ភ្នាក់ងារសាកលវិទ្យាល័យ ដឺឡា ហ្វ្រង់កូហ្វូនី (AUF) ក្នុងពិធីប្រារឰខួបលើកទី៣០ ក្នុងរាជធានីភ្នំពេញ។ រូបថត ហុង រស្មី
ភ្នំពេញ: ឆ្នាំ២០២៣ ជាពេលវេលាដ៏វិសេស ដែលទីភ្នាក់ងារសាកលវិទ្យាល័យ ដឺឡា ហ្វ្រង់កូហ្វូនី (AUF) ប្រារឰខួបលើកទី៣០ ក្នុងរាជធានីភ្នំពេញ បេះដូងប្រទេសកម្ពុជា។
ជាមួយគ្នានេះ មហាសន្និបាតលើកទី១៤ នៃ CONFRAISE ត្រូវបានប្រារព្ធឡើងចាប់ពីថ្ងៃទី១១ ដល់ថ្ងៃទី១២ ខែតុលា នៅសណ្ឋាគារភ្នំពេញ ដោយបានពង្រឹងការប្តេជ្ញាចិត្តរបស់អង្គការ ចំពោះតំបន់អាស៊ីប៉ាស៊ីហ្វិក។
លោកឧបនាយករដ្ឋមន្ត្រី ហង់ជួន ណារ៉ុន ថ្លែងក្នុងវេទិកាកាលពីថ្ងៃទី១១ ខែតុលា ថា កិច្ចសហការរវាង AUF និងក្រសួងអប់រំ យុវជន និងកីឡារបស់កម្ពុជា បានគូសបញ្ជាក់ពីតួនាទីសំខាន់របស់ AUF ក្នុងការរៀបចំទិដ្ឋភាពអប់រំរបស់ប្រទេសជាតិ។
លោកបានថ្លែងថា៖ «យុវជនតំណាងឱ្យអនាគតរបស់ប្រទេសជាតិ ក៏ដូចជាអនាគតនៃ ហ្វ្រង់កូហ្វូនី។ ខ្ញុំពិតជារំភើបណាស់ ដែលឃើញនិស្សិតកម្ពុជា បានចូលរួមយ៉ាងសកម្មក្នុងកិច្ចខិតខំប្រឹងប្រែងនេះ។ ក្នុងនាមជារដ្ឋមន្ត្រី ខ្ញុំប្តេជ្ញាធានាថា ហ្វ្រង់កូហ្វូនី បែបវិទ្យាសាស្ត្រ ដើរតួនាទីយ៉ាងសំខាន់ ក្នុងការរៀបចំគោលនយោបាយ និងការសម្រេចចិត្តជាតិរបស់យើង»។
AUF ត្រូវបានបង្កើតឡើងកាល៦ទសវត្សរ៍មុននៅទីក្រុងម៉ុងរ៉េអាល់ ប្រទេសកាណាដា ដោយបានវិវត្តទៅជាបណ្តាញសាកលវិទ្យាល័យដ៏លេចធ្លោរបស់ពិភពលោក ដែលមានស្ថាប័នសមាជិកជាង១ពាន់នៅទូទាំង១១៥ប្រទេស។
លោក Slim Khalbous សាកលវិទ្យាធិការនៃ AUF បានឱ្យដឹងថា៖ «យើងមានក្ដីសោមនស្សរីករាយដែលបានរៀបចំខួបទី៣០ ឆ្នាំ នៃវត្ដមានទីភ្នាក់ងារ AUF នៅក្នុងតំបន់អាស៊ីប៉ាស៊ីហ្វិក»។
លោក ថ្លែងថា សមត្ថភាពរបស់ AUF ពង្រីកលើសពីប្រទេសដែលនិយាយភាសាបារាំង ដោយស្វាគមន៍ប្រទេសដែលមានកម្រិតជំនាញភាសាបារាំងខុសៗគ្នា។
ជារួម AUF ឈរជាបណ្តាញសកលដ៏ធំបំផុតដែលផ្ដោតលើការអប់រំ និងការផ្ទេរចំណេះដឹង ដោយផ្តោតជាពិសេសលើការលើកកម្ពស់ភាសាបារាំងទូទាំងពិភពលោក។
