បណ្ណព្រំដែនកម្ពុជា-ថៃ។ រូបថត សហការី
ភ្នំពេញៈ អាជ្ញាធរខេត្តស្ទឹងត្រែង បានណែនាំឱ្យប្រជាពលរដ្ឋនៅក្នុងខេត្តនេះបញ្ឈប់ការប្រើប្រាស់បណ្ណឆ្លងដែនកម្ពុជា-ឡាវ ដោយងាកមកប្រើប្រាស់បណ្ណព្រំដែនវិញ ដើម្បីកាត់បន្ថយការចំណាយ និងផ្ដល់ភាពងាយស្រួលដោយមិនចាំបាច់ធ្វើបណ្ណដដែលៗ សម្រាប់ឆ្លងដែនទៅមកនោះទេ។
អ្នកនាំពាក្យសាលាខេត្តស្ទឹងត្រែង លោក ម៉ែន គុង បានឱ្យដឹង នៅថ្ងៃទី ៦ ខែវិច្ឆិកាថា ការណែនាំឱ្យប្រើប្រាស់បណ្ណព្រំដែននេះ ដើម្បីកាត់បន្ថយការចំណាយរបស់ប្រជាពលរដ្ឋ ជាពិសេសផ្ដល់ភាពងាយស្រួលសម្រាប់អាជ្ញាធរក្នុងការគ្រប់គ្រងប្រព័ន្ធទិន្នន័យអ្នកឆ្លងដែនពីកម្ពុជា-ឡាវ។
លោកបានបន្តថា៖ «អាជ្ញាធរខេត្តស្ទឹងត្រែង សូមណែនាំឱ្យប្រជាពលរដ្ឋដែលមានទីលំនៅអចិន្រៃ្តយ៍ក្នុងខេត្តនេះ ហើយមានបំណងឆ្លងដែនទៅខេត្តនានានៅក្នុងប្រទេសឡាវ អាចមកស្នើសុំបណ្ណព្រំដែនពីអង្គភាពច្រកចេញតែមួយរបស់ខេត្ត ដោយភ្ជាប់មកជាមួយនូវអត្តសញ្ញាណប័ណ្ណ សំបុត្រកំណើត សៀវភៅគ្រួសារ និងរូបថតចំនួន ២ សន្លឹកផងដែរ»។
លោក ម៉ែន គុង បានបន្តថា ការស្នើសុំធ្វើបណ្ណព្រំដែននេះ ចំណាយថ្លៃសេវាត្រឹមតែ ២ ម៉ឺនរៀលប៉ុណ្ណោះ ប្រជាពលរដ្ឋអាចប្រើប្រាស់បានរយៈពេលពេញ ១ ឆ្នាំ។ ហេតុនេះការផ្លាស់ប្ដូរឱ្យប្រជាពលរដ្ឋពីការប្រើប្រាស់បណ្ណឆ្លងដែន មកជាការប្រើប្រាស់បណ្ណព្រំដែន គឺដោយសារបណ្ណព្រំដែន ធ្វើតែម្ដងអាចប្រើប្រាស់បានរយៈពេលយូរជាងបណ្ណឆ្លងដែន។
លោកថ្លែងថា៖ «អ៊ីចឹង! បណ្ណព្រំដែនរបស់យើង គឺនឹងផលិតចេញជាប្រព័ន្ធសម្រាប់ប្រជាពលរដ្ឋនៅក្នុងភូមិសាស្ត្រខេត្តស្ទឹងត្រែង ហើយអាយុកាលនៃការប្រើប្រាស់របស់វា គឺយូរជាងបណ្ណឆ្លងព្រំដែន ដូច្នេះប្រជាពលរដ្ឋគាត់មិនចាំចាច់ធ្វើដដែលៗនៅពេលឆ្លងដែនទៅមកពីកម្ពុជា និងឡាវនោះទេ»។
