ក្រុមគ្រូទេព្យនៅសមាគមគ្រូពេទ្យស្ម័គ្រចិត្ត TYDA ពេលពិនិត្យជំងឺជូនពលរដ្ឋនៅខេត្ដកណ្ដាលកាលពីខែសីហា ឆ្នាំ ២០២៣។ រូបថត TYDA
ភ្នំពេញៈ លោកស្រី ពេជ ចន្ទមុន្នី អនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) បានបញ្ជាក់ថា អតីតនាយករដ្ឋមន្ត្រី ហ៊ុន សែន និងភរិយា បានប្តេជ្ញាចិត្តបន្តជួយគាំទ្របេសកកម្មរបស់ក្រុមគ្រូពេទ្យ TYDA ជាប់ជាប្រចាំ ដើម្បីចូលរួមចំណែកព្យាបាលពលរដ្ឋដល់មូលដ្ឋានដោយមិនគិតថ្លៃ។
ការលើកឡើងរបស់លោកស្រី ពេជ ចន្ទមុន្នី ដូច្នេះ ធ្វើឡើងក្នុងពេលលោកស្រីដឹកនាំមន្ត្រីចុះពិនិត្យ និងព្យាបាលជំងឺជូនដល់ប្រជាពលរដ្ឋរបស់ក្រុមគ្រូពេទ្យ TYDA នៅវិទ្យាល័យច្បារអំពៅ ខណ្ឌច្បារអំពៅ រាជធានីភ្នំពេញ កាលពីថ្ងៃទី៨ ខែតុលា ឆ្នាំ២០២៣។
យោងតាមហ្វេសប៊ុកលោកនាយករដ្ឋមន្ត្រី ហ៊ុន ម៉ាណែត ផ្សព្វផ្សាយកាលពីថ្ងៃទី៩ ខែតុលា បានឱ្យដឹងថាក្នុងឱកាសនោះ លោកស្រី ពេជ ចន្ទមុន្នី បានថ្លែងថា៖ «សម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែយកចិត្តទុកដាក់គិតគូរអំពីសុខទុក្ខ និងសុខភាពរបស់លោកយាយលោកតា អ៊ំពូមីង បងប្អូនប្រជាពលរដ្ឋជាប់ជាប្រចាំ»។
លោកស្រីបន្ថែមថា លោកហ៊ុន សែន អតីតនាយករដ្ឋមន្ត្រីនិងភរិយាបានបង្ហាញការប្តេជ្ញាចិត្តបន្តជួយគាំទ្រការព្យាបាលនិងផ្តល់សេវាសុខភាពដល់ប្រជាជនដល់មូលដ្ឋានរបស់ក្រុមគ្រូពេទ្យ TYDA ជារៀងរហូត ដែលសកម្មភាពទាំងនេះមានរយៈពេល១១ឆ្នាំមកហើយ។
គួរជម្រាបជូនថា ក្នុងរយៈពេលជិត ១១ឆ្នាំ មកនេះ សមាគមគ្រូពេទ្យស្ម័គ្រចិត្តយុវជនសម្តេចតេជោ ហៅកាត់ថា ធីតា (TYDA) ក្រោមការដឹកនាំរបស់លោកហ៊ុន ម៉ាណែត និងភរិយា បានចូលរួមពិនិត្យ និងព្យាបាលអ្នកជំងឺសរុបប្រមាណជាង៥សែននាក់ ជួយបញ្ជូនអ្នកជំងឺទៅព្យាបាលបន្តជាង៧ពាន់នាក់ និងជួយវះកាត់បេះដូងជូនអ្នកជំងឺបានចំនួន ៦៦ នាក់។
ប្រធានវិទ្យាស្ថានវេជ្ជសាស្ត្រជីវសាស្ត្រ និងកសិកម្មនៃរាជបណ្ឌិត្យសភាកម្ពុជាលោក នុត សម្បត្តិ បានថ្លែងថា សកម្មភាពព្យាបាល និងពិនិត្យជំងឺជូនពលរដ្ឋឥតគិតថ្លៃជាកាយវិការមនុស្សធម៌ថ្លៃថ្លា ហើយក្រុមគ្រូពេទ្យស្ម័គ្រចិត្ត TYDA នេះជាមរតកដ៏ប្រពៃដែលលោកអតីតនាយករដ្ឋមន្ត្រីហ៊ុន សែន បានបន្សល់ទុក។
លោកប្រាប់ថា សកម្មភាពទាំងនេះក៏បានញ៉ាំងទឹកចិត្តយុវជនឱ្យមានមនសិការស្រឡាញ់ជាតិ ស្រឡាញ់អំពើមនុស្សធម៌ ចេះសាមគ្គីជាតិផង។
លោកថ្លែងថា៖«សកម្មភាពនេះបានចូលរួមចំណែកលើកកម្ពស់វិស័យសុខភាពសាធារណៈ។ ក្រុមគ្រូពេទ្យ TYDA បានចុះទៅតំបន់ជនបទឆ្ងាយៗ តំបន់ដាច់ស្រយាល ខណៈពេទ្យរដ្ឋធ្វើការតែក្នុងមន្ទីរពេទ្យនោះទេ»។
ចំណែកលោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីការអភិវឌ្ឍ និងសន្ដិភាព បានថ្លែងថា ការប្តេជា្ញបន្តជួយគាំទ្របេសកកម្មរបស់ក្រុមគ្រូពេទ្យTYDA ជាការងារមួយល្អម្យ៉ាង ហើយម្យ៉ាងទៀតប្រជាពលរដ្ឋដែលក្រីក្រមិនអាចមកមន្ទីរពេទ្យបាន ក្រុមគ្រូពេទ្យTYDA ក៏ជួយសម្រួលបានច្រើនផងដែរ។
លោកបានបន្តថា ប៉ុន្តែការជួយរបស់ក្រុមគ្រូពេទ្យនេះគ្រាន់តែជាការជួយបណ្តោះអាសន្ននោះទេ តែក្រសួងសុខាភិបាលជាអ្នកគិតគូរលើកកម្ពស់វិស័យសុខាភិបាលសាធារណៈដោយពង្រឹងមន្ទីរពេទ្យរដ្ឋឱ្យមានគុណភាព សុវត្ថិភាពសម្រាប់ប្រជាពលរដ្ឋដោយការព្យាបាលជំងឺដោយមានការជឿជាក់ពីប្រជាពលរដ្ឋដែលទាំងនេះគឺពិតជាមានសារៈសំខាន់៕
