ស្ថានភាពទឹកស្ទឹងព្រែកត្នោត ក្នុងខណ្ឌដង្កោ រាជធានីភ្នំពេញ កាលពីពេលថ្មីៗនេះ។ រូបថត ហ្វេសប៊ុក
ភ្នំពេញៈ លោក ឃួង ស្រេង អភិបាលរាជធានីភ្នំពេញ បានណែនាំឱ្យរដ្ឋបាលខណ្ឌទាំង ១៤ និងមន្ទីរ អង្គភាពជំនាញទាំងអស់ ធ្វើការត្រៀមវិធានការទប់ទល់នឹងគ្រោះទឹកជំនន់ ដោយត្រូវសហការជាមួយនឹងជំនាញពាក់ព័ន្ធ ដើម្បីជួយសង្គ្រោះប្រជាពលរដ្ឋដែលរងគ្រោះឱ្យទាន់ពេលវេលា។
លោក ឃួង ស្រេង បានចេញសេចក្តីណែនាំបែបនេះនៅថ្ងៃទី ៩ ខែតុលា ដើម្បីចូលរួមបង្ការ និងត្រៀមជួយសង្គ្រោះប្រជាពលរដ្ឋដែលងាយរងគ្រោះ និងមានហានិភ័យខ្ពស់ដោយគ្រោះទឹកជំនន់នៃទន្លេ ស្ទឹង និងទឹកជំនន់ដោយទឹកភ្លៀងនៅតំបន់មួយចំនួន។ លោកបានណែនាំឱ្យរដ្ឋបាលខណ្ឌទាំង ១៤ ជាពិសេសរដ្ឋបាលខណ្ឌដង្កោ ខណ្ឌកំបូល ខណ្ឌព្រែកព្នៅ ខណ្ឌឫស្សីកែវ ខណ្ឌជ្រោយចង្វារ ខណ្ឌច្បារអំពៅ ត្រូវកំណត់ទីទួលសុវត្ថិភាព ដើម្បីត្រៀមជម្លៀសប្រជាពលរដ្ឋ រៀបចំបង្គន់អនាម័យ ទឹកស្អាត និងអគ្គិសនី ដោយធ្វើការសហការជាមួយមន្ទីរអង្គភាពជំនាញពាក់ព័ន្ធសម្រាប់ជូនប្រជាពលរដ្ឋ ប្រើប្រាស់ជាបណ្តោះអាសន្ន។
ជាមួយគ្នានោះដែរលោកអភិបាលរាជធានី ក៏បានណែនាំឱ្យស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ និងបញ្ជាការដ្ឋានយោធភូមិភាគពិសេស ត្រូវត្រៀមកម្លាំងមធ្យោបាយដឹកជញ្ជូន រថយន្ត ទូក កាណូត អូប័រ និងសម្ភារផ្សេងៗ ដើម្បីជួយអន្តរាគមន៍សង្គ្រោះប្រជាពលរដ្ឋរងគ្រោះដោយទឹកជំនន់។
លោក ឃួង ស្រេង បញ្ជាក់ថា៖ «មន្ទីរសុខាភិបាលរាជធានីភ្នំពេញ ត្រូវត្រៀមរៀបចំផែនការការពារសុខភាព និងរថយន្តគិលានសង្គ្រោះ ឧបករណ៍សម្ភារសុខាភិបាល និងថ្នាំសង្កូវផ្សេងៗ ដើម្បីផ្តល់សេវាសុខាភិបាលផ្សេងៗជូនប្រជាពលរដ្ឋនៅតាមទីទួលសុវត្ថិភាពផងដែរ»។
ចំណែកមន្ទីរអប់រំ យុវជន និងកីឡា និងមន្ទីរធម្មការ និងសាសនា ត្រូវណែនាំដល់គ្រប់គ្រឹះស្ថានសិក្សា និងវត្តអារាម ដែលនៅក្នុងតំបន់ងាយរងគ្រោះឱ្យមានការប្រុងប្រយ័ត្នខ្ពស់ ហើយដោយឡែកមន្ទីរអប់រំ ក៏ត្រូវសុំគោលការណ៍អនុញ្ញាតពីក្រសួងអប់រំ ដើម្បីត្រៀមផ្អាកដំណើរការ គ្រឹះស្ថានសិក្សាផងដែរសម្រាប់គ្រឹះស្ថានសិក្សាដែលត្រូវរងគ្រោះដោយទឹកជំនន់។
