លោក ប្រាជ្ញ ចន្ទ ប្រធាន គ.ជ.ប កាលពីថ្ងៃទី ៥ តុលា ។ រូបថត NEC
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) បានជូនដំណឹងពីកាលបរិច្ឆេទនៃការដាក់និងទទួលពាក្យសុំចុះឈ្មោះភ្នាក់ងារគណបក្សនយោបាយអ្នកសង្កេតការណ៍ជាតិ និងអន្តរជាតិ សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ដែលនឹងប្រព្រឹត្តទៅនៅថ្ងៃទី ២៥ ខែកុម្ភៈ ឆ្នាំ ២០២៤។
លោក ប្រាជ្ញ ចន្ទ ប្រធានគ.ជ.ប បានចេញសេចក្តីជូនដំណឹងចុះថ្ងៃទី៩ ខែតុលា ដោយបានលើកឡើងថា គណបក្សនយោបាយទាំងអស់ដែលបានចុះបញ្ជីត្រឹមត្រូវតាមច្បាប់ស្តីពីគណបក្សនយោបាយមានសិទ្ធិចាត់តាំងភ្នាក់ងាររបស់ខ្លួនមួយចំនួនតាមការចាំបាច់របស់គណបក្សដើម្បីសង្កេតមើលការចុះឈ្មោះបោះឆ្នោតនៅតាមការិយាល័យចុះឈ្មោះបោះឆ្នោតក្នុងរាជធានី ខេត្តនៃភូមិភាគនិងអគ្គលេខាធិការដ្ឋានរដ្ឋសភា។
លោកបានបញ្ជាក់ថា៖«កាលបរិច្ឆេទនៃការដាក់ និងការទទួលពាក្យសុំចុះឈ្មោះភ្នាក់ងារគណបក្សនយោបាយ ចាប់ផ្តើមទទួលពីថ្ងៃទី១១ ខែតុលា ឆ្នាំ២០២៣និងបញ្ចប់នៅថ្ងៃទី៣០ ខែមករា ឆ្នាំ២០២៤។ដោយឡែក ចំពោះកាលបរិច្ឆេទនៃការដាក់ និងការទទួលពាក្យសុំចុះឈ្មោះភ្នាក់ងារគណបក្សនយោបាយក្នុងដំណាក់កាលបោះឆ្នោត និងរាប់សន្លឹកឆ្នោតនឹងចាប់ផ្តើមពីថ្ងៃទី២៧ ខែមករា ឆ្នាំ២០២៤ និងបញ្ចប់ថ្ងៃទី២ ខែកុម្ភៈ ឆ្នាំ២០២៤»។
បើតាមសេចក្តីជូនដំណឹងរបស់គ.ជ.ប ការដាក់ និងការទទួលពាក្យសុំចុះឈ្មោះភ្នាក់ងារគណបក្សនយោបាយ ត្រូវចុះហត្ថលេខាដោយប្រធានឬតំណាងគណបក្សនយោបាយដែលទទួលបានការផ្ទេរសិទ្ធិជាលាយលក្ខណ៍អក្សរពីប្រធានគណបក្សនយោបាយ។ ការផ្ទេរសិទ្ធិនេះ មិនអនុញ្ញាតឱ្យផ្ទេរសិទ្ធិបន្តឡើយ លើកលែងតែក្នុងលិខិតផ្ទេរសិទ្ធិនោះមានខ្លឹមសារ អនុញ្ញាតឱ្យផ្ទេរសិទ្ធិបន្ត។
លោកប្រាជ្ញ ចន្ទ បានបញ្ជាក់តាមរយៈសេចក្តីជូនដំណឹងដែរថា៖ «ដើម្បីបង្កលក្ខណៈងាយស្រួលដល់គណបក្សនយោបាយ សមាគម និងអង្គការមិនមែនរដ្ឋាភិបាលក្នុងការចូលរួមសង្កេតមើលដំណើរការចុះឈ្មោះបោះឆ្នោត ការបោះឆ្នោតជ្រើសតាំងសមាជិកព្រឹទ្ធសភា គ.ជ.ប បានសម្រេចអនុញ្ញាតឱ្យភ្នាក់ងារគណបក្សនយោបាយ អ្នកសង្កេតការណ៍ជាតិ និងអន្តរជាតិ ដែលត្រូវបានទទួលស្គាល់ជាផ្លូវការរួចហើយ សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៣ មានសិទ្ធិចូលរួមសង្កេតមើលដំណើរការចុះឈ្មោះបោះឆ្នោតបាន»។
