ បន្តបរិភោគចំណីអាហារស្អាត ទឹកស្អាត និងអនាម័យខ្លួនប្រាណឱ្យបានស្អាត ដើម្បីចៀសវាងនូវជំងឺផ្សេងៗ ត្រូវបន្តសម្រាន្តក្នុងមុងគ្រប់ពេល ដើម្បីការពារជំងឺគ្រុនឈាមជំងឺគ្រុនចាញ់ ជំងឺហ្សីកា និងជំងឺ ផ្សេងៗទៀត ត្រូវពិនិត្យមើលផ្ទះក្រែងមានបាក់ស្រុតនាំឱ្យមានគ្រោះថ្នាក់ ប្រុងប្រយ័ត្នក្រែងមានសត្វពស់ ឬសត្វ អសិរពិសផ្សេងៗ។ អនាម័យបរិស្ថានជុំវិញ និងក្នុងផ្ទះ ព្រោះក្រោយពេលទឹកស្រកទៅ បានបន្សល់នូវ ភាពកខ្វក់ និងមេរោគជាច្រើនរស់នៅក្នុងទឹក ចៀសវាងនូវការដក់ទឹកជុំវិញផ្ទះ និងក្នុងផ្ទះនាំឱ្យមានដង្កូវទឹកកើតមូសខ្លា និងមូសដែកគោលអាចបង្កឱ្យមានជំងឺគ្រុនឈាម និង ជំងឺគ្រុនចាញ់ ស្តារនិងសម្អាតអណ្តូងទឹកឡើងវិញមុននឹងប្រើប្រាស់ ព្រមទាំងជួសជុល និងសង់បង្គន់ឡើងវិញដោយជានិច្ចកាល ត្រូវបន្ទោបង់ក្នុងបង្គន់គ្រប់ពេល។
ក្រសួងបញ្ជាក់ទៀតថា៖«មុនពេល អំឡុងពេល និងក្រោយពេលទឹកជំនន់ ប្រសិនបើលោកអ្នកមានបញ្ហាសុខភាពសូមស្វែងរកការពិគ្រោះ ពិនិត្យ និងព្យាបាលជំងឺជាបន្ទាន់នៅប៉ុស្តិ៍សុខភាពក្បែរទីទួលសុវត្ថិភាព ឬមណ្ឌលសុខភាព ឬមន្ទីរពេទ្យដែលនៅជិតអ្នកបំផុត»៕
