ទិដ្ឋភាពគ្រោះថ្នាក់ចរាចរណ៍លើផ្លូវល្បឿនលឿនកន្លងមក។ រូប នគរបាល
ភ្នំពេញៈ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងថា ក្នុងរយៈពេលពេញ ១ ឆ្នាំ គ្រោះថ្នាក់ចរាចរណ៍បានកើតឡើងនៅលើផ្លូវល្បឿនលឿនភ្នំពេញ-ក្រុងព្រះសីហនុ មានចំនួន ៣៣៤ ករណី និងមានអ្នកស្លាប់ចំនួន ៥នាក់ ខណៈអ្នកជំនាញផ្នែកចរាចរណ៍បានស្នើសុំឱ្យមានការអនុវត្តន៍ច្បាប់ចរាចរណ៍ផ្លូវគោកឱ្យបានតឹងរ៉ឺង ដើម្បីកុំឱ្យមានគ្រោះថ្នាក់ចរាចរណ៍និងអ្នកស្លាប់កើតឡើងទៀត។
លោក ស៊ុន ចាន់ថុល ថ្លែងក្នុងពេលលោកចូលរួមជាអធិបតីក្នុងពេលពិធីអបអរសាទរខួប ១ ឆ្នាំ នៃការបើកឱ្យប្រើប្រាស់ជាផ្លូវការនូវផ្លូវល្បឿនលឿនភ្នំពេញ-ក្រុងព្រះសីហនុ កាលពីថ្ងៃទី ៧ ខែវិច្ឆិកា ឆ្នាំ ២០២៣។ ពិធីនេះក៏មានការចូលរួមពីលោក វ៉ាង វិនធាន ឯកអគ្គរាជទូតចិនប្រចាំកម្ពុជាលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន លោក ចាវ យ៉ុង (Zhou Yong) នាយកសាខាក្រុមហ៊ុនសាជីវកម្មស្ពាន និងថ្នល់ចិនប្រចាំកម្ពុជា និងថ្នាក់ដឹកនាំពីក្រសួង-ស្ថាប័នពាក់ព័ន្ធជាច្រើនរូប។
លោក ស៊ុន ចាន់ថុល ថ្លែងថា៖ «១ ឆ្នាំ នៃការដាក់ឱ្យប្រើប្រាស់ជាផ្លូវការផ្លូវល្បឿនលឿននេះ មានគ្រោះថ្នាក់ចរាចរណ៍ចំនួន ៣៤៤ ករណី ក្នុងនោះ បានបណ្តាលឱ្យមានអ្នកស្លាប់ចំនួន ៥ នាក់ និងអ្នករបួសចំនួន ៧៣ នាក់ផងដែរនៅលើផ្លូវល្បឿនលឿនយើងនេះ»។
លោកបានបន្តថា៖ «សព្វថ្ងៃនេះ ក្នុង ១ ថ្ងៃមានស្លាប់ ៥ នាក់ជាមធ្យមនៅទូទាំងប្រទេសតែតាមផ្លូវល្បឿនលឿនមានអ្នកស្លាប់ ៥ នាក់ក្នុង ១ ឆ្នាំដូចនេះទោះជាស្លាប់តែ៥នាក់ក្នុង ១ ឆ្នាំក៏ដោយ ក៏យើងមិនចង់បានដែរ»។
លោក ស៊ុន ចាន់ថុល ក៏បានស្នើសុំឱ្យក្រុមហ៊ុនល្បឿនលឿននេះ ត្រូវធ្វើការត្រួតពិនិត្យមើលបរិក្ខារទាំងអស់នៅលើផ្លូវនេះ កុំឱ្យមានគ្រោះថ្នាក់ចរាចរណ៍ជាពិសេសត្រូវពិនិត្យមើលរបងកុំឱ្យមានជនខិលខូចលួចកាត់ខ្សែលួស របង ដែលធ្វើសម្រាប់ការពារកុំឱ្យគោដើរឆ្លងកាត់ផ្លូវល្បឿនល្បឿននេះ។