ការសង្កេតមើលដំណើរការចុះឈ្មោះបោះឆ្នោតសម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ខាងមុខ នៅតាមសាលាឃុំ-សង្កាត់នោះត្រូវពាក់បណ្ណសម្គាល់សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៣ និងត្រូវគោរពច្បាប់ បទបញ្ជា និងនីតិវិធី និងលិខិតបទដ្ឋានគតិយុត្តនានាសម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤។
លោក ប្រាជ្ញ ចន្ទ បានបញ្ជាក់ថា៖ «គ.ជ.ប សង្ឃឹមថា គ្រប់គណបក្សនយោបាយ សមាគម និងអង្គការមិនមែនរដ្ឋាភិបាលជាតិ អន្តរជាតិ ក្រុមប្រឹក្សាឃុំ សង្កាត់ លេខាធិការដ្ឋានរាជធានីខេត្តរៀបចំការបោះឆ្នោត និងគណៈកម្មការរៀបចំការបោះឆ្នោតគ្រប់លំដាប់ថ្នាក់ នឹងយកចិត្តទុកដាក់សហការឱ្យបានល្អ ដើម្បីជំរុញឱ្យដំណើរការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ប្រព្រឹត្តទៅប្រកបដោយជោគជ័យ»។
លោក សោម សូរីដា អ្នកនាំពាក្យ គ.ជ.ប បានឱ្យដឹងថា ការជូនដំណឹងនេះ គឺដើម្បីឱ្យមានការចូលរួមពីភ្នាក់ងារគណបក្សនយោបាយ ពីអ្នកសង្កេតការណ៍ជាតិ និងអន្តរជាតិរួមទាំងអ្នកសារព័ត៌មាន ចូលរួមសង្កេតមើលពីដំណើរការបោះឆ្នោតជ្រើសតាំងសមាជិកព្រឹទ្ធសភា និតិកាលទី៥ ឆ្នាំ២០២៤ ដោយមានពីគ្រប់ភាគីចូលរួម។
លោកបញ្ជាក់ថា៖ «កិច្ចការងាររបស់គ.ជ.ប គឺត្រូវអនុវត្តឱ្យមានតម្លាភាព ដោយមានការចូលរួម តាមដានសង្កេតមើលពីគ្រប់ភាគីពាក់ព័ន្ធ ជាពិសេសជាភ្នាក់ងារគណបក្សនយោបាយជាភ្នាក់ងារជាតិ និងអន្តរជាតិ អ្នកសារព័ត៌មានជាតិ និងអន្តរជាតិដើម្បីធ្វើជាសាក្សីក្នុងការតាមពិនិត្យចំពោះការអនុវត្តរបស់គ.ជ.ប»។
លោកគឹមសួរ ភិរិទ្ធ អ្នកនាំពាក្យគណបក្សភ្លើងទៀនបានឱ្យដឹងកាលពីថ្ងៃទី១០ ខែតុលាថា គណបក្សរបស់លោកប្រហែលជាមិនដាក់ភ្នាក់ងារគណបក្សសម្រាប់សង្កេតមើលការបោះឆ្នោតជ្រើសតាំងសមាជិកព្រឹទ្ធសភានេះទេ ព្រោះក្រសួងមហាផ្ទៃ មិនបានចេញលិខិតបញ្ជាក់នីត្យានុកូលកម្មថ្មីជូនដល់គណបក្សលោក។
លោកបានបន្តថា ជាមួយគ្នានេះ លទ្ធភាពនៃការចូលរួមការបោះឆ្នោតនេះ ក៏ប្រហែលជាមិនអាចទៅរួចដែរ បើទោះបីជាគណបក្សលោកមានក្រុមប្រឹក្សាឃុំសង្កាត់ នៅក្នុងតំណែងក៏ដោយ។
ទាន់ទិននឹងការដាក់ និងទទួលពាក្យសុំចុះឈ្មោះភ្នាក់ងារគណបក្សនយោបាយអ្នកសង្កេតការណ៍ជាតិ និងអន្តរជាតិនេះលោក សម គន្ធាមី នាយកប្រតិបត្តិអង្គការនិចហ្វិក មិនអាចទាក់ទងសុំការអត្ថាធិប្បាយបានទេនៅថ្ងៃទី១១ ខែតុលា ឆ្នាំ២០២៣។
សូមបញ្ជាក់ថា រាជរដ្ឋាភិបាលកម្ពុជានៅថ្ងៃទី១៨ ខែកក្កដា ឆ្នាំ២០២៣ កន្លងទៅ បានចេញសេចក្ដីសម្រេចកំណត់យកថ្ងៃអាទិត្យទី២៥ ខែកុម្ភៈ ឆ្នាំ២០២៤ ជាកាលបរិច្ឆេទនៃការបោះឆ្នោតជ្រើសតាំងសមាជិកព្រឹទ្ធសភាសម្រាប់នីតិកាលទី៥នៃព្រឹទ្ធសភា៕