សាកលវិទ្យាធិការ Slim Khalbous បានធ្វើដំណើរមកកាន់ប្រទេសកម្ពុជា ដើម្បីជំរុញទំនាក់ទំនងជាមួយយុវជនដែលនិយាយភាសាបារាំងក្នុងតំបន់ និងចូលរួមជាមួយសាកលវិទ្យាធិការមកពីសាកលវិទ្យាល័យដៃគូចំនួន៩២។
លោកបានថ្លែងថា និស្សិតវ័យក្មេងក្នុងតំបន់អាស៊ីប៉ាស៊ីហ្វិកទាំងនេះមានភាពស្វាហាប់ក្នុងការចែករំលែកចំណេះដឹង និងធ្វើកិច្ចការរួមគ្នា។
លោក Khalbous បានបញ្ជាក់ថា៖ «AUF បានអំពាវនាវបង្កើតជាបណ្ដាញក្លិបនិស្សិតប្រើប្រាស់ភាសាបារាំង (CLEF)។ ជាលទ្ធផល យើងមានក្លិបទាំងអស់ចំនួន ២៣០ ក្នុងប្រទេសចំនួន ៦០។ ពួកគេមានសកម្មភាពផ្សេងៗគ្នា ដោយខ្លះរៀបចំសន្និសីទ ព្រមទាំងរៀបចំដំណើរកម្សាន្ដ និងសកម្មភាពវប្បធម៌ផ្សេងៗ ហើយខ្លះទៀតចាប់ផ្ដើមការងារនៅក្នុងសហគ្រាស»។
លោក សំ ប៊ុនធឿន និស្សិតនៃសាកលវិទ្យាល័យភូមិន្ទវិចិត្រសិល្បៈ បានថ្លែងពីសារៈសំខាន់នៃការលើកកម្ពស់ភាសាបារាំងក្នុងចំណោមយុវជនកម្ពុជានៅតាមជនបទ ហើយការចូលរៀនភាសាបារាំង មិនសម្រាប់ប្រជាជនកម្ពុជាទាំងអស់នោះទេ។
លោក Laurent Sermet នាយកអាស៊ី-ប៉ាស៊ីហ្វិកនៃ AUF ប្រចាំនៅទីក្រុងហាណូយ បានថ្លែង បង្ហាញពីសារៈសំខាន់នៃព្រឹត្តិការណ៍ខួបលើកទី៣០នេះ ដោយបានប្រមូលផ្តុំយុវជន និយាយភាសាបារាំង នៅក្នុងតំបន់អាស៊ីប៉ាស៊ីហ្វិក ដែលមានសមាជិកចំនួន១៧ក្លិបដែលសមាជិកភាពនៅអាស៊ីអាគ្នេយ៍ចំនួន ៤ ប្រទេសគឺ កម្ពុជា វៀតណាម ឡាវ និងថៃ។
លោក Sermet បានឱ្យដឹងថា តម្រូវការសិក្សាភាសាបារាំងនៅកម្ពុជាមានកម្រិតខ្ពស់ ដោយមានសិស្សជាច្រើនចង់សិក្សាភាសានេះ។
លោក បាននិយាយថា ដើម្បីលើកទឹកចិត្ដដល់និស្សិតរៀនភាសាបារាំងក្រោយបញ្ចប់ការសិក្សា ពួកគេត្រូវបានផ្ដល់ឱកាសការងារ និងសហគ្រិនភាពតាមរយៈគម្រោងសហគ្រិនភាព (Start-ups)។ និស្សិតត្រូវបានបណ្ដុះបណ្ដាលគ្រប់គ្រងគម្រោង មុនពេលចាប់ផ្ដើមដំណើរការគម្រោងសហគ្រិនរបស់ពួកគេ។ និស្សិតដែលមានទេពកោសល្យ ចំពោះសហគ្រិនភាព ពួកគេនឹងត្រូវបានផ្ដល់អាទិភាព ក្នុងការដំណើរការគម្រោង។