លោកបន្ថែមថា ប្រជាពលរដ្ឋដែលមានលំនៅឋាននៅតាមបណ្តោយដងទន្លេមេគង្គ និងដងស្ទឹងព្រែកត្នោត ត្រូវបង្កើនការប្រុងប្រយ័ត្នខ្ពស់ តាមដានព័ត៌មានជាប្រចាំអំពីកម្ពស់ទឹក និងត្រូវត្រៀមលក្ខណៈទុកជាមុន ដូចជាទ្រព្យសម្បត្តិ សម្ភារចាំបាច់ និងសត្វពាហនៈឱ្យបានរៀបរយ ដើម្បីជម្លៀសទៅទីទួលសុវត្ថិភាព។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុន្នី បានប្រាប់ឱ្យដឹងនៅថ្ងៃទី ៩ ខែតុលាថា ជំនន់ទឹកភ្លៀងបានបង្កឱ្យប៉ះពាល់ចំនួន ១១ ខេត្ត ស្មើនឹង ៥៩ ក្រុង ស្រុកដែលមាន ២៣០ ឃុំ សង្កាត់ និងបង្កឱ្យប៉ះពាល់ប្រជាពលរដ្ឋប្រមាណ ៣៦ ៨៦៥ គ្រួសារ និងមានការជម្លៀសប្រជាជនចំនួន ១ ៩៣២ គ្រួសារ។
ទឹកជំនន់ក៏បង្កឱ្យប៉ះពាល់ផ្ទះចំនួន ២៥ ២៨៧ ខ្នង, សាលារៀន១៤០ ខ្នង ផ្លូវចំនួន ៤១៩ ៥៤២ ម៉ែត្រ, ស្រូវប៉ះពាល់ចំនួន ៣០ ម៉ឺនហិកតា និងខូចខាតស្រូវប្រមាណជា ៣ ៣៤២ ហិកតា។ លោក សុទ្ធ គឹមកុលមុន្នី បន្តថា៖ «ខេត្តដែលនៅបន្តរងប៉ះពាល់មានខេត្តសៀមរាប ពោធិ៍សាត់ ព្រះវិហារ ក្រចេះ កំពង់ចាម កំពង់ធំ បាត់ដំបង កណ្តាល ត្បូងឃ្មុំ ប៉ៃលិន និងខេត្តបន្ទាយមានជ័យ»។
លោក សុទ្ធ គឹមកុលមុន្នី បានឱ្យដឹងថា ប្រសិនបើស្ថានភាពទឹកភ្លៀងមិនមានការបង្អុរចុះមកខ្លាំងទៀតទេនោះ ស្ថានភាពទឹកជំនន់ដោយសារទឹកភ្លៀងនេះ នឹងបន្តស្រកចុះ។យោងតាមក្រសួងធនធានទឹក និងឧតុនិយមបានឱ្យដឹងនៅថ្ងៃទី ៩ ខែតុលាថា កម្ពុជានៅបន្តទទួលរងឥទ្ធិពលពីប្រព័ន្ធសម្ពាធទាប (ITCZ) អូសបន្លាយលើប៉ែកខាងក្រោមនៃអាងមេគង្គប្រទេសថៃ និងប្រទេសឡាវដែលស្ថានភាពនេះនឹងធ្វើឱ្យកម្ពុជា ចាប់ពីថ្ងៃទី ៩ ដល់ថ្ងៃទី ១១ តុលា នៅរាជធានីភ្នំពេញ និងបណ្តាខេត្តនានាអាចមានភ្លៀងធ្លាក់នៅក្នុងកម្រិតពីខ្សោយទៅបង្គួរលាយឡំជាមួយនឹងផ្គររន្ទះ និងខ្យល់កន្ត្រាក់ ជាមួយនឹងទំហំទឹកភ្លៀងធ្លាក់គ្របដណ្តប់លើផ្ទៃដីពី ៥០-៦០%៕
