កិច្ចប្រជុំពាក់ព័ន្ធនឹងការចុះឈ្មោះបោះឆ្នោតនៅឃុំ-សង្កាត់ និងនៅរដ្ឋសភា កាលពីថ្ងៃទី ១៧ តុលា ។ រូបថត គ.ជ.ប
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសឱ្យដឹងថា ការចុះឈ្មោះអ្នកបោះឆ្នោតនៅឃុំ-សង្កាត់ និងនៅរដ្ឋសភាបានចាប់ផ្តើមពីថ្ងៃទី ១៨ ខែតុលា និងបញ្ចប់នៅថ្ងៃទី ១៤ ខែវិច្ឆិកា ឆ្នាំ ២០២៣ ខណៈរដ្ឋសភាបានបង្កើតការិយាល័យចុះឈ្មោះបោះឆ្នោតដល់អ្នកបោះឆ្នោតជាតំណាងរាស្ត្រក្នុងតំណែងនៅអគ្គលេខាធិការដ្ឋានរដ្ឋសភាផងដែរ។
លោក មាន សទិ សមាជិក គ.ជ.ប បានលើកឡើងក្នុងកិច្ចប្រជុំជាមួយភាគីពាក់ព័ន្ធពីការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ កាលពីថ្ងៃទី១៧ ខែតុលាថា ការចុះឈ្មោះអ្នកបោះឆ្នោតនៅឃុំ- សង្កាត់ និងនៅរដ្ឋសភា ត្រូវចាប់ផ្តើមពីថ្ងៃទី១៨ ខែតុលា ហើយបញ្ចប់នៅថ្ងៃទី១៤ ខែវិច្ឆិកា ឆ្នាំ២០២៣។
លោកបន្តថា ការងារចុះឈ្មោះអ្នកបោះឆ្នោតនេះ ប្រព្រឹត្តទៅតាមប្រតិទិនការងាររបស់ គ.ជ.ប ដោយគ្មានការប្ដឹងតវ៉ា ឬការប្ដឹងជំទាស់ទេ តែនៅពេលបញ្ចប់ការងារនេះ គ.ជ.ប ត្រូវបិទផ្សាយបញ្ជីបោះឆ្នោតដំបូង នៅលេខាធិការដ្ឋាននៃគណៈកម្មការរាជធានី ខេត្តរៀបចំការបោះឆ្នោត (លគធ.ខប) និងទីប្រជុំជនមួយចំនួនក្នុងរាជធានី-ខេត្ត សម្រាប់ប្ដឹងតវ៉ា ឬប្ដឹងជំទាស់ដែលត្រូវអនុវត្តចាប់ពីថ្នាក់គណៈកម្មការរាជធានី-ខេត្តរៀបចំការបោះឆ្នោត (គធ.ខប) ថ្នាក់ គ.ជ.ប ហើយត្រូវបញ្ចប់នៅក្រុមប្រឹក្សាធម្មនុញ្ញ។
លោក មាន សទិ បានបញ្ជាក់ថា៖ «សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នេះ មណ្ឌលបោះឆ្នោតត្រូវបានរៀបចំនិងបែងចែកជា៨ភូមិភាគ ដែលមានអាសនៈសរុបចំនួន៥៨ (បន្ថែម សមាជិកព្រឹទ្ធសភាចំនួន២រូប ដែលត្រូវបានចាត់តាំងដោយព្រះមហាក្សត្រ និង២រូបទៀតត្រូវបានរដ្ឋសភាជ្រើសតាំងតាមមតិភាគច្រើន)»។
បញ្ជីឈ្មោះអ្នកបោះឆ្នោតត្រូវបានរៀបចំនៅតាមរាជធានី-ខេត្តនីមួយៗរួមមាន ក្រុមប្រឹក្សាឃុំ-សង្កាត់ និងតំណាងរាស្ត្រនៃរាជធានី-ខេត្តនីមួយៗ ហើយ គ.ជ.ប ត្រូវបូកសរុបលទ្ធផលនៃការបោះឆ្នោតនៅតាមមណ្ឌលនីមួយៗនៃមណ្ឌលទាំង៨ នៅទូទាំងប្រទេស។
លោក មាន សទិ បានបញ្ជាក់ដែរថា ក្នុងករណីក្រុមប្រឹក្សាឃុំ-សង្កាត់នៃឃុំ-សង្កាត់ណាមួយមិនបានរៀបចំ និងបញ្ជូនបញ្ជីឈ្មោះសមាជិកក្រុមប្រឹក្សាឃុំ-សង្កាត់ទាំងអស់ក្នុងតំណែងមក គ.ជ.ប គឺ គ.ជ.ប ត្រូវធ្វើប្រតិភូកម្មមុខងារដល់អភិបាលនៃគណៈអភិបាលក្រុង ស្រុក ខណ្ឌពាក់ព័ន្ធ ដើម្បីរៀបចំបញ្ជីឈ្មោះសមាជិកក្រុមប្រឹក្សាឃុំ-សង្កាត់ទាំងនោះ រួចចុះហត្ថលេខា បោះត្រារដ្ឋបាលក្រុង ស្រុក ខណ្ឌ ដែលមានការបញ្ជាក់ឯកភាពពីអភិបាលរាជធានីខេត្តពាក់ព័ន្ធ រួចបញ្ជូនមក គ.ជ.ប ឱ្យបានឆាប់រហ័សតាមដែលអាចធ្វើបាន។
សូមបញ្ជាក់ថា ការិយាល័យចុះឈ្មោះបោះឆ្នោតចំនួនមួយ ត្រូវបានកំណត់សម្រាប់អង្គបោះឆ្នោតតំណាងរាស្ត្រ និងការិយាល័យចុះឈ្មោះបោះឆ្នោតចំនួនមួយត្រូវបានកំណត់សម្រាប់អង្គបោះឆ្នោតក្រុមប្រឹក្សាឃុំ-សង្កាត់នីមួយៗ។