លោក ម៉ែន គុង អះអាងថា មុននឹងមានការជូនដំណឹងពីការប្រើប្រាស់បណ្ណព្រំដែននេះ សម្រាប់ប្រជាពលរដ្ឋដែលមានបណ្ណឆ្លងដែនកន្លងមក ពួកគាត់ក៏នៅតែអាចប្រើប្រាស់សម្រាប់ឆ្លងដែនទៅមកពីកម្ពុជា-ឡាវបានផងដែរ។ ចំពោះប្រជាពលរដ្ឋនៅក្នុងស្ទឹងត្រែង ដែលមានទីលំនៅនៅជាប់ព្រំដែន អាចមកស្នើសុំបណ្ណព្រំដែនដោយផ្ទាល់បាននៅច្រកទា្វរព្រំដែនអន្តរជាតិត្រពាំងក្រៀលដោយមិនចាំបាច់មកស្នើសុំនៅអង្គភាពច្រកចេញ-ចូលតែ ១ របស់ខេត្តឡើយ។
លោកបន្ថែមថា ដោយឡែកសម្រាប់ប្រជាពលរដ្ឋដែលមានទីលំនៅក្នុងខេត្តផ្សេង ហើយពួកគាត់មានបំណងចង់ឆ្លងដែនពីកម្ពុជាទៅឡាវ ពួកគាត់មិនអាចស្នើសុំបណ្ណនេះបានទេ ដូច្នេះហើយប្រជាពលរដ្ឋនៅខេត្តផ្សេង គឺតម្រូវឱ្យពួកគាត់ប្រើប្រាស់លិខិតឆ្លងដែនដូចធម្មតា។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បានប្រាប់ឱ្យដឹងដែរថា ការប្រើប្រាស់បណ្ណមួយណាសម្រាប់ឆ្លងដែនពីកម្ពុជាឡាវ វាមិនសំខាន់នោះទេ ប៉ុន្តែអ្វីដែលសំខាន់ គឺអាជ្ញាធរខេត្តត្រូវគិតថា បណ្ណណាដែលប្រជាពលរដ្ឋងាយស្រួលក្នុងការប្រើប្រាស់ជាងសម្រាប់ឆ្លងដែនប៉ុណ្ណោះ។
លោកបានថ្លែងថា៖ «ប្រសិនបើយើងផ្លាស់ប្ដូរដូចនេះដើម្បីផ្ដល់ភាពងាយស្រួលដល់ប្រជាពលរដ្ឋ និងមិនមានផលលំបាកយូរ អ៊ីចឹងវាមិនមានបញ្ហានោះទេ ប៉ុន្តែបើការប្រើប្រាស់របស់ថ្មីហើយធ្វើឱ្យប៉ះពាល់ដល់ប្រជាពលរដ្ឋ អាជ្ញាធរខេត្តក៏គួរតែពិចារណារកនីតិវិធីផ្សេងដែរ»។
លោក យង់ គិមអេង បន្ថែមថា ក្នុងករណីដែលរកឃើញថា ការប្រើប្រាស់បណ្ណព្រំដែននេះ មានការចំណាយច្រើន ហើយត្រូវការចំណាយពេលយូរក្នុងការធ្វើបណ្ណដែរនោះ ដូច្នេះអាជ្ញាធរខេត្ត ត្រូវមានវិធានការ ឬដំណោះស្រាយសម្រួលយ៉ាងណា ដើម្បីអាចកាត់បន្ថយការលំបាកនៃការប្រើប្រាស់បណ្ណទាំងនោះ។
កាលពីថ្ងៃទី ៤ ខែវិច្ឆិកា ឆ្នាំ ២០២៣ រដ្ឋបាលខេត្តស្ទឹងត្រែង បានចេញសេចក្ដីណែនាំមួយស្ដីពីការជំរុញឱ្យប្រើប្រាស់បណ្ណព្រំដែនកម្ពុជា-ឡាវ និងបញ្ឈប់ការប្រើប្រាស់បណ្ណឆ្លងដែន ដែលក្នុងសេចក្ដីណែនាំនេះ គឺឱ្យប្រជាពលរដ្ឋក្នុងខេត្តស្ទឹងត្រែង ដែលចង់ឆ្លងដែនពីកម្ពុជាទៅឡាវ អាចមកស្នើសុំធ្វើបណ្ណព្រំដែន ឬក៏អាចមកផ្លាស់ប្ដូរពីបណ្ណឆ្លងដែន មកជាបណ្ណព្រំដែនបានផងដែរ៕