លោក ស៊ុន ចាន់ថុល បានថ្លែងថា៖ «ខ្ញុំសុំអំពាវនាវដល់អ្នកប្រើប្រាស់ផ្លូវ សុំគោរពច្បាប់ចរាចរណ៍ សុំអំពាវនាវដល់ក្រុមហ៊ុនល្បឿនលឿន ពិនិត្យគ្រប់បែបយ៉ាងទាំងអស់ ដើម្បីផ្តល់សេវាឱ្យបានល្អ ដាក់ស្លាកសញ្ញាឱ្យបានគ្រប់គ្រាន់ថែមទៀត ដើម្បីកាត់បន្ថយគ្រោះថ្នាក់ចរាចរណ៍នៅលើផ្លូវល្បឿនលឿនរបស់យើង។ មួយវិញទៀត ស្នើសុំធ្វើកាត ETC បង្វែរពីការបង់លុយស្ទះរាប់គីឡូ ដោយយើងប្រើកាត ETC និង ANPR មកដល់ច្រកវាបើកផ្លូវ បើកទ្វារឱ្យយើងចេញបានតែម្តង»។
លោក គឹម បញ្ញា នាយកអង្គការមូលនិធិបង្ការរបួសអាស៊ី នៅថ្ងៃទី ៨ ខែវិច្ឆិកា បានសម្តែងនូវការព្រួយបារម្ភចំពោះទិន្នន័យគ្រោះថ្នាក់ចរាចរណ៍ និងស្លាប់នៅលើបណ្តោយផ្លូវល្បឿនលឿននេះ ទោះជាមានចំនួនអ្នកស្លាប់ត្រឹម ៥ នាក់ ក្នុង ១ ឆ្នាំក៏ដោយ ក៏ចំនួននេះនៅតែច្រើនថ្វីដ្បិតនៅតាមអមសងខាងផ្លូវមានរបងកុំឱ្យមានសត្វឆ្លងកាត់ និងមានការបែងចែកទ្រូងផ្លូវក៏ដោយ។
លោកថ្លែងថា៖ «ការផ្សព្វផ្សាយ អប់រំដល់ប្រជាពលរដ្ឋ របស់អាជ្ញាធរពាក់ព័ន្ធ និងក្រុមហ៊ុនល្បឿនលឿនលើបញ្ហាបង្ការគ្រោះថ្នាក់ចរាចរណ៍ គឺជារឿងមួយ ប៉ុន្តែគួរតែមានការអនុវត្តន៍ ច្បាប់ឱ្យបានតឹងរ៉ឹង ទើបជាការល្អបំផុត»។
លោក ឃាង ភារម្យ អ្នកនាំពាក្យនៃរដ្ឋបាលខេត្តព្រះសីហនុ នៅថ្ងៃទី ៨ ខែវិច្ឆិកា ថ្លែងថា បញ្ហានៃការគ្រប់គ្រងគ្រោះថា្នក់ចរាចរណ៍តាមផ្លូវល្បឿនលឿននេះ ស្ថិតក្រោមការគ្រប់គ្រងរបស់នាយកដ្ឋានគ្រប់គ្រងចរាចរណ៍ផ្លូវគោកនៃអគ្គស្នងការដ្ឋាននគរបាលជាតិ។
លោកថ្លែងថា៖ «តាមខ្ញុំដឹង គេមានក្រុមការងារមួយគ្រប់គ្រងចរាចរណ៍លើបណ្តោយផ្លូវល្បឿនលឿនហ្នឹង ពីភ្នំពេញ ខេត្តកណ្តាល កោះកុង និងខេត្តព្រះសីហនុ គឺមានច្រើនខេត្តរួមគ្នា»។ ផ្លូវល្បឿនលឿនត្រូវបានសម្ពោធដាក់ឱ្យប្រើប្រាស់កាលពីថ្ងៃទី ៩ ខែវិច្ឆិកា ឆ្នាំ ២០២២ ក្រោមអធិបតីលោក ហ៊ុន សែន អតីតនាយករដ្ឋមន្ត្រី និងសមភាគីចិនលោក លី កេឈាង៕