AUF ក៏មានបំណងផ្ដល់ជំនួយដល់ប្រទេសសមាជិកក្នុងការកែសម្រួលកម្មវិធីសិក្សាដែលទាមទាររយៈពេលវែងចន្លោះពី៥ ទៅ១០ឆ្នាំ។ សិស្ស និស្សិតបានផ្ដល់គំនិតឱ្យថ្នាក់ដឹកនាំជួយបង្កើតសកម្មភាពទាក់ទាញសិស្ស និស្សិតដទៃទៀតងាកមកចាប់អារម្មណ៍ភាសាបារាំង។
លោកបានបន្ដថា កិច្ចការនេះត្រូវការរយៈវែង ដោយរយៈពេលខ្លី AUF បង្កើតកម្មវិធីច្បាស់លាស់យុវជនទាក់ទាញយុវជនឱ្យចូលរួមក្នុងក្លិប។ សម្រាប់រយៈពេលវែង ក្នុងពេល ២០ ទៅ ៣០ ឆ្នាំចុងក្រោយ សមាជិកប្រើប្រាស់ភាសាបារាំងទាំងអស់បានធ្វើការរួមគ្នាក្នុងការអភិវឌ្ឍប្រទេសជាតិដោយយកគំនិតចម្រុះច្រើន និងភាសាច្រើនលើសពីភាសាអង់គ្លេស។
លោក Sermet បានឱ្យដឹងថា៖ «សព្វថ្ងៃនេះ លទ្ធផលសកលភាវូបនីយកម្ម លាយឡំគ្នាច្រើន ដោយម្ខាងវាមានលក្ខណៈអន្ដរជាតូបនីយកម្ម និងម្ខាងទៀត ប្រជាជនផ្ដោតលើភាសាជាតិរបស់ពួកគាត់វិញ»។
Khalbous បានឱ្យដឹងថា ទស្សនៈដែលថា ឥទ្ធិពលអាណានិគមបារាំងបានជំរុញឱ្យមនុស្សភាគច្រើននិយាយភាសាបារាំង គឺមិនត្រឹមត្រូវនោះទេ។
នៅក្នុងតំបន់ឥណ្ឌូចិន កាលពីសម័យអាណានិគម មានប្រជាជនប្រហែលជា ៦ ម៉ឺននាក់និយាយភាសាបារាំង។
លោក Khalbous បានប្រាប់ភ្នំពេញប៉ុស្ដិ៍ថា៖ «ក្នុងសតវត្សរ៍ទី ១៩ ទី ២០ អ្នកនិយាយបារាំងមានចំនួនតិចតួច ដោយមានតែល្បីៗក្នុងស្រុក និងអ្នកមានទ្រព្យធនរៀនបារាំងប៉ុណ្ណោះ»។
លោក Sermet បានបន្ដថា អាណានិគមនេះបានបន្សល់ទុកនូវវប្បធម៌កាន់តែខិតជិតគ្នាក្នុងតំបន់ឥណ្ឌូចិន ដែលមិនសូវមានមនុស្សច្រើនទេនិយាយភាសាបារាំង តែចូលរួមភាសាបារាំង និងវប្បធម៌បារាំង។
លោកបានបន្ថែមថា៖ «ចំពោះសតវត្សរ៍ទី ២១ នេះ យើងធ្វើយ៉ាងណាអាចប្រែក្លាយអ្នកចូលចិត្ដស្រឡាញ់ភាសាបារាំងទៅជាអ្នករៀន និងនិយាយភាសាបារាំង។ វាមិនត្រឹមតែជាការទាក់ទងជាមួយបារាំងតែមួយមុខនោះទេ ប៉ុន្ដែវាជាភាសាទំនាក់ទំនងនៅក្នុងពិភពលោកទាំងមូល»។