ការិយាល័យចុះឈ្មោះបោះឆ្នោតគឺជាការិយាល័យដែលស្ថិតនៅមួយកន្លែងដូចជាការិយាល័យចុះឈ្មោះបោះឆ្នោតសម្រាប់តំណាងរាស្ត្រក្នុងតំណែង ត្រូវមានទីតាំងនៅអគ្គលេខាធិការដ្ឋានរដ្ឋសភា និងការិយាល័យចុះឈ្មោះបោះឆ្នោតសម្រាប់សមាជិកក្រុមប្រឹក្សាឃុំ-សង្កាត់ទាំងអស់ក្នុងតំណែង ត្រូវទីតាំងនៅសាលាឃុំ សង្កាត់ ឬទីតាំងណាមួយសមស្របក្នុងឃុំ -សង្កាត់។
លោក ឡេង ប៉េងឡុង អគ្គលេខាធិការនៃរដ្ឋសភាបានលើកឡើងតាមរយៈសេចក្តីជូនដំណឹងដែលបានចេញផ្សាយកាលពីថ្ងៃទី១៧ ខែតុលា ជម្រាបដល់តំណាងរាស្ត្រក្នុងតំណែងថា គ.ជ.ប បានផ្ទេរសមត្ថកិច្ចដល់អគ្គលេខាធិការដ្ឋានរដ្ឋសភាក្នុងការចុះឈ្មោះបោះឆ្នោតជូនអ្នកបោះឆ្នោតជាតំណាងរាស្ត្រក្នុងតំណែង សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ខាងមុខ។
លោកបានលើកឡើងថាការិយាល័យចុះឈ្មោះបោះឆ្នោតមួយត្រូវបានបង្កើតឡើងនៅសាលសន្និសីទបាយ័ននៃវិមានរដ្ឋសភាដែលមានភារកិច្ចទទួលចុះឈ្មោះបោះឆ្នោតជូនអ្នកបោះឆ្នោតជាតំណាងរាស្ត្រក្នុងតំណែង ។
លោក ឡេង ប៉េងឡុង បញ្ជាក់ថា ៖ «ការិយាល័យនេះចាប់ទទួលការចុះឈ្មោះ រៀងរាល់ម៉ោងធ្វើការចាប់ពីថ្ងៃទី១៨ ខែតុលា ដល់ថ្ងៃទី៦ ខែវិច្ឆិកា ឆ្នាំ២០២៣ ពេលព្រឹកចាប់ពីម៉ោង៧:០០ ដល់ម៉ោង១១:៣០នាទី និងពេលរសៀលចាប់ពីម៉ោង១៤:០០ ដល់ម៉ោង១៧:៣០នាទី លើកលែងតែថ្ងៃសៅរ៍ ថ្ងៃអាទិត្យ និង ថ្ងៃបុណ្យជាតិ»។
ទាក់ទងនឹងការចុះឈ្មោះបោះឆ្នោតជ្រើសតាំងសមាជិកព្រឹទ្ធសភានេះដែរ លោក ម៉ៅ ច័ន្ទដារ៉ា រដ្ឋលេខាធិការប្រចាំការនៃក្រសួងមហាផ្ទៃ កាលពីថ្ងៃទី១៧ ខែតុលា បានណែនាំឱ្យអភិបាលរាជធានីខេត្តផ្ដល់កិច្ចសហការ និងអនុញ្ញាតឱ្យ គ.ជ.ប ធ្វើប្រតិភូកម្មអំណាចដល់ក្រុមប្រឹក្សាឃុំ-សង្កាត់ ឱ្យបំពេញតួនាទីជាតំណាង គ.ជ.ប ក្នុងការចុះឈ្មោះបោះឆ្នោតជូនអ្នកបោះឆ្នោតជាសមាជិកក្រុមប្រឹក្សាឃុំ -សង្កាត់ក្នុងមុខតំណែងសម្រាប់ការបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤។
លោកបានបញ្ជាក់ថា៖«ដើម្បីធានាឱ្យកិច្ចដំណើរការនៃការចុះឈ្មោះបោះឆ្នោតនេះ ប្រកបដោយប្រសិទ្ធភាព តម្លាភាព និងបរិយាបន្ន ក្រសួងមហាផ្ទៃ សូមណែនាំអភិបាលរាជធានីខេត្តត្រូវណែនាំដល់ក្រុមប្រឹក្សាឃុំ-សង្កាត់ឱ្យបំពេញតួនាទីជាតំណាងគ.ជ.ប.ក្នុងការចុះឈ្មោះបោះឆ្នោត ជូនអ្នកបោះឆ្នោតជាសមាជិកក្រុមប្រឹក្សាឃុំ-សង្កាត់ក្នុងមុខតំណែងនៃឃុំ-សង្កាត់សាមីសម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ឆ្នាំ២០២៤»។
លោកម៉ៅ ច័ន្ទដារ៉ា បានបន្តថា ប្រធានក្រុមប្រឹក្សាឃុំ-សង្កាត់ត្រូវរៀបចំបញ្ជីឈ្មោះក្រុមប្រឹក្សាឃុំ-សង្កាត់ក្នុងមុខតំណែង រួចបញ្ជូនមកអភិបាលនៃគណៈអភិបាលរាជធានី ខេត្ត ក្រុង ស្រុក ខណ្ឌ ដើម្បីពិនិត្យផ្ទៀងផ្ទាត់ និងផ្តល់អនុលោមភាព៕
