លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា ពិនិត្យសម្បកកង់រថយន្តរបស់ក្រុមហ៊ុនចិន១នៅប្រទេសចិន។ រូបថត Sun Chanthol FB
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងថា មានក្រុមហ៊ុនផលិតកង់រថយន្តដ៏ធំមួយរបស់ប្រទេសចិន ដែលមានឈ្មោះថា Wanli Tires បានសម្រេចចិត្តនឹងសិក្សាលម្អិត ដើម្បីពិនិត្យលទ្ធភាពបើករោងចក្រផលិតសម្បកកង់រថយន្តរបស់ខ្លួននៅកម្ពុជា។
តាមការចេញផ្សាយរបស់ ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី ២២ ខែតុលា ឆ្នាំ ២០២៣ បានឱ្យដឹងថា លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានជួបពិភាក្សាការងារជាមួយលោក ជីង គ័ងជីន(Jing Guangjun) នាយករង និងជាប្រធានគ្រប់គ្រងទូទៅក្រុមហ៊ុន Guangzhou Industrial Investment Holdings Group ( GIIHG) ដែលជាសមាជិករបស់ក្រុមហ៊ុនធំបំផុត ៥០០ នៅលើពិភពលោក (Fortune 500) និងមានក្រុមហ៊ុន Wanli Tires ដែលផលិតកង់រថយន្តដ៏ធំរបស់ប្រទេសចិនជាបុត្រសម្ព័ន្ធ។
នាជំនួបនោះ ក្នុងទិសដៅដើម្បីជំរុញឱ្យក្រុមហ៊ុនសម្រេចចិត្តចូលមកវិនិយោគនៅកម្ពុជា លោក ស៊ុន ចាន់ថុល បានលើកបង្ហាញពីកំណើនសេដ្ឋកិច្ចរបស់កម្ពុជាក្នុងរយៈពេល២០ឆ្នាំកន្លងទៅនេះ ដែលកើនជាមធ្យម៧ភាគរយ មានហេដ្ឋារចនាសម្ព័ន្ធពេញផ្ទៃប្រទេស ដែលត្រូវបានចាត់ទុកជាហេដ្ឋារចនាសម្ព័ន្ធយុទ្ធសាស្ត្រសម្រាប់វិនិយោគិន ក្នុងនោះរួមមាន អាកាសយានដ្ឋានថ្មីខេត្តសៀមរាប អាកាសយានដ្ឋានថ្មីក្រុងភ្នំពេញ ការសិក្សាផ្លូវរថភ្លើងភ្នំពេញ-ក្រុងព្រះសីហនុ ផ្លូវរថភ្លើងភ្នំពេញ-បោយប៉ែត និងគម្រោងពង្រីកកំពង់ផែទឹកជ្រៅជាដើម។
ក្រុមប្រឹក្សាអភិវឌ្ឍន៍កម្ពុជា (CDC) បានបន្តថា ការលើកឡើងនូវគម្រោងហេដ្ឋារចនាសម្ព័ន្ធ និងភាពរីកចម្រើនរបស់កម្ពុជានេះលោកឧបនាយករដ្ឋមន្ត្រី មានគោលដៅចង់ទាក់ទាញ ក្រុមហ៊ុនផលិតកង់រថយន្ត Wanli Tires ឱ្យទៅបើករោងចក្រផលិតសំបកកង់រថយន្តនៅកម្ពុជា ដោយលោកអះអាងថា កន្លងទៅមានវិនិយោគិនចិន ដែលធ្លាប់ទទួលបានជោគជ័យ លើការដាក់បណ្ដាក់ទុនផលិតសម្បកកង់រថយន្តនៅប្រទេសកម្ពុជាផងដែរ។
នាឱកាសនោះដែរ លោក ជីង គ័ងជីន (Jing Guangjun) នាយករង និងជាប្រធានគ្រប់គ្រងទូទៅក្រុមហ៊ុន ក្រុមហ៊ុន Wanli Tires បានសម្រេចចិត្តនឹងមកសិក្សាលម្អិតលើការបណ្ដាក់ទុនវិនិយោគ ដើម្បីបង្កើតរោងចក្រផលិតសំបកកង់រថយន្តនៅប្រទេសកម្ពុជា ខណៈលោក ស៊ុន ចាន់ថុល អះអាងថា នឹងព្យាយាមផ្តល់ការសម្របសម្រួលលើការសិក្សារបស់ក្រុមហ៊ុន ដើម្បីអាចឱ្យក្រុមហ៊ុនចាប់ផ្តើមការវិនិយោគ សាងសង់រោងចក្រ និងផលិតសម្បកកង់ទី១របស់ខ្លួននៅកម្ពុជា ឱ្យបានលឿនបំផុត។
ទាក់ទងនឹងគម្រោងនេះដែរ លោក លឹម ហេង អនុប្រធានសភាពាណិជ្ជកម្មកម្ពុជា យល់ឃើញថា កំណើននៃរោងចក្រផលិតសម្បកកង់យានយន្ត ឬក៏រោងចក្រផលិតសម្ភារនានាធ្វើពីកៅស៊ូ គឺជាអ្វីដែលកម្ពុជាចង់បានបំផុត ខណៈដែលកម្ពុជា មានការដាំដុះកៅស៊ូ ដែលជាវត្ថុធាតុដើមយ៉ាងសំខាន់សម្រាប់ការផលិតសម្បកកង់យានយន្ត ឬសម្ភារទាំងនោះ។
លោកបានថ្លែងថា តាមការសង្កេតរបស់លោក ផ្ទៃដីដាំដុះកៅស៊ូ ចាប់ផ្តើមមានការថមថយបន្តិច ដោយសារតែកន្លងមកទីផ្សារនិងតម្លៃកៅស៊ូឡើងចុះទៅតាមឈ្មួញដែលនាំចេញ។ហេតុនេះ បើសិនជាមានរោងចក្រកែច្នៃ កៅស៊ូនៅក្នុងស្រុក កសិករ ឬអ្នកដាំដុះកៅស៊ូ នឹងមិនចាំបាច់ព្រួយបារម្ភពីបញ្ហាធ្លាក់ថ្លៃកៅស៊ូទៀតនោះទេ។
លោក លឹម ហេង បានបញ្ជាក់ថា៖«កន្លងមកកៅស៊ូយើងផលិតបានមកនាំចេញទៅក្រៅច្រើន ដូចជាទៅវៀតណាមជាដើម ដែលវាធ្វើឱ្យយើងបាត់បង់តម្លៃបន្ថែមច្រើន ហើយតម្លៃកៅស៊ូនាំចេញនោះទៀតសោត អាស្រ័យតែលើឈ្មួញវៀតណាមឱ្យថ្លៃប៉ុណ្ណោះ ក្នុងករណីគេមិនទិញ នោះវានឹងនាំឱ្យគាំងចរន្តសាច់ប្រាក់ក្នុងស្រុកយើង»។
បើតាមរបាយការណ៍ពីក្រសួងពាណិជ្ជកម្មបង្ហាញថា ក្នុងរយៈពេល៩ខែ ឆ្នាំ២០២៣នេះ កម្ពុជា នាំចេញកៅស៊ូទៅក្រៅប្រទេសសម្រេចបានក្នុងទំហំទឹកប្រាក់ជាង៣៣៣លានដុល្លារ កើនឡើងជាង២២ភាគរយ បើធៀបនឹងរយៈពេលដូចគ្នាក្នុងឆ្នាំ២០២២៕