ទីភ្នាក់ងារបានរៀបចំកម្មវិធីផ្សព្វផ្សាយភាសាបារាំងនៅតាមបណ្ដាខេត្ដចំនួន ៦ ក្នុងប្រទេសកម្ពុជា នៅតាមវិទ្យាល័យ។
លោក Khalbous បញ្ជាក់ថា ការចូលរួមជាសមាជិក AUF មិនសំដៅលើការអនុវត្ដឱ្យប្រជាជនស្ថិតក្នុងប្រទេសជាសមាជិករៀន និងនិយាយភាសាបារាំងតែមួយមុខនោះទេ ដោយវាគ្រាន់តែជាការចូលរួមចំណែកក្នុងការអភិវឌ្ឍសមត្ថភាពយុវជន និងប្រទេសពួកគេ។
នៅថ្ងៃទី១១ និង១២ខែតុលា ឆ្នាំ២០២៣ ទីភ្នាក់ងារ (AUF) បានរៀបចំកម្មវិធីចំនួន ៣ នៅកម្ពុជា គឺ សន្និបាតយុវជននិយាយភាសាបារាំងលើកទី១ កម្មវិធីខួប ៣០ ឆ្នាំ នៃការបង្កើតទីភ្នាក់ងារសាកលវិទ្យាល័យប្រើប្រាស់ភាសាបារាំង (AUF) នៅតំបន់អាស៊ីប៉ាស៊ីហ្វិក និង សន្និសីទលើកទី១៤ របស់សាកលវិទ្យាធិការនៃគ្រឹះស្ថានសិក្សាសមាជិក AUF ក្នុងតំបន់អាស៊ីប៉ាស៊ីហ្វិក។
គួរបញ្ជាក់ថា កាលពីខែធ្នូ ឆ្នាំ ២០២២ អ្នកចូលរួមប្រហែល១០០នាក់ រួមទាំងអតីតអ្នកទទួលអាហារូបករណ៍ AUF និស្សិត អ្នកអប់រំ អ្នកស្រាវជ្រាវ អ្នកតំណាងសាកលវិទ្យាល័យ និងដៃគូនានា បានប្រមូលផ្តុំគ្នាសម្រាប់ព្រឹត្តិការណ៍២។
ធ្វើឡើងនៅថ្ងៃទី១ ខែធ្នូ នៅ AUF-Cambodia ក្នុងវិទ្យាស្ថានបច្ចេកវិទ្យាកម្ពុជា ក្នុងឱកាសនោះរួមមាន ការបង្ហាញវិញ្ញាបនបត្របណ្តុះបណ្តាលសហគ្រិនភាព និងពិធីសំណេះសំណាលជាមួយអតីតនិស្សិត AUF។
កម្មវិធីសហគ្រិនភាព ដែលបានចាប់ផ្តើមនៅក្នុងខែមិថុនា ឆ្នាំ២០២២ ដោយមជ្ឈមណ្ឌលការងារនិយាយភាសាបារាំង (CEF) រាជធានីភ្នំពេញ មាននិស្សិតចំនួន ២២ នាក់ដែលត្រូវបានជ្រើសរើសពីបេក្ខជនចំនួន ៥៥ នាក់នៅទូទាំង ១២ សាកលវិទ្យាល័យជាសមាជិក AUF-កម្ពុជា។
សិស្សទាំងនេះ បានអនុវត្តកម្មវិធីសិក្សាយ៉ាងហ្មត់ចត់ ដោយលាយបញ្ចូលការណែនាំតាមអ៊ីនធឺណិត និងដោយផ្ទាល់ រួមជាមួយនឹងការទៅជួបក្រុមហ៊ុន ហើយបានបង្កើត និងការពារផែនការអាជីវកម្មជាក្រុមដោយជោគជ័យនៅចំពោះមុខក្រុមអ្នកជំនាញផ្នែកឧស្សាហកម្ម ដែលភាគច្រើនជាអតីតអ្នកទទួលអាហារូបករណ៍ AUF៕
